1 SAMUEL 7 - Biblia Guarani Tumpa Iñee

¹ Jayave yogüeru Quiriat-jearim pegua reta jare güɨraja yandeYa ikäjou, jare oñono reta Abinadab jo jɨsɨ re oï vae pe. Jare oiparavo reta taɨ Eleazar oyangareko vaerä yandeYa ikäjou re.

Samuel oiko mburuvicha oporojäa vaerä Israel pe

² YandeYa ikäjou oyereru güire Quiriat-jearim pe, oasa veinte año rupi; jare Israel iñemuña reta ipɨatɨtɨ reve oeka yandeYa.

³ Samuel imiari Israel iñemuña reta pe, jei reve: “Opaete pepɨa ndive peyerova ye yandeYa kotɨ yave, pemombo peyeugüi tumpa ambuae reta jare tumpa-raanga Astarot jee vae pepɨte güi, jare peñono kavi pepɨa yandeYa pe, jare chupeño peyeokuai, jayave peyorata filisteo reta ipo güi.”

⁴ Jayave Israel iñemuña reta oekɨ omombo Baal iä reta, jare Astarot iä reta, jare omboete reta yandeYaño.

⁵ Jare Samuel jei: “Pemboatɨ opaete tëta Israel iñemuña reta Mizpa pe, ayerureta peré yandeYa pe.”

⁶ Jare oyomboatɨ reta Mizpa pe jare güeru reta ɨ opɨyere yandeYa jóvai mbotarä, jare oyekuaku reta tembíu güi jókuae ara, jare joko pe jei reta: “Oreyoa yandeYa kotɨ.” Jare Samuel omboɨpɨ oï juvicharä Mizpa pe.

⁷ Jare filisteo reta oikuaa yave Israel iñemuña reta ñogüɨnoi Mizpa pe, filisteo juvicha reta isundaro reta ndive opüa Israel iñemuña reta re. Jare jae reta okɨɨye filisteo reta güi.

⁸ Jayave jei reta Samuel pe: “Agüɨye tosondo ndeyerure yandeYa Tumpa pe oreré, jae orereepɨ vaerä filisteo reta ipo güi.”

⁹ Jare Samuel oipɨɨ vecha kuimbae raɨ okambuño vae, jare jókuae omee mɨmba oyeyukagüe opaetei oyeapɨ vae, yandeYa pe. Jare oyerure Israel iñemuña reta re, jare yandeYa oendu chupe.

¹⁰ Jare Samuel omee oï ramboeve mɨmba oyeyukagüe opaetei oyeapɨ vae, filisteo reta yogüeru oñeraro vaerä Israel iñemuña reta ndive. Ërei yandeYa ombou ararɨapu täta yae vae filisteo reta re, jare opa oiämondo jáeramo Israel iñemuña reta opa omoamɨri.

¹¹ Jare ñogüɨnoe Israel iñemuña reta oaɨkuemoña jare oyuka filisteo reta Mizpa güive Bet-car pe ojo oväe regua.

¹² Javoi Samuel oipɨɨ metei ita jare oñono Mizpa jare tëta Sen jee vae ipäu pe, jare ombojee Eben-ezer, jei reve: “Kuae ara jekuaeñoi yandeYa yandemborɨ.”

¹³ Jare jökorai filisteo reta mbaetɨ ma yogüeru oike Israel iñemuña reta iɨvɨ pe, jare yandeYa imbaepuere oï filisteo reta kotɨ, opaete ara Samuel oikove oiko ramboeve.

¹⁴ Jare Israel iñemuña reta opɨ̈ro ye filisteo reta güi iɨvɨ, tëta guasu reta, Ecrón güive Gat pe. Jare yogüɨreko mbɨakatu rupi Israel iñemuña reta amorreo reta ndive.

¹⁵ Jare Samuel oiko Israel iñemuña reta juvicharä opaete ara oikove oiko ramboeve,

¹⁶ jare año ñavo ojo oguata Bet-el rupi, Gilgal jare Mizpa rupi, oñono kavi vaerä teko jókuae ojoa rupi Israel iñemuña reta pe.

¹⁷ Jókuae jaɨkue rupi ou ye Ramá pe jo güɨnoia pe, jare joko güi oporojäa Israel iñemuña reta re, jare joko pe vi omopüa metei mɨmba oyeyuka oyeapɨ jese vae yandeYa pe.