1 Tesalonicenses 1 - Biblia Guarani Tumpa Iñee

Tamaraeme

¹ Che Pablo, Silvano jare Timoteo, roikuatía kuae tupapire opaete peporogüɨrovia vae Tesalonicaɨgua reta pe. Pe reta peï yandeRu Tumpa jare yandeYa Jesucristo re vae. YandeRu Tumpa jare yandeYa Jesucristo ipɨakavi jare ipɨakatu toï pe ndive.

Tesalonicaɨgua reta iporogüɨrovia regua

² Romee avei yasoropai Tumpa pe opaete peré, oremaendúa avei oreyerure rupi peré.

³ Oremaendúa avei yandeRu Tumpa jóvai peporogüɨrovia reve peparavɨkɨ vae re, peaɨu jare pekueraimbae reve peäro yandeYa Jesucristo vae re.

⁴ Echa pe orerɨvɨ Tumpa peraɨu vae reta, roikuaa jae peparavo.

⁵ Echa ñee ikavi vae romombeu peve yave mbaetɨ romombeu peve ñee rupiño, Espíritu Santo imbaepuere rupi ko jare roikuaa kavi añetete ko ñee ikavi vae. Jare peikuaa kavi kërai rojo pepɨte pe, mboroaɨu reve.

⁶ Jare pe reta pemboɨpɨ peiko, ore jare yandeYa oiko rami. Perovia romombeu peve vae peyerovia reve Espíritu Santo rupi, peiporara yae tëi reve.

⁷ Kuae jeko pegua opaete oporogüɨrovia vae reta Macedonia pegua jare Acaya pegua oecha peré kërai yogüɨreko vaerä.

⁸ Echa pegüi reta jërakua yandeYa iñee, mbaetɨ Macedonia jare Acaya peño, jërakua vi opaete kerupi peporogüɨrovia Tumpa re vae. Jáeramo ore mbaetɨ ma oata romoërakua vaerä.

⁹ Echa jae reta etei omombeu ïru vae reta pe kërai ore rojo perëta pe yave kërai oremboresive vae re, jare kërai peeya tumpa-raanga reta jare peyerova Tumpa kotɨ, peyeokuai vaerä Tumpa oikove vae jare añetete vae kotɨ,

¹⁰ jare kërai peäro peï Tumpa Taɨ ou ye vaerä ara güi, jae ko Jesús, jókuae Tumpa omoingove ye omanogüe reta ipɨte güi vae. Jae ko yandereepɨ Tumpa iyarasɨ outa vae güi vae.