1 Tesalonicenses 3 - Biblia Guarani Tumpa Iñee

¹ Jáeramo mbaetɨ ma rogüɨropɨa ramo, royemongeta ropɨta vaerä oreño Atenas pe,

² jare romondo yanderɨvɨ Timoteo pépɨri. Jae ko Tumpa pe oyeokuai vae, oremborɨ omoërakua ñee ikavi vae Cristo regua vae. Romondo ko pemomɨ̈rata jare pemboarakuaa vaerä peporogüɨrovia pe;

³ agüɨye vaerä metei ave ipɨatɨtɨ kuae tembiporara jeko pegua. Echa pe reta etei peikuaa ko jaerä etei ko ñaï.

⁴ Ore roiko pe ndive yave, romombeu voi ko peve roiporarata vae, jare jökorai oasa, pe peikuaa rami.

⁵ Jáeramo, mbaetɨ ma aropɨa ramo, amondo Timoteo aikuaa vaerä peporogüɨrovia regua. Echa aipoɨu oporombotavɨ vae oyapouka vaerä peve ikavimbae vae, jare jökorai roparavɨkɨiño ma.

⁶ Ërei Timoteo ou yave jokotɨ güi, omombeu oreve peporogüɨrovia jare peporoaɨu re. Jei vi oreve kërai pemaendúa avei oreré oreraɨu reve vae, jare pekɨ̈reɨ yae orereecha, ore rami.

⁷ Jáeramo, cherɨvɨ reta, roiporara jare orepɨatɨtɨ pɨte pe, orepɨakatu peporogüɨrovia re.

⁸ Roikuaa pepɨ̈rata peporogüɨrovia pe yandeYa re ramo, oremoäta ngatu yae.

⁹ Jáeramo romee yasoropai tuicha Tumpa pe peré. Echa royerovia yae peré yandeRu Tumpa jovake.

¹⁰ Jare täta royerure ara rupi jare pɨ̈tu rupi, orepuere vaerä rojo poecha jare romombeu peve oataño peporogüɨrovia pe vae.

¹¹ YandeRu Tumpa etei jare yandeYa Jesús toipea tape cheve aja vaerä pépɨri.

¹² Jare yandeYa tapembokuakuaa jare tomee mboroaɨu peve, peyoaɨu päve vaerä jare vi opaete vae, ore poaɨu rami.

¹³ YandeYa tapemomɨ̈rata, peyapo vaerä jupi vae, jare agüɨye vaerä yandeRu Tumpa pemboeko mbae re, yandeYa Jesús ou ye yave opaete oporogüɨrovia vae reta ndive.