1 Tesalonicenses 4 - Biblia Guarani Tumpa Iñee

Kërai yandepuere yamboyerovia Tumpa

¹ Añave cherɨvɨ reta, pomoñera jare pomboarakuaa yandeYa Jesús re, kërai peyemboe oregüi kërai peiko vaerä jare pemboyerovia vaerä Tumpa, jökorai jeiete avei peyapo.

² Echa pe reta peikuaa mborookuai reta romombeu peve yandeYa Jesús oreokuai vae.

³ Echa Tumpa jemimbota ko peñeñono tee vaerä chupeguarä. Peyembosɨrɨ vaerä aguasa güi;

⁴ metei ñavo pegüi güɨnoi vaerä jembireko ae, jupi rupi jare mboromboete rupi,

⁵ agüɨye pekuña pota güiño, echa jökorai ko Tumpa re güɨroviambae reta.

⁶ Agüɨye peyapo kuae nunga ikavimbae vae. Echa kuae nunga ikavimbae vae peyapo yave, peyapo ko ikavimbae vae perɨvɨ reta pe. Echa yandeYa oiporaraukata ko peve kuae re, romombeu ma peve rami,

⁷ echa Tumpa mbaetɨ ko ñanereenɨi yaiko vaerä pɨ̈chɨi vae pe, ñanereenɨi ko yaiko tee vaerä chupeguarä.

⁸ Jáeramo, kia güɨröɨro yave oreporomboe, güɨröɨro ko Tumpa, jókuae omee yandeve Espíritu Santo vae.

⁹ Ërei mboroaɨu penoi vae regua, aecha mbaetɨ jupi aikuatía vaerä peve. Echa peikuaa ma Tumpa pemboe ma ko peyoaɨu vaerä.

¹⁰ Jare pe reta peaɨu ko opaete oporogüɨrovia vae Macedonia pegua reta. Ërei pomoñera jeiete avei peyoaɨu yae cherɨvɨ reta;

¹¹ jare peiko pɨagüive avei, peyemoambeko peparavɨkɨ re ae. Peparavɨkɨ pepo pe etei ore poyókuai rami.

¹² Jökorai yave, peyemboeteukata ko oporogüɨroviambae vae reta pe, jare ngaraa mbae oata peve.

YandeYa ou yeta vae regua

¹³ Cherɨvɨ reta, mbaetɨ roipota pepɨta peikuaambae omanogüe vae reta regua, agüɨye vaerä pepɨatɨtɨ, jókuae mbaetɨ mbae oäro vae reta rami.

¹⁴ Echa yande yarovia Jesús omano ko jare oikove ye ko. Jökoraiño vi Tumpa omoingove yeta Jesús ndive oporogüɨrovia jese vae reta.

¹⁵ Jáeramo romombeu peve yandeYa omombeu oreve vae, kërai yande oimeño yaikove yandeYa ou ye yave vae reta ngaraa yande räri yaja omanogüe vae reta güi.

¹⁶ Echa yandeYa etei ogüeyɨta ara güi ñee mbaepuere pegua ndive, araɨgua tenondegua vae iñee jare Tumpa jemimbɨ guasu ndive. Jare Cristo re güɨrovia reve omano vae reta oikove yeta jae reta räri;

¹⁷ jaɨkue rupi yande yaikoveño ñaï vae reta yayererajaukata jae reta ndive amapɨtu re ñaövaiti vaerä yandeYa. Jare jökorai yaikoita yandeYa ndive jekuae avei pegua.

¹⁸ Jáeramo, peñomoäta ngatu päve kuae ñee reta pe.