1 SAMUEL 24 - Biblia Guarani Tumpa Iñee

¹ Saúl oyerova ye ma filisteo reta ndive oñeraroa güi yave, omombeu reta chupe David oime oï ñuu pe En-gadi pe.

² Jayave Saúl omboatɨ tres mil kuimbae Israel iñemuña reta güi oyeparavogüe, jare ojo oeka David jupiegua reta ndive ɨ̈vavira yavaetegüe kavara ñana rupigua reta yogüɨrekoa rupi.

³ Jare jókuae tape rupi ojo oväe metei vecha reta jókai pe yave, oike ɨvɨkuarusu oï joko pe vae pe omaña vaerä. David jare jupiegua reta ñogüɨnoi jókuae ɨvɨkua jugua pe.

⁴ Jayave David jupiegua kuimbae reta jei chupe: —Jae kuae ara yandeYa jei ndeve vae oyembopo: “Ameeta ndepo pe nderovaicho.” Eyapo chupe añave jaekavi ndeve vae. Jare David opüa jare kïrii ngatu reve ayasɨa Saúl jemimonde jembeɨ.

⁵ Kuae jaɨkue rupi David oyembopɨaä, Saúl jemimonde jembeɨ oyasɨa vae re.

⁶ Jare jei jupiegua reta pe: —¡YandeYa tacheövatu agüɨye vaerä ayapo mbae ikavimbae vae cheya pe! Jae ko mburuvicha guasu, ¡yandeYa oiparavogüe ko!

⁷ Jökorai David oyopia jupiegua kuimbae reta, mbaetɨ omaeño opüa Saúl re; jare Saúl oë ye ojo.

⁸ Kuae jaɨkue rupi David opüa vi jare oë ɨvɨkuarusu güi jare osapúkai omondo iñee Saúl pe, jei reve: —¡Cheruvicha guasu! ¡Cheruvicha guasu! Jare Saúl oyerova omae jaɨkue kotɨ yave, oecha David oyetavatɨka jare itindɨasɨ ɨvɨ re, jare omboete.

⁹ Jare David jei Saúl pe: —¿Maera pa rerovia kia reta iñee jei ndeve yave: “David ndemomburu oiko”?

¹⁰ Añave ndepuere reecha kërai yandeYa nemee tëi chepo pe, reike yave ɨvɨkuarusu pe, cherupiegua reta jei tëi cheve royuka vaerä, ërei cheɨ̈ro ndeve, echa jae cheyeupe: “¡Ngaraa amopüa chepo cheruvicha guasu re, echa yandeYa oiparavogüe ko!

¹¹ Emae, mase, ko anoi chepo pe nderemimonde jembeɨgüe, che ayasɨa, jare mbaetɨ royuka, echa ayemongeta kavi ndekotɨ jare mbaetɨ vi romomburu ani cheyoa ndekotɨ. Ërei nde chepïaro reiko, reipota cheyuka.

¹² ¡YandeYa tiñanejäa, jare jae toyeepɨ nderé cheve! Ërei che mbaetɨta amopüa chepo nderé.

¹³ Ndechi reta iñee arakuaa pegua jei rami: ‘Jeko kavimbae reta güi oë mbae ikavimbae.’ Jayave che ngaraai amopüa chepo nderé.

¹⁴ ¿Kia jaɨkue pa Israel iñemuña reta juvicha guasu ojo? ¿Kia pa oaɨkuemoña? ¡Che ko metei yaɨmba omanogüe vae rami, ani tüata (piki) rami!

¹⁵ YandeYa toiko ñanejäa vaerä ¡Jae toï omae vaerä añave kërai aï vae re, jae tachereepɨ ndegüi!”

¹⁶ Jare David opa yave kuae ñee jei, Saúl jei: —¡Nde yepe cheraɨ David! Jare Saúl täta oyaeo.

¹⁷ Jare jei David pe: —Jupi yae nde chegüi, che ayapota tëi ndeve ikavimbae vae, ërei nde remboekovia cheve ikavi vae pe.

¹⁸ Añave nde remboyekuaa cheve ndepɨakavi chekotɨ vae, echa mbaetɨ cheyuka yandeYa chemee ndepo pe yave.

¹⁹ Echa, ¿kia pa omaeñota jovaicho re ojoyepe vaerä? Jáeramo, ¡yandeYa tiporerekua nderé, reyapo ramo kuae ara ikavi vae cheve!

²⁰ Añave aikuaa kavi yae, nde reikota mburuvicha guasurä vae, jare ndepo pe mborookuaía imbaepuere yaeta Israel pe, ngaraa kia opɨ̈ro ndepo güi.

²¹ Añave yandeYa jee re erökuavee cheve, agüɨye tokañɨtei cheñemuña reta, agüɨye cheree tokañɨ.

²² Jayave David oñererökuavee yandeYa jee re Saúl pe, jare kuae jaɨkue rupi Saúl ou ye jëta kotɨ, jare David jupiegua reta ndive yogüɨraja ye ñepɨ̈roka kotɨ.