1 SAMUEL 30 - Biblia Guarani Tumpa Iñee

David omoamɨri Amalec iñemuña reta

¹ Mboapɨa ara pe David jare jupiegua kuimbae reta yogüeru ye yave Siclag pe, oecha reta Amalec iñemuña reta oike yepe Neguev pe jare opüa reta Siclag re opa oapɨ reta.

² Jare güɨraja reta tembipɨɨrä kuña reta jare opaete joko pe ñogüɨnoi vae michia güive okuakuaa vae pe; mbaetɨ oyuka metei ave, ërei opaetei güɨraja.

³ David jare jupiegua kuimbae reta yogüeru oväe tëta guasu pe yave, oecha reta tëta opa oyeapɨ oï, jare jembireko reta, taɨ reta jare tayɨ reta, opa oyereraja tembipɨɨrä.

⁴ Jayave David jare kuimbae reta jae ndive ñogüɨnoi vae jäse jare oyaeo ipuereä ma regua.

⁵ Jaeramiño vi David jembireko mókoi reve güɨraja reta tembipɨɨrä: Ahinoam, Jezreel pegua jare Abigail, Carmel pegua, Nabal amɨri jembirekogüe.

⁶ Jare David ipɨatɨtɨ yae, echa jupiegua kuimbae reta iyarasɨ yae ikotɨ jare oipota oyapi reta ita pe, opa ramo taɨ reta, tayɨ reta oyererajauka tembipɨɨrä. Ërei David oyeko iYa Tumpa re.

⁷ Jare David jei sacerdote Abiatar, Ahimelec taɨ pe: —Eru cheve temimonde iyɨvambae vae sacerdote pegua. Jare Abiatar güɨraja chupe jókuae temimonde.

⁸ Jare David oparandu yandeYa pe jei reve: —¿Aaɨkuemoñata pa kuae imonda vae reta? ¿Aupitɨ retata pa? Jare yandeYa jei chupe: —Eaɨkuemoña reta, repɨ̈ro yeta jókuae oipɨɨ güɨrajagüe reta.

⁹ Jare David ojo jókuae seisciento kuimbae reta ndive, yogüɨraja oväe reta ɨ̈aka raɨ Besor jee vae pe. Joko pe amogüe reta opɨta.

¹⁰ Jare David ïru cuatrociento vae reta ndive yogüɨraja tenonde, ïru dosciento vae reta opɨta, echa ikangɨ yae reta ramo mbaetɨ oasa ɨ̈aka raɨ Besor.

¹¹ Jare tape rupi ñuu pe oväe reta chupe metei Egiptoɨgua, jare güeru reta David pe, omee reta mbɨyape chupe okaru vaerä jare ɨ oɨu vaerä;

¹² omee reta vi chupe michi ɨva oñemotini oyeapasogüe, jare mókoi iɨ uva iagüe oñemotini oyeapasogüe, jare opa okaru yave ipɨ̈rata ye, echa mboapɨ ara ma jare mboapɨ pɨ̈tu ma mbaetɨ okaru jare ɨ jou.

¹³ Jare David oparandu chupe: —¿Kia pa nde? ¿Kia pa jae ndeya? Jókuae kunumi Egiptoɨgua jei: —Che jae ko Egiptoɨgua, Amalec iñemuña jembiokuai ko che, mboapɨ ara rupi ma cheya chereeya, echa chembaerasɨ;

¹⁴ rojo roike cereteo reta iɨvɨ pe, jare Judá jare Neguev Caleb iɨvɨ pe, jare roapɨ roeya tëta Siclag.

¹⁵ Jare David oparandu chupe: —¿Ndepuere pa chereraja jae reta ñogüɨnoia pe? Jare jókuae Egiptoɨgua jei: —Tumpa jee re ere cheve, mbaetɨta cheyuka jare mbaetɨta chemee cheya pe yave, torogüɨraja jae reta ñogüɨnoia pe.

¹⁶ Jare güɨraja jókuae imonda vae reta ñogüɨnoia pe; jare jae reta opa etei oñemoai moai ñogüɨnoi jókuae ñuu pe, okaru reta, okau reta, oyapo reta arete opaete jókuae filisteo reta güi jare Judá pegua reta güi oñomigüe re.

¹⁷ Jayave David opüa jese reta, ndeimbove güive kaaru regua, jare opaetei oyuka, jaeño ma oasayepe cuatrociento kunumi camello re opo otekuarai vae reta.

¹⁸ Jare David opɨ̈ro ye opaete Amalec iñemuña reta oñomi güɨraja vae reta, jaeramiño vi opɨ̈ro ye mókoi reve jembireko.

¹⁹ Opaetei opɨ̈ro ye, opaete oñeomigüe mbae tuicha vae ani michi vae, taɨ reta ani tayɨ reta oyererajagüe, mbaetɨ etei mbae oata David pe.

²⁰ Jaeramiño vi David opɨ̈ro vecha reta, guaka reta, kuae reta güeru jare jei reta: “Kuae jae David opɨ̈rogüe.”

²¹ Jare David ou oväe yave, jókuae dosciento kuimbae ikangɨ vae ñogüɨnoi ɨ̈aka Besor pe vae reta yave, jae reta ñogüɨnoe oövaiti David jare jupiegua reta. Jare David ou oväe joko pe yave oyapo maraetei chupe reta mbɨakatu reve.

²² Ërei David ndive yogüɨraja ñeraroa pe vae reta ipɨte pe oime jeko kavimbae ipɨapochɨ vae; kuae reta jei agüɨye vaerä oñemee mbae kuae kuimbae reta pe, jaeño ma jembireko reta pe jare taɨ reta pe, jare opa mbae oñepɨ̈rogüe oñemee chupe reta yave opa vaerä yogüɨraja.

²³ Ërei David jei: —Agüɨye jökorai peyemongeta tëtara reta, yandeYa omee yandeve vae re, jae ko yandeangareko, jae ko omee yandepo pe kuae imonda vae reta.

²⁴ Ngaraa kia oyeapɨsaka kuae peyemongeta re, echa opɨtaño oyangareko mbaembae re vae reta ani yogüɨraja ñeraroa pe vae reta, oyovake oyemboyaota chupe.

²⁵ Jare jókuae ara güire añave regua jókuae mborookuai oyeapo Israel iñemuña reta ipɨte pe.

²⁶ Jare David ou oväe Siclag pe yave, omondo opɨ̈rogüe ivɨa-ïru Judá pe tenondegua vae reta pe, jei reve: “Mase, ko oï mbota peveguarä, mbaembae oñepɨ̈rogüe yandeYa jovaicho reta güi vae.”

²⁷ Omondo vi Bet-el pe, Ramot Neguev pegua pe, Jatir pe,

²⁸ Aroer pe, Sifmot pe, Estemoa pe,

²⁹ Racal pe, Jerameel iñemuña reta jëta guasu reta pe, ceneo jëta guasu reta pe,

³⁰ Horma pe, Corasán pe, Atac pe,

³¹ Hebrón pe, jare opaete jókuae ɨvɨ David jupiegua reta ndive oguataa rupi.