1 SAMUEL 22 - Biblia Guarani Tumpa Iñee

¹ Jayave David ojo joko güi, jare otekuarai ɨvɨkua Adulam pe oï vae kotɨ, tɨkeɨ reta jare opaete jëtara reta oikuaa yave kuae re, yogüeru reta ípɨri.

² Jare oyemboatɨ jae ndive opaete oiporara yae vae, mbia güɨnoi vae, mbaetɨ ipɨakatu yogüɨreko vae; kuae reta oñono juvicharä. Oupitɨ ñogüɨnoi jae ndive cuatrociento kuimbae reta.

³ Joko güi David ojo Mizpa, Moab pegua pe, jare jei mburuvicha guasu Moab pegua pe: —Romoñera remaeño vaerä aeya cheru jare chesɨ pe reta ndive, aikuaa regua mbae ra ko oyapota Tumpa cheve.

⁴ Jare güeru reta mburuvicha guasu Moab pegua jóvai, jare yogüɨreko joko pe David oiko ramboeve ñepɨ̈roka pe.

⁵ Ërei ñeemombeúa Gad jei David pe: —Agüɨye epɨta kuae ñepɨ̈roka pe, epüa jare ekua ɨvɨ Judá pe. Jökorai David ojo, jare ou oike kaa Haret pe.

Saúl oyukauka sacerdote reta Nob pegua

⁶ Saúl oguapɨ oï ɨvɨra tamarisco jee vae iküaraɨa igüɨ pe, mbaemboete renda ɨvɨtɨ re Gabaa pe oï vae pe, jae güɨnoi imii ipo pe jare iyɨvɨrigua reta ñogüɨnoi iyɨ́vɨri. Saúl oikuaa kavi David jare jembiokuai reta regua yave,

⁷ jei jembiokuai iyɨ́vɨri ñogüɨnoi vae reta pe: —Peyeapɨsaka Benjamín iñemuña reta. ¿Perovia pa Isaí taɨ omeeta peve ɨvɨ jare uvarupa?, ani ¿peñonota ra peiko vaerä mil vae ani cien vae juvicharä?

⁸ Opaete pe reta peyovaicho cheré, jare mbaetɨ etei pemombeu cheve cheraɨ ko oñemoïru Isaí taɨ ndive vae, mbaetɨ etei kia yepe ipɨatɨtɨ cheré, jare pemombeuä cheve cheraɨ omopüa cherembiokuai cherovaichorä, añave rupi oï rami.

⁹ Jayave Doeg Edom pegua oï Saúl jembiokuai reta itenondegua ipɨte pe jei: —Che aecha Isaí taɨ ou Nob pe, Ahimelec, Ahitob taɨ pɨri.

¹⁰ Jare jae oparandu yandeYa pe jesegua, omee tembíu chupe jare filisteo Goliat ikɨsepukugüe.

¹¹ Jare mburuvicha guasu Saúl omondo oenɨiuka sacerdote Ahimelec, Ahitob taɨ jare opaete jëtara reta, jare opaete sacerdote ñogüɨnoi Nob pe vae. Jare opaete yogüeru reta mburuvicha guasu oïa pe.

¹² Jayave Saúl jei Ahimelec pe: —Ahitob taɨ, eyeapɨsaka añave. Jare jae jei: —¡Ko aï cheruvicha!

¹³ Jare Saúl jei chupe: —¿Maera pa nde jare Isaí taɨ peyovaicho cheré? Nde remee chupe mbɨyape jare kɨsepuku, jare reparandu jese yandeYa pe, oyemboyovaicho vaerä chekotɨ jare chemomburu vaerä.

¹⁴ Jayave Ahimelec jei mburuvicha guasu pe: —¿Kia nunga pa ndeɨvɨrigua reta güi jupi yae David rami, nderovaya vi, oyeokuai ndeve vae, jare imboetea vae ndero pe?

¹⁵ ¿Ani jaeramo yera aparandu yandeYa pe jese? ¡Mbaetɨ ko jökorai! Agüɨye chemboeko jare agüɨye vi emboeko cherëtara reta, echa che nderembiokuai mbaetɨ aikuaa kërai yepe kuae teko regua.

¹⁶ Ërei mburuvicha guasu jei: —¡Eikuaa kavi kuae re, nde jare opaete nerëtara reta ndive pemanota!

¹⁷ Jayave mburuvicha guasu jei jembiokuai reta pe: —¡Peyuka yandeYa isacerdote reta! Echa jae reta vi oñemoïru David ndive, jae reta oikuaa tëi David otekuarai oiko chegüi, ërei mbaetɨ omombeu reta cheve. Ërei Saúl jembiokuai reta mbaetɨ oipota oyuka yandeYa isacerdote reta.

¹⁸ Jayave mburuvicha guasu jei Doeg Edom pegua pe: —¡Nde eyuka kuae sacerdote reta! Jayave jae jókuae ara oyuka ochenta y cinco sacerdote.

¹⁹ Jare sacerdote reta jëta Nob jee vae pe oike reta, jare oyuka kuimbae reta, kuña reta, michia okambuño vae reta, güeye, mburika jare vecha reta, opaetei oyuka kɨsepuku pe.

²⁰ Ërei metei Ahimelec taɨ, Ahitob jɨmɨmino Abiatar jee vae, ojoyepe mano güi, jare otekuarai David oïa kotɨ.

²¹ Jare Abiatar imiari David pe; kërai Saúl opa oyukauka yandeYa isacerdote reta Nob pegua vae.

²² Jare David jei Abiatar pe: —Echa jókuae ara oï joko pe Doeg Edom pegua yave, oikuaa voi ko imiarita Saúl pe vae. Chereko pegua ko omano opaete nerëtara reta.

²³ Ërei nde epɨta che ndive, agüɨye ekɨɨye, jókuae oipota ndeyuka vae che oipota vi ko cheyuka, ërei che ndive ngaraa mbae reasa.