1 SAMUEL 8 - Biblia Guarani Tumpa Iñee

Israel iñemuña reta oiporu juvicha guasurä

¹ Samuel indechi ma yave, oñono taɨ reta mburuvicharä Israel iñemuña reta re.

² Taɨrɨpɨ jee Joel, jare mokoía jee Abías; mókoi reve yogüɨreko mburuvicha oporojäa vaerä Beerseba pe.

³ Ërei mbaetɨ omomoe reta tu jeko, imbae potarai yae reta, korepoti oipɨɨ vɨari reta, güɨrokomegua reta teko jupi vae.

⁴ Jayave opaete Israel iñemuña reta itenondegua reta oyomboatɨ jare yogüeru reta Ramá pe, omomiari reta vaerä Samuel,

⁵ jei reta chupe: “Mase, nde rekuakuaa ma, jare nderaɨ reta mbaetɨ yogüɨreko nde rami; jáeramo, añave eñono oreve metei mburuvicha guasu orejäa vaerä, opaete ïru tëtaguasu reta yogüɨreko rami.”

⁶ Ërei Samuel pe mbaetɨ jaekavi jókuae mburuvicha jae reta oiporu vae. Jare Samuel oyerure yandeYa pe.

⁷ Jare yandeYa jei Samuel pe: “Eendu opaete vae reta jei ndeve vae; echa ndeä ko nereröɨro reta, che ko chereröɨro reta, agüɨye vaerä ma aiko jae reta juvicharä.

⁸ Egipto güi anoe reta güive oyapo reta opaete mbaembae añave rupi rami, chereeya reta jare omboete reta tumpa ambuae reta, jökorai etei vi ko ndeapo reta añave.

⁹ Añave eendu iñee; ërei eechauka kavi voi chupe reta këraita ko jókuae mburuvicha guasu jeko ikotɨ reta kuri vae.”

¹⁰ Jayave Samuel omombeu yandeYa iñee opaete vae pe; mburuvicha guasu oiporu chupe vae reta pe.

¹¹ Jei chupe reta: —Kuae ko oyapota jókuae peruvicha guasurä oïta vae: Güɨrajata peraɨ reta, jare oñonota käretou pe ñeraro regua retarä, jare kavayu regua retarä, jare jae järoarä.

¹² Jare oñonota mil vae sundaro reta juvicharä, cincuenta vae juvicharä; jaeramiño vi oñono retata oparavɨkɨ reta vaerä iko rupi, jare ombaarɨvo reta vaerä, jare oyapoukata chupe reta tembiporu ñeraro pegua, jare ikäretou ñeraro pegua reta reguarä.

¹³ Jökoraiño vi perayɨ reta güɨrajata jembiokuairä: Mbae ikäti kavi vae iyapoarä, oñemimo vaerä, jare mbɨyape iyapoarä.

¹⁴ Jae ramiño vi peɨvɨ kavi reta opata opɨ̈ro pegüi, peuvarupa, peolivorupa, jare oñonota imborɨa reta ipo pe.

¹⁵ Peremitɨ jäɨgüe jare uva iagüe güi oekata peve pediezmo reta, omee vaerä iyɨvɨrigua pe jare jembiokuai reta pe.

¹⁶ Güɨrajata omombaravɨkɨ vaerä perembiokuai kuimbae jare perembiokuai kuña reta, petaɨrusu reta oikove katu vae, jare pemburika reta.

¹⁷ Perɨmba reta güi oekɨta vi pediezmo jare pe ave peyeokuaita vi chupe.

¹⁸ Jare metei ara jókuae peruvicha guasu peiparavogüe jeko peroäse ma yave, yandeYa mbaetɨta oyeapɨsaka peré.

¹⁹ Ërei opaete vae mbaetɨ oipota oendu Samuel iñee, jei reta: —Roipotañoi rogüɨnoi oreruvicha guasurä,

²⁰ roiko vaerä vi ïru ɨvɨ pegua tëtaguasu reta rami, oreruvicha guasu toyangareko oreré, jae toguata oreve ñeraroa pe.

²¹ Jare Samuel omombeu yandeYa pe opaete kuae ñee reta oendugüe;

²² jare yandeYa jei Samuel pe: —Eendu jae reta jei vae, eñono mburuvicha guasu chupe reta. Jayave Samuel jei kuimbae Israel iñemuña reta pe: —Pekua metei ñavo perëta ae kotɨ.