1 SAMUEL 25 - Biblia Guarani Tumpa Iñee

Samuel imano

¹ Samuel omano, jare opaete Israel iñemuña reta oyemboatɨ oäpiro vaerä imano. Jare oñotɨ reta jetegüe jae jëta Ramá pe. Kuae jaɨkue rupi David ojo ñuu Parán kotɨ.

David jare Abigail

² Oiko tëta Maón pe metei kuimbae güɨnoi mɨmba Carmel pe vae, jae ko oikokatu yae vae, güɨnoi tres mil vecha jare mil kavara, joko pe jae oñapi oï ivecha reta.

³ Kuae kuimbae jee Nabal, jae ko Caleb iñemuña pegua, jekopochɨ jare jeko kaviä; ërei jembireko Abigail yarakuaa katu jare maepöra.

⁴ Jare David ñuu pe oikuaa Nabal oñapi güɨnoi ivecha reta vae.

⁵ Jayave David omondo payandepo kunumi Carmel pe, jei chupe reta: “Pemee tamaraeme Nabal pe cheree re.”

⁶ Oyókuai jei vaerä körai: “Mbɨakatu toï nde ndive, ndero pegua reta ndive jare opaete ndembaembae ndive.

⁷ Aikuaa reñapi renoi ndevecha reta. Mase, nde reikuaa ko ndevecha iyangarekoa reta yogüɨreko yave ore ndive Carmel pe, mbaetɨ mbae oata chupe reta, jare mbaetɨ vi mbae oñepɨ̈ro chugüi reta.

⁸ Eparandu nderembiokuai reta pe, jare jae reta omombeu kavita ndeve. Kuae jeko pegua romoñera reiparareko vaerä kuae kunumi reta amondo vae, emee oreve mbae renoigüe, echa che nderaɨ rami vi ko.”

⁹ Jare yogüɨraja oväe yave kuae kunumi reta, omombeu opaete David jeigüe Nabal pe, jare oäro reta mbae ra jeita vae.

¹⁰ Jare Nabal jei David jemimondo reta pe: —¿Kia pa jókuae David? ¿Kia pa jókuae Isaí taɨ? Jeta ko añave rupi tembiokuai reta iya güi otekuaraigüe.

¹¹ ¿Aekɨta yera cherembiokuai reta jembíu, vino jare soo, amee vaerä kuimbae reta aikuaambae ketɨgua reta ko vae pe?

¹² Jayave David jembiokuai reta opa ye yogüeru, jare omombeu reta opaete Nabal jeigüe David pe.

¹³ Jayave David jei jupiegua reta pe: —¡Peyeapo katu perembiporu ñeraro pegua ndive! Jare metei ñavo oyeapo kavi ikɨsepuku ndive, jare David oñono kɨsepuku ikúa re; cuatrociento kuimbae ndive ojo David, jare dosciento opɨtaño oyangareko vaerä mbaembae re.

¹⁴ Ërei metei Nabal jembiokuai ojo jei Abigail, Nabal jembireko pe: —Ñuu güi David ombou ñee jerajaa omee vaerä tamaraeme yandeya pe, ërei jae oyemboarasɨ jare iñee kaviä chupe reta.

¹⁵ Jókuae kuimbae reta ipɨakavi yae ko ore ndive roiko yave jae reta ndive ñuu pe, mbaetɨ mbae omboata reta oreve.

¹⁶ Jae reta oyangareko kavi oreré jare orerɨmba reta re, ara rupi jare pɨ̈tu yave.

¹⁷ Añave eyemongeta kavi, mbae reyapo vaerä, echa jaema outa mbae ikavimbae yandeya re, jare jo pegua reta re, echa jae kuimbae ipɨapochɨ yae vae ko, mbaetɨ kia ipuere imiari jae ndive.

¹⁸ Jayave Abigail oipɨɨ dosciento mbɨyape, mókoi jɨru vino, pandepo vecha oyemboyɨgüe, pandepo jɨru mbae jäɨ oyeimbegüe, cien iɨ uva oñemotini oyeapasogüe, jare dosciento ipe ɨva oñemotini oyeapasogüe. Jare ombovoɨta imburika reta.

¹⁹ Jare jei jembiokuai reta pe: —Pekua tenonde, che ajata peraɨkue kuri. Ërei mbaetɨ etei omombeu ime Nabal pe.

²⁰ Jare opo metei mburika re jare oñemi reve ogüeyɨ ɨvɨtɨ güi. Jare oecha, ko David jare jembiokuai reta yogüeru, jare jae oë oövaiti.

²¹ David yepe jei ipɨa pe ou oiko: “Ayangarekoiño ma Nabal jɨmba reta re ñuu pe, jare mbaetɨ etei mbae aekɨ chugüi, jare añave jae omboekovia cheve ikavi ayapo vae ikavimbae pe.

²² ¡Tumpa täta toiporarauka cheve pɨareve oime yave aeya kia nunga kuimbae jekove reve Nabal jëtara güi!”

