1 SAMUEL 4 - Biblia Guarani Tumpa Iñee

¹ Jare Samuel imiari opaete Israel iñemuña reta pe. Jókuae ara rupi Israel iñemuña reta ñogüɨnoe oövaiti filisteo reta, oñoraro vaerä jae reta ndive, jare oyembojeyupa reta Eben-ezer pe, jare filisteo reta oyembojeyupa Afec pe;

Filisteo reta opɨ̈ro Tumpa ikäjou

² jare filisteo reta opüa Israel iñemuña reta re; omboɨpɨ oñoraro reta, jare Israel iñemuña reta ñamɨri, filisteo reta oporoyuka cuatro mil ñeraroa pe.

³ Yogüeru ye ma ñeraroa güi teyupa pe yave, Israel iñemuña itenondegua reta jei: “¿Maera pa yandeYa yandeyukauka filisteo reta pe? ¡Yaja yaru yandeYa ikäjou morogüɨrökuavee päve pegua Silo güi, jókuae käjou toï yandepɨte pe, yandereepɨ vaerä yanderovaicho reta güi!”

⁴ Jayave Israel iñemuña reta omondo güeru Silo güi, yandeYa imbaepuere yae vae ikäjou morogüɨrökuavee päve pegua, araɨgua reta iä ipäu pe oiko vae ikäjou. Jare mókoi reve Elí taɨ Ofni jare Finees yogüeru vi.

⁵ Jare yandeYa ikäjou morogüɨrökuavee päve pegua güeru güɨroväe teyupa pe yave, Israel iñemuña reta osapúkai täta oyerovia güi, omokana etei reta ɨvɨ isapúkai pe.

⁶ Jare filisteo reta oendu yave jókuae sapúkai täta yae vae, jei reta: “¿Maera ra osapúkai mbatee hebreo reta jeyupa pe?” Jare oikuaa reta yandeYa ikäjou morogüɨrökuavee päve pegua ko güeru reta jeyupa pe yave,

⁷ filisteo reta omboɨpɨ okɨɨye, jare jei reta: “¡Ou Tumpa jae reta jeyupa pe! ¿Këraita pa añave yaiko? ¡Echa tenonde yave mbaetɨ jökorai!

⁸ ¿Këraita pa yaiko? ¿Kia pa yandereepɨta kuae Tumpa imbaepuere yae vae güi? ¡Jae ko jókuae Tumpa Egiptoɨgua reta oyuka ñuu rupi oipotagüe mbaerasɨ pɨ̈chɨi pe vae!

⁹ ¡Peñemoäta ngatu filisteo reta, peyembokuimbae ñeraro pe, agüɨye vaerä peyeokuai hebreo reta pe, jae reta oyeokuai peve rami! ¡Peyembokuimbae jare peñoraro!”

¹⁰ Jayave filisteo reta oñeraro jare omoamɨri Israel iñemuña reta, opa otekuarai reta jeyupa kotɨ. Jeta yae oparapiti filisteo reta; Israel iñemuña reta ñeraro regua omano treinta mil.

¹¹ Jare Tumpa ikäjou opɨ̈ro jare güɨraja reta, jare mókoi reve Elí taɨ, Ofni jare Finees omano vi.

¹² Jare jókuae ñeraroa güi otekuarai metei kuimbae Benjamín iñemuña pegua, ojo oväe jókuae ara voi Silo pe. Ipächa jemimonde jare iñäka ɨvɨ katuai.

¹³ Ou oväe yave, Elí oguapɨ oï tenda re jöke pe, omae reve tape re, echa ipɨatɨtɨ yae Tumpa ikäjou re. Jókuae kuimbae ou oväe tëta guasu pe yave, omoërakua mbae ko oasa ñeraroa pe vae, jare opaete tëta pegua reta jäsémbai.

¹⁴ Jare Elí oendu yave tëta guasu pegua reta jäsémbai, oparandu: —¿Maera pa jäsémbai vae? Jare jókuae kuimbae ou omombeu Elí pe jarembae voi.

¹⁵ Elí güɨnoi ma noventa y ocho año, jesa ogüe ma, mbaetɨ ma ipuere omae.

¹⁶ Jókuae kuimbae jei Elí pe: —Ayu ramoete aväe. Atekuarai kuae ara ñeraroa güi. —¿Maratu pa cheraɨ? —jei Elí.

¹⁷ Jare ñee jerúa jei: —Israel iñemuña reta otekuarai filisteo reta güi, jeta yae omano reta. Jare mókoi reve nderaɨ, Ofni jare Finees omano ñeraroa pe jare Tumpa ikäjou opɨ̈ro reta.

¹⁸ Jare Elí oendu yave Tumpa ikäjou regua, oyatuaka jenda güi öke iyɨpɨ pe, jare iñatuäti oso jare omano, echa indechi yae jare ikɨra yae vi. Jae oiko mburuvicharä Israel iñemuña reta pe cuarenta año.

¹⁹ Jare taɨtatɨ, Finees jembireko ipurúa oï vae, oa imembɨ oendu yave Tumpa ikäjou oñepɨ̈ro, jare omano imendu jare ime.

²⁰ Omae jese vae reta oecha omanota yave jei chupe: “Agüɨye ekɨɨye, nemembɨ metei kunumi raɨ ko.” Ërei jae mbaetɨ iñee omoë jare mbaetɨ vi oyeapɨsaka jese.

²¹ Jare jókuae michia raɨ ombojee Icabod, jei reve: “Israel iñemuña reta güi oñepɨ̈ro mbaemboetea”, Tumpa ikäjou oñepɨ̈ro jare imendu jare ime omano ramo.

²² Jare jae jei: “Tumpa iyemboetea oñepɨ̈ro Israel iñemuña reta güi; echa Tumpa ikäjou opɨ̈rouka reta.”