1 Tesalonicenses 2 - Biblia Guarani Tumpa Iñee

Pablo oyapo Tesalónica pe vae

¹ Orerɨvɨ reta, peikuaa ko pe reta, rojo yave perëta pe, mbaetɨ ko rojoiño.

² Yepe tëi roiporara yae Filipos pe, pe reta peikuaa rokɨɨyembae reve Tumpa re romombeu peve Tumpa ñee ikavi vae, yemboavai jeta yae tëi reve.

³ Echa oreporomboarakuaa mbaetɨ royavɨ, añetete ko, mbaetɨ ko roporombotavɨ.

⁴ Ërei Tumpa etei ko oreñono rogüɨraja vaerä ñee ikavi vae, jökorai ko oremiari; mbaetɨ romboyerovia vaerä kuimbae reta, jaeño Tumpa, oikuaa yandeyemongeta vae.

⁵ Echa mbaetɨ etei ko roiporu ñee-yukɨ, pe peikuaa rami, mbaetɨ vi orembaepotarai vɨari. Tumpa ko orekuaa.

⁶ Mbaetɨ ko roeka kuimbae reta oremboete vaerä, pegüi reta ani ïru reta güi. Ërei orepuere viña Cristo jemimondo jeko pegua.

⁷ Ërei ore royangareko ko peré poaɨu reve, metei kuña michia iyangarekoa oyangareko imembɨ re rami.

⁸ Ore poaɨu yae ko, mbaetɨ orekɨ̈reɨ romombeu peve Tumpa iñee kaviño, orerekove etei vi romeeta peré. ¡Echa ore poaɨu yae ko!

⁹ Cherɨvɨ reta, pemaendúa kërai täta roparavɨkɨ jare royemoambeko. Roparavɨkɨ ara rupi jare pɨ̈tu rupi ave, agüɨye vaerä pomoambeko mbae re, romombeu ramboeve peve Tumpa iñee ikavi vae.

¹⁰ Pe reta peikuaa kavi ko jare Tumpa vi, kërai royapo ikavi vae, jupi vae, mbaetɨ kia oremboeko mbae re, pe oporogüɨrovia vae reta ndive.

¹¹ Jare peikuaa vi ore pe ndive, metei kuimbae taɨ ñavo omboarakuaa jare pombopɨakatu rami ko.

¹² Ore poyókuai peiko vaerä Tumpa imbae reta yogüɨreko rami. Echa jae peparavo peiko vaerä iporookuaía jare iyemboetea pe.

¹³ Jókuae re romee avei yasoropai Tumpa pe. Echa perovia Tumpa iñee romombeu peve vae yave, mbaetɨ pemboresive kuimbae iñee rami, pemboresive ko Tumpa iñee añetete vae. Jare kuae Tumpa iñee oparavɨkɨ pe peporogüɨrovia vae reta ipɨa pe.

¹⁴ Echa pe cherɨvɨ reta, peiko ma oporogüɨrovia vae reta Judea pegua reta rami, echa peiporara ma perëtaɨgua reta güi, jae reta oiporara jëtaɨgua reta güi rami,

¹⁵ jae reta oyuka yandeYa Jesús, jare joko pegua ñeemombeúa reta jare ore reta vi opa oremoë oremombo joko güi, mbaetɨ omboyerovia reta Tumpa, jare oyovaicho reta opaete kuimbae reta re,

¹⁶ oremboavai oremiari vaerä judiombae vae reta pe, jae reta vi oyemboasauka vaerä. Jökorai jeieteño iyoa reta, jáeramo Tumpa iyarasɨ tuichagüe ou jese reta.

Pablo ikɨ̈reɨ ojo ye opou Tesalónica pegua reta pɨri

¹⁷ Cherɨvɨ reta, michi peguaño ko mombɨrɨ roï pegüi, ërei yepe tëi mbaetɨ poecha, ërei oremaendúa avei ko peré, roipota yae poecha;

¹⁸ jáeramo orekɨ̈reɨ yae rojo tëi pépɨri; che Pablo mbovɨ ye ma ayupavo tëi, ërei Satanás oremboavai.

¹⁹ ¿Echa mbae pa oreporoäro, oreyerovia ani oreyemboetea? Pe reta ko, yandeYa Jesucristo ou ye yave.

²⁰ Pe reta ko jae oreyemboetea jare oreyerovia.