²³ Jare Abigail oecha yave David ogüeyɨ voi imburika güi, jare oyetavatɨka itindɨasɨ reve ɨvɨ re David jóvai.

²⁴ Javoi oya katu David ipɨ re, jei chupe: —¡Cheya, cheré toï teko! Romoñera reyeapɨsaka vaerä cheré jare eendu che nderembiokuai iñee.

²⁵ Agüɨye eyapo Nabal jei vae; jae jee rami etei ko jeko. Echa jae ko jee Nabal, jare yarakuaambae oiko. Ërei che nderembiokuai mbaetɨ ko aecha jókuae kunumi reta rembou vae.

²⁶ Añave cheya, yandeYa jee re jare nderé re, ¡yandeYa ko mbaetɨ omaeño repɨyere vaerä tugüɨ jare reyepɨ nde etei. Nabal rami toasa opaete jókuae nemotareɨ vae reta!

²⁷ Jare añave kuae mbota reta aru ndeve vae, toñemee kuimbae nderembiokuai reta pe.

²⁸ Che romoñera neɨ̈ro vaerä cheve kuae re. Echa yandeYa oyangarekota nderé jare neñemuña reta re, echa nde reñeraro yandeYa jee re. Jare reikove reiko ramboeve mbaetɨ ikavimbae oyekuaa nderé.

²⁹ Yepe tëi amogüe reta oyovaicho nderé jare oipota ndeyuka, ndeYa Tumpa ko oyangareko nderé, jae omombota nderovaicho reta, kia omombo ita tamamboka pe rami.

³⁰ Jare yandeYa ombopo ma yave opaete iporogüɨrökuavee nderé, jare neñono ma mburuvicharä Israel iñemuña reta re yave,

³¹ ngaraa reyembopɨaä ani ndepɨatɨtɨ reyuka jekombae vae re, ani nde aeño reyepɨ ndeyeupe vae re. Jare yandeYa iporerekua nderé yave, nemaendúa kuri che nderembiokuai re.

³² Jare David jei Abigail pe: —Toyemboete yandeYa Israel iTumpa, echa jae ndembou cherövaiti vaerä añave.

³³ Jare eyekou ndeyemongeta jupi vae re, nde cheopia ajata tëi apɨyere tugüɨ vae güi, ayepɨ vaerä che etei.

³⁴ Ërei yandeYa Israel iTumpa jee re, jae ko mbaetɨ omaeño ayapo vaerä ikavimbae vae peve, echa mbaetɨ yave mona nderangai reyu cherövaiti, pɨareve mbaetɨta tëi opɨta metei ave kuimbae jekove reve Nabal jo pegua reta.

³⁵ Jare David oipɨɨ chugüi opaete mbae güeru chupe vae, jare jei chupe: —Ekua ndepɨakatu reve nerëta pe, nde reecha ayandu ndeve ndeyemongeta rami, ayapo ndeve reiporu vae.

³⁶ Jare Abigail ou ime Nabal pɨri. Oecha jae oyapo arete mburuvicha guasu arete oyapo rami. Oyerovia katu oï jare osavaɨpo yae vi, jáeramo imiari chupe pɨareve pe ramo.

³⁷ Ërei pɨareve ndeimbove pe, Nabal mbaetɨ ma osavaɨpo yave, Abigail imiari kavi chupe mbae ko oasa vae re, jayave Nabal omano tëi jare jete jëogüe opɨta.

³⁸ Jare payandepo araa pe, yandeYa ombojeiete jare omano Nabal.

³⁹ Jare David oikuaa yave Nabal omano, jei: —¡Toyemboete yandeYa, echa jae oyepɨ cheve Nabal ikavimbae oyapo cheve vae re! ¡Jae chereepɨ ikavimbae ayapota tëi vae güi, Jare yandeYa etei oitɨ Nabal re jembiapo ikavimbae! Kuae jaɨkue rupi David omondo omomiari Abigail, güeru vaerä jae jembirekorä.

⁴⁰ Jare David jembiokuai reta yogüeru Carmel pe Abigail pɨri, jare jei reta: —David orembou ndépɨri rogüɨraja vaerä jembirekorä.

⁴¹ Jare Abigail opüa jare itindɨasɨ ɨvɨ re jei reve: —Mase, che jae ko David jembiokuai, tayeokuai chupe jembiokuai reta ipɨ ayoe vaerä.

⁴² Javoi Abigail oyupavo pandepo kuñatai reta oyeokuai chupe vae reta ndive, opo metei mburika re jare ojo David iñee jerajaa reta ndive, jare omenda David ndive.

⁴³ Jaeramiño vi David güɨreko Ahinoam, Jezreel pegua, jare mókoi reve yogüɨreko jembirekorä.

⁴⁴ Echa Mical Saúl tayɨ David jembireko, Saúl omee Palti, Lais taɨ Galim pegua pe.