1 SAMUEL 3 - Biblia Guarani Tumpa Iñee

YandeYa oenɨi Samuel

¹ Kunumi Samuel oyeokuai yandeYa pe Elí jóvai. Jókuae ara rupi yandeYa iñee mbaetɨ oyeendu, echa mbaetɨ oyeechauka avei.

² Ërei metei pɨ̈tu Elí oyapakua oï jupa pe; jesa omboɨpɨ ma ogüe, mbaetɨ ma oecha kavi yave,

³ Samuel oke oï yandeYa jo pe, Tumpa ikäjou oïa pe; ndei mechero Tumpa imbae opa oyembogüe mbove,

⁴ yandeYa oenɨi: —¡Samuel! —¡Ko aï! —jei Samuel.

⁵ Jare osɨi ojo Elí oïa pe, jei: —¡Ko aï! ¿Mbaerä pa chereenɨi? Jare Elí jei chupe: —Che mbaetɨ ko roenɨi; ekua eyapakua. Jare jae ojo ye oyapakua.

⁶ Jare yandeYa jekuae oenɨi ye: —¡Samuel! Jare Samuel opüa ojo ye Elí oïa pe, jare jei: —¡Ko aï! ¿Mbaerä pa chereenɨi? Jare jae jei: —Cheraɨ, che mbaetɨ ko roenɨi; ekua eyapakua.

⁷ Jare Samuel mbaetɨ vɨteri yepe oikuaa yandeYa, iñee ave ndeiño oendu chupe.

⁸ YandeYa jekuae oenɨi ye Samuel mboapɨa ma. Jare jae opüa ojo Elí kotɨ, jare jei: —¡Ko aï! ¿Mbaerä pa chereenɨi? Jayave Elí oikuaa yandeYa ko oenɨi kunumi vae,

⁹ jare jei Samuel pe: —Ekua eyapakua, jare nereenɨi yave, ere chupe: “Nemiari cheYa, echa ko che nderembiokuai oyeapɨsaka oï.” Jökorai Samuel ojo, jare oyapakua ye jupa pe.

¹⁰ Jare ou yandeYa oyemboɨ, jare oenɨi tenonde yave oenɨi rami, jei: —¡Samuel! ¡Samuel! Jayave Samuel jei: —Nemiari, echa ko che nderembiokuai oyeapɨsaka oï.

¹¹ Jare yandeYa jei Samuel pe: —Mase, che ayapota mbae Israel iñemuña reta pe, jare opaete kia nunga vae oendu yave ombopɨakɨɨye yaeta.

¹² Jókuae ara che ambopota cheñee Elí kotɨ, opaete mbaembae che jae iñemuña reta kotɨ vae, iyɨpɨ güive iyapɨ kotɨ.

¹³ Che amombeu chupe aiporarauka vaerä iñemuña reta pe jekuae avei pegua, mbaeyoa jae oikuaa oï vae re; echa taɨ reta cheangao, jare jae mbaetɨ oyopia taɨ reta.

¹⁴ Jáeramo, che amombeu kavi voi cheree re Elí iñemuña reta pe, kërai imbaeyoa reta ngaraa mai oyemboai, mɨmba oyeyukagüe reta pe ave ani mbota reta pe ave.

¹⁵ Jare Samuel oyapakua oke köe regua, jayave oipea yandeYa jo jöke. Jare Samuel oipoɨuño omombeu Elí pe jókuae Tumpa güi oendugüe.

¹⁶ Elí oenɨi Samuel jare jei chupe: —¡Cheraɨ Samuel! —¡Ko aï! —jei chupe.

¹⁷ Jare Elí jei: —¿Mbae pa jei yandeYa ndeve? Romoñera agüɨye vaerä reikuaku chegüi. ¡Tumpa täta toiporarauka ndeve, reikuaku yave chegüi opaete mbaembae jei ndeve vae!

¹⁸ Jare Samuel omombeu chupe opaete, oikuakumbae reve mbae. Jayave Elí jei: —¡YandeYa ko! ¡Toyapo jaekavi chupe vae!

¹⁹ Jare Samuel okuakuaa, jare yandeYa oï jae ndive, mbaetɨ iñee oasaiño ombopombae reve.

²⁰ Jare opaete Israel iñemuña reta, Dan güive Beerseba kotɨ, oikuaa reta Samuel jae ko yandeYa iñeemombeúa jupi vae.

²¹ Jare yandeYa oyekuaa ye Samuel pe tëta Silo pe; echa joko pe yandeYa omombeu chupe iñee.