1 SAMUEL 23 - Biblia Guarani Tumpa Iñee

David oepɨ tëta guasu Keila

¹ Jayave oikuaauka reta David pe jei reve: “Filisteo reta opüa Keila re, jare opɨ̈ro reta trigo oyepoo ramo oyemboatɨ oï vae.”

² Jare David oparandu yandeYa pe jei reve: —¿Ajata pa añeraro filisteo reta ndive? Jare yandeYa jei chupe: —Ekua eñeraro jare eepɨ tëta guasu Keila.

³ Ërei jae ndive ñogüɨnoi vae reta jei David pe: —Mase, kuae Judá pe roï vae reta rokɨɨye, jayave Keila pe rojo vaerä rokɨɨye yaeta ko roñeraro filisteo reta ndive.

⁴ Jayave David oparandu ye yandeYa pe, jare yandeYa jei: —Epüa jare ekua Keila pe, che ameeta ndepo pe filisteo reta.

⁵ Jayave ojo David jare kuimbae reta jae ndive ñogüɨnoi vae ndive Keila kotɨ, jare oñeraro filisteo reta ndive. Omoamɨri ete kavi, opa güɨraja jɨmba reta chugüi. Jökorai David oepɨ Keila pegua reta.

⁶ Abiatar, Ahimelec taɨ otekuarai ojo oñemoïru vaerä David ndive Keila pe yave, güɨraja ipo pe temimonde iyɨvambae sacerdote pegua.

⁷ Jare Saúl pe oikuaauka reta David oime tëta Keila pe vae yave, jei: “Tumpa omee chepo pe echa oike tëta guasu jöke oyeokenda vae japɨpe pe.”

⁸ Javoi Saúl omboatɨ opaete isundaro reta yogüɨraja vaerä Keila kotɨ oipɨɨ David, jare jae ndive kuimbae reta ñogüɨnoi vae.

⁹ Ërei David oikuaa yave Saúl oyemongeta kaviä ikotɨ, jei sacerdote Abiatar pe, güeru vaerä temimonde iyɨvambae sacerdote pegua oparandu vaerä Tumpa pe.

¹⁰ Jare David jei: —CheYa Israel iTumpa, che nderembiokuai aendu Saúl opüata kuae tëta Keila re omokañɨtei vaerä che chereko pegua.

¹¹ ¿Keila pegua reta chemeeta pa jae ipo pe? ¿Outa pa Saúl aikuaa aï rami? ¡Romoñera cheYa Israel iTumpa, emombeu cheve! Jare yandeYa jei chupe: —Saúl outa.

¹² Javoi David oparandu chupe: —¿Chemeeta pa Keila pegua reta Saúl ipo pe? ¿Che jare cherupiegua reta? Jare yandeYa jei: —Pemeeta jae ipo pe.

¹³ Jayave David jare jupiegua seisciento kuimbae ndive, ñogüɨnoe Keila güi, jare oguata yogüɨreko. Saúl oikuaa David otekuarai ma Keila güi vae, jare mbaetɨ ma oporepeña Keila re.

David oiko ñuu pe

¹⁴ Jare David opɨta ñuu Zif jee vae pe, ɨvɨtɨ raɨ re ñepɨ̈roka oï vae pe, Saúl oeka ara ñavo, ërei Tumpa mbaetɨ omee chupe.

¹⁵ David okɨɨye oiko Saúl güi, echa oeka oyuka vaerä. Jáeramo opɨta oiko Hores pe ñuu Zif pe.

¹⁶ Jare Jonatán Saúl taɨ opüa ou Hores pe David oïa pe, jare omoäta ngatu Tumpa jee re,

¹⁷ jei chupe: —Agüɨye ekɨɨye, echa cheru Saúl ngaraa neväe. Nde ko reikota mburuvicha guasurä Israel pe, jare ndeɨvɨriguarä che aikota. Kuae re cheru oikuaa ko oï.

¹⁸ Jare oyapo reta morogüɨrökuavee päve yandeYa jee re, kuae jaɨkue rupi, David opɨta Hores pe, jare Jonatán ou ye jëta kotɨ.

¹⁹ Jare Zif pegua reta yogüɨraja Gabaa pe imiari vaerä Saúl pe, jei reta: —David oime oñemi oï ɨ̈vavira Hores re, ɨvɨtɨ Haquila iyapɨ re, arayevɨ kotɨ.

²⁰ Jáeramo, mburuvicha guasu roe ndeve ekua jarembae voi, nde reipota rami, jare romeeta ndepo pe.

²¹ Jare Saúl jei: —YandeYa tiporerekua peré, echa pe reta cheparareko.

²² Añave pekua jare peikuaa kavi kia pe oñemi oï vae, jare kia ko oecha vae, echa imiari reta cheve, kërai jae ipoki yae oñemi vaerä.

²³ Pemae kavi jese kerupi rupi oñemi vae re, jare peyu ye pemombeu kavi cheve, aja vaerä pe ndive, jare jae oime yave oï joko pe, che taeka opaete ɨvɨ Judá rupi.

²⁴ Jare jae reta opa ye yogüɨraja Zif kotɨ Saúl oïa güi. Ërei David jare jupiegua kuimbae reta, opa ma yogüɨraja tëta Maón iñuu pe Arabá pe, arayevɨ kotɨgua pe.

²⁵ Jare Saúl ojo kuimbae jupiegua reta ndive, oeka vaerä David. Ërei David oikuaa yave ogüeyɨ ɨ̈vavira güi jare ojo opɨta Maón iñuu pe. Saúl oikuaa yave ojo David jaɨkue Maón iñuu kotɨ.

²⁶ Jare ɨvɨtɨ iyɨ́vɨri rupi Saúl ojo isundaro reta ndive, jare jókuae ɨvɨtɨ ikupe rupi David ojo jupiegua reta ndive, ojoyepe vaerä Saúl güi, ërei Saúl jare isundaro reta oikëse David jupiegua reta ndive oipɨɨ vaerä.

²⁷ Jayave ou metei ñee jerajaa omombeu Saúl pe, jei: —¡Eyu jarembae! Echa filisteo reta oike opɨ̈ro vaerä ñanerëta.

²⁸ Jayave Saúl mbaetɨ ma oaɨkuemoña David, ojo oñeraro filisteo reta ndive, kuae jeko pegua ombojee reta joko pe Sela-hama-lecot.

David iñɨ̈ro Saúl pe

²⁹ Joko güi David ojo oiko ñepɨ̈roka oï En-gadi pe vae rupi.