1 SAMUEL 5 - Biblia Guarani Tumpa Iñee

Tumpa ikäjou oyereraja filisteo reta iɨvɨ pe

¹ Filisteo reta opɨ̈ro Tumpa ikäjou yave, güɨraja reta Eben-ezer güi Asdod pe,

² jare güɨroike reta Tumpa ikäjou itumpa Dagón tupao pe, jare oñono reta Dagón iyɨpɨ pe.

³ Pɨareve ndeimbove pe Asdod pegua reta oecha itumpa Dagón oyepɨso oï ɨvɨ pe yandeYa ikäjou jóvai, jayave oupi reta oñono ye jenda pe.

⁴ Pɨareve pe oecha reta ye itumpa Dagón jekuae yepɨso ɨvɨ pe yandeYa ikäjou jóvai, iñäka jare ipo mókoi reve opa oyeka oï öke pe etei, jaeño jetegüe opɨta.

⁵ Kuae jeko pegua Dagón isacerdote reta jare opaete oike Dagón itupao pe vae reta, mbaetɨ opɨ̈ro tupao jöke pe etei añave rupi.

⁶ Jare yandeYa imbaepuere oiporarauka Asdod pegua reta pe, jare omombaerasɨ pire mbaerasɨ ñakɨ̈ta vae pe opaete jókuae ɨvɨ rupi.

⁷ Kuae oecha yave Asdod pegua reta, jei: “Agüɨye topɨta yandepɨte pe Israel iñemuña reta iTumpa ikäjou, echa oiporarauka yandeve jare ñanetumpa Dagón pe.”

⁸ Jare omboatɨ reta opaete filisteo juvicha reta, oparandu chupe reta: —¿Mbae pa royapota Israel iñemuña reta iTumpa ikäjou pe? Jae reta jei: —Peraja Israel iñemuña reta iTumpa ikäjou Gat pe. Javoi güɨraja reta Tumpa ikäjou Gat pe.

⁹ Jare güɨraja reta oeya Gat pe yave, yandeYa imbaepuere rupi okɨɨye yae jókuae tëta pegua reta, oiporarauka chupe reta, michia güive okuakuaa vae re oë pire mbaerasɨ ñakɨ̈ta vae.

¹⁰ Jayave güɨroyakavo reta yandeYa ikäjou tëta Ecrón pe, jare joko pe yogüɨreko vae reta osapúkai jei: “¡Güeru reta Israel iñemuña reta iTumpa ikäjou yandeve opa vaerä yandeyukauka!”

¹¹ Jare omboatɨ reta opaete filisteo juvicha reta, jare jei chupe reta: “Peraja peeya Israel iñemuña reta iTumpa ikäjou, oyererúa güi, agüɨye vaerä opa ñamano.” Echa jërakua oï mano opaete jókuae tëta guasu pe, Tumpa oiporarauka yae oï joko pe.

¹² Jare oikoveño vae reta, oiporara mbaerasɨ pɨ̈chɨi ñakɨ̈ta vae, oë opaete vae jete re, jare opaete vae täta güɨroäse.