1 SAMUEL 31 - Biblia Guarani Tumpa Iñee

Saúl jare taɨ reta imano

¹ Filisteo reta oñeraro Israel iñemuña reta ndive, jare Israel iñemuña reta otekuarai filisteo reta güi, jare jeta omano reta ɨvɨtɨ Gilboa pe.

² Jare filisteo reta oaɨkuemoña Saúl jare taɨ reta; oyuka reta Jonatán, Abinadab jare Malquisúa, jae ko Saúl taɨ reta.

³ Jare jeiete yae ñeraro Saúl kotɨ, jare uvɨ regua reta oupitɨ yave, ou okɨɨye yae chugüi reta.

⁴ Jayave Saúl jei iyeopiaka ivoɨa pe: —Eekɨ ndekɨsepuku, jare chekutu pɨpe, agüɨye vaerä yogüeru kuae itumpa-raanga pota vae reta cheyuka, jare oyuvanga reta cheré. Ërei iyeopiaka ivoɨa mbaetɨ oipota, echa okɨɨye yae. Jayave Saúl oipɨɨ ikɨsepuku oa jese, oyeyuka.

⁵ Jare iyeopiaka ivoɨa oecha ma Saúl omano yave, jae oekɨ vi ikɨsepuku, jare oa vi jese jare omano jae ndive.

⁶ Jökorai omano Saúl jókuae ara mboapɨ reve taɨ reta ndive, jare iyeopiaka ivoɨa, jare opaete iyɨvɨrigua reta ndive.

⁷ Jare Israel iñemuña reta yogüɨreko ɨvɨtɨ päu ipe kavi vae jovaicho re vae, ɨ̈aka Jordán jovaicho kotɨ, oecha reta Saúl jare taɨ reta omano jare Israel iñemuña reta otekuarai yave, opa oeya reta tëta guasu. Jayave filisteo reta yogüeru yogüɨreko joko pe.

⁸ Jare pɨareve pe filisteo reta yogüɨraja mbae oekɨ vaerä omanogüe vae reta güi yave, oväe reta Saúl jare mboapɨ reve taɨ reta jetegüe oyepɨso ñogüɨnoi ɨvɨtɨ Gilboa pe.

⁹ Jayave oyasɨa reta güɨraja iñäkagüe, jare jembiporu ñeraro pegua. Jare omondo reta ñee jerajaa reta opaete filisteo iɨvɨ rupi, omoërakua vaerä itumpa reta itupao guasu pe jare tëta pe.

¹⁰ Jare oñono reta jembiporu ñeraro pegua itumpa Astarot itupao guasu pe, jare jetegüe ombosagüɨu reta tëta guasu Bet-sán ikësea re.

¹¹ Jare Jabes, Galaad pegua pe yogüɨreko vae reta oikuaa filisteo reta oyapo Saúl jetegüe pe vae yave,

¹² opaete kuimbae reta jëia vae opüa jare iköe oguata reta jókuae pɨ̈tu, jare ombogüeyɨ reta tëta guasu Bet-sán ikësea güi Saúl jare taɨ reta jetegüe; güeru reta oapɨ Jabes pe.

¹³ Jare oipɨɨ reta ikägüegüe oñotɨ joko pe, metei ɨvɨra igüɨ pe. Javoi chiu ara oyekuaku reta tembíu güi.