1 SAMUEL 26 - Biblia Guarani Tumpa Iñee

David iñɨ̈ro ye Saúl pe

¹ Zif pegua reta yogüeru Saúl pɨri Gabaa pe jei reta reve: “David oime oï ɨvɨtɨ Haquila re, kuaraɨ oëa kotɨ ñuu güi.”

² Jayave Saúl opüa jare ojo Zif iñuu pe, güɨraja tres mil kuimbae Israel iñemuña reta güi oyeparavogüe, oeka reta vaerä David ñuu pe.

³ Jare Saúl oyembojeyupa ɨvɨtɨ Haquila re kuaraɨ oëa kotɨ oï ñuu vae pe, tape jembeɨ pe. David oï ñuu pe jare oikuaa Saúl oaɨkuemoña yepe ojo joko pe.

⁴ Jare David omondo omae vɨari vae reta, jökorai oikuaa kia pe oime oï Saúl vae.

⁵ Jare David opüa jare ojo Saúl jeyupa kotɨ, jare oecha kia pe ko oke Saúl jare Abner, Ner taɨ; Abner jae ko Saúl isundaro reta itenondegua ete. Saúl oke oï teyupa mbɨte pe, jare isundaro reta ñogüɨnoi iyɨ́vɨri rupi.

⁶ Jayave David jei Ahimelec Het iñemuña pegua pe, jare Abisai, Sarvia imembɨraɨe Joab tɨkeɨ pe: —¿Kia pa ojota cherupíe teyupa kotɨ, Saúl oïa pe? —Che taja nde ndive —jei Abisai.

⁷ Jare jókuae pɨ̈tu voi David jare Abisai yogüɨraja teyupa pe. Saúl oke oï teyupa pe. Jare imii oyeatɨka oï iñäkandɨta iyɨpɨ pe. Abner jare sundaro reta oke ñogüɨnoi iyɨ́vɨri rupi.

⁸ Jayave Abisai jei David pe: —Añave Tumpa omee ndepo pe nderovaicho. Emaeño cheré imii ae pe taikutu ɨvɨ re, tayuka meteia peño.

⁹ Ërei David jei chupe: —Agüɨye eyuka, echa kia oyuka yave yandeYa oiparavogüe, ngaraa jekombae opɨta.

¹⁰ YandeYa jee re, jae etei ko oiporaraukata chupe, ani outa ara oväe omano vaerä ani ojota ñeraroa pe omano.

¹¹ YandeYa tacheövatu agüɨye vaerä ayuka jae oiparavogüe. Añave eraja imii jare iɨguarɨru, jare yaja.

¹² Jökorai David güɨraja mii jare ɨguarɨru Saúl iñäkandɨta iyɨpɨ güi, güɨraja mbaetɨ reve kia oecha ani oikuaa, opaete oke ñogüɨnoi, echa yandeYa etei ombojopeɨ reta.

¹³ Jayave David oasa ɨvɨtɨ päu jovaicho kotɨ, jare ojo oï mombɨrɨ ɨvɨtɨ iyapɨte re, jae reta jeyupa güi.

¹⁴ Jayave David oenɨi Abner jare isundaro reta: —¿Abner reendu pa cheñee? Jare Abner jei: —¿Kia pa nde resapúkai reï mburuvicha guasu pe vae?

¹⁵ Jare David jei Abner pe: —¿Jaeä pa nde metei kuimbae mbaetɨ kia ipuere ndemboyovake Israel pe vae? ¿Maratuagua pa mbaetɨ reyangareko nderuvicha guasu re? Echa oike kia oyuka vaerä nderuvicha guasu.

¹⁶ Kuae reyapo vae mbaetɨ ikavi. Che jae yandeYa jee re peve, ikavi ko opa pemano, echa mbaetɨ peyangareko peruvicha guasu yandeYa oiparavogüe re. Añave emae, ¿ketɨ pa oime oï mburuvicha guasu imii jare iɨguarɨru iñäkandɨta iyɨpɨ pe oï vae?

¹⁷ Saúl oikuaa David iñee jare jei: —¿Jaeä pa jókuae neñee cheraɨ David? Jare David jei: —Che ko cheruvicha guasu.

¹⁸ ¿Maera pa cheraɨkuemoña cheya? ¿Mbae pa ayapo? ¿Oime pa mbae ikavimbae ayapo?

¹⁹ Cheruvicha guasu, romoñera reyeapɨsaka vaerä cheré, yandeYa ndemboyovaicho cheré yave, jae toipɨɨ chegüi mbota, ërei kuimbae retaño yave, toiporara reta yandeYa jóvai, echa añave cherenoe chemombo reta kuae ɨvɨ güi, jei reve cheve: “Ekua eyeokuai ïru tumpa ambuae reta pe.”

²⁰ Aipotaäecha cherugüɨ oyepɨyere mombɨrɨ yandeYa güi. ¡Ërei nde mburuvicha guasu Israel pegua reë chereeka tüata (piki) yaeka rami, jare chepïaro inambu ñaipïaro rami!

²¹ Jayave Saúl jei: —¡Ayapo mbaeyoa! ¡Yaja ye cherupíe cheraɨ David, mbaetɨta mbae ikavimbae ayapo ndeve, echa nde mbaetɨ mbae reyapo cheve, che ayapo mbae aikuaambae reve, jare ayavɨ tuicha rupi!

²² David jei chupe: —Ko oï mburuvicha guasu imii, tou kuae kotɨ metei nderembiokuai togüɨraja.

²³ Jare yandeYa tomboekovia metei ñavo pe, jupi rupi oyapo vae pe, yepe tëi añave yandeYa nemee chepo pe, ërei che mbaetɨ aipota apoko nde yandeYa jembiparavo re.

²⁴ Mase, che mbaetɨ mbae ayapo ndeve rami, jökorai vi yandeYa tomae kavi cheré, jae tacherenoe mbɨatɨtɨ güi.

²⁵ Jare Saúl jei David pe: —¡Eyekou cheraɨ David! ¡Echa nde reyapota mbae tuicha vae jare oikota vae! Kuae jaɨkue rupi David ojo joko güi, jare Saúl ou ye jëta kotɨ.