1 Tesalonicenses 5 - Biblia Guarani Tumpa Iñee

¹ Ërei kuae kërai yave oasata vae regua, aecha mbaetɨ jupi aikuatía vaerä peve cherɨvɨ reta.

² Echa pe reta peikuaa kavi ko yandeYa iväea metei imonda vae pɨ̈tu yave outa vae rami ko,

³ ɨvɨ pegua reta jei yave: “Mbɨakatu jare pɨagüive.” Jayave iparanoe outa chupe reta kañɨtei, jare oiporarata kuña imembɨrasɨ vae rami, jare ngaraa oasayepe reta.

⁴ Ërei pe cherɨvɨ reta mbaetɨ ko peï pɨtumimbi pe, jókuae ara peresapɨa vaerä imonda vae rami.

⁵ Echa opaete pe reta ko tembipe pegua jare ara pegua reta. Mbaetɨ ko yande reta pɨ̈tu pegua ani pɨtumimbi pegua.

⁶ Jáeramo, agüɨye yake ïru vae reta rami. Jaeño yasareko avei jare yayeandu avei ñaï.

⁷ Echa oke vae reta oke pɨ̈tu yave, jare osavaɨpo vae reta oyembosavaɨpo pɨ̈tu yave;

⁸ ërei yande yaiko tembipe pe vae reta yayeandu ñaï, yamonde reve mborogüɨrovia pe jare mboroaɨu pe temimonde ñeraro pegua pe rami. Jare peñono peäka re äka-ɨru jiero pegua yemboasa pegua.

⁹ Echa Tumpa mbaetɨ ko yandeparavo oiporarauka yandeve vaerä. Yandeparavo ko, yayemboasauka vaerä yandeYa Jesucristo rupi,

¹⁰ echa jae omano yanderé, yaiko vaerä jae ndive yaikoveño ñaï yave ani ñamano yave.

¹¹ Jáeramo, peñomoäta ngatu päve jare peñemomɨ̈rata, peyapo peï rami.

Pablo omboarakuaa oporogüɨrovia vae reta

¹² Cherɨvɨ reta, pomoñera pemboete vaerä yandeYa pe oyeokuai pepɨte pe vae reta, petenondegua reta jare pemboarakuaa vae reta.

¹³ Peaɨu iparavɨkɨ jeko pegua, peiko päve mbɨakatu rupi.

¹⁴ Cherɨvɨ reta, pomoñera vi pemboeta vaerä iyakɨ vae reta pe, jare pemoäta ngatu oyembopɨtu vae jare pemborɨ ipɨ̈ratambae reta, jare pepɨaguasu opaete vae pe.

¹⁵ Peyeandu, agüɨye ikavimbae vae oyapo peve vae pe, pemboekovia ikavimbae pe. Ërei peiko kavi avei oyoupi, jare opaete vae ndive.

¹⁶ Peyerovia katu avei.

¹⁷ Peyerure avei pekueraimbae reve.

¹⁸ Pemee avei yasoropai Tumpa pe oipotagüe mbae re, echa kuae ko jae jemimbota perovia Cristo Jesús re vae reta pe.

¹⁹ Agüɨye pembogüe Espíritu Santo.

²⁰ Agüɨye peröɨro Tumpa iñee omombeu vae reta jei vae.

²¹ Pemae kavi opaete mbaembae re. Peñovatu ikavi vae.

²² Peyembosɨrɨ opaete mbae ikavimbae vae güi.

²³ Tumpa etei, mbɨakatu omee vae, tapeñono tee jare toyangareko kavi peré, peespíritu re, perekove re jare perete re, agüɨye vaerä kia pemboeko mbae re yandeYa Jesucristo ou ye yave.

²⁴ Peparavo vae iñee ombopo avei vae ko, jae ombopota opaete kuaekuae.

Tamaraeme reta

²⁵ Cherɨvɨ reta, peyerure oreré.

²⁶ Peyapo maraetei opaete oyoupe peyovapɨte jare peyomboete reve kavi.

²⁷ Pomoñera yandeYa re pemongeta vaerä kuae tupapire opaete yanderɨvɨ reta pe.

²⁸ YandeYa Jesucristo ipɨakavi toï opaete pe reta ndive. ¡Amén!