1 SAMUEL 21 - Biblia Guarani Tumpa Iñee

David otekuarai Saúl güi

¹ David ojo tëta Nob pe, sacerdote Ahimelec pɨri; jare Ahimelec ipɨakañɨ yae oecha yave, jare jei chupe: —¿Maera pa reyu ndeño etei, jare mbaetɨ kia ou nde ndive?

² Jare David jei sacerdote Ahimelec pe: —Mburuvicha guasu cheokuai metei mbae re, jei cheve: Agüɨye etei kia ave toikuaa mbae re ko che royókuai romondo aï vae; jare che amombeu sundaro reta pe, kia pe cheräro vaerä.

³ Añave, ¿oime pa mbae yau vae renoi? Emee cheve pandepo mbɨyape, ani oipotagüe mbae renoigüe.

⁴ Jare sacerdote jei David pe: —Mbaetɨ anoi mbɨyape oipotagüeño chepo pe, jaeño oime anoi mbɨyape oñeñono tee Tumpa pe vae; ërei ameeta ndeve, ndesundaro reta okeä ko kuña reta ndive yave.

⁵ Jare David jei sacerdote pe: —Añetete, kárumbo jare kárumbo ïrugüe pe ma mbaetɨ etei roya orerembireko re; che aë yave kuae taɨrusu vae reta mbaetɨ ma oke kuña ndive, yepe tëi kuae royu vae mbaetɨ Tumpa pe royeokuai vaerä; vɨtei pa añave mbaetɨ ko ikɨa ñogüɨnoi Tumpa jóvai.

⁶ Jökorai sacerdote omee chupe mbɨyape oñeñono tee vae, echa joko pe mbaetɨ ïru mbɨyape, jaeño mbɨyape mbaemboete pegua, kuae reta opa oyeekɨ yandeYa jóvai güi, oñeñono ye vaerä mbɨyape jakugüe, jókuae opa oyeekɨgüe jekovia pe.

⁷ Jókuae ara oï joko pe, metei Saúl jembiokuai Doeg jee vae Edom pegua, vecha iyangarekoa reta itenondegua.

⁸ Jare David jei Ahimelec pe: —¿Mbaetɨ pa renoi mii ani kɨsepuku kuae pe? Echa mburuvicha guasu iporookuai jarembae pegua yae jeko pegua, mbaetɨ omee aeka vaerä chekɨsepuku ani cherembiporu ñeraro pegua yepe.

⁹ Jare Sacerdote jei chupe: —Oime anoi Goliat filisteo ikɨsepukugüe, nde reyuka ɨvɨtɨ päu Ela pe vae. Oime oï temimonde iyɨvambae sacerdote pegua ikupe pe, oñeoma oï asoya pe. Jókuae ndepuere reraja echa mbaetɨ yé ïru anoi. Jayave David jei: —Emee cheve, echa mbaetɨ yé ïru jókuae nunga.

¹⁰ Jare David opüa jókuae ara, jare otekuarai Saúl güi jare ojo Aquis jee vae pɨri, jae ko mburuvicha guasu Gat pegua.

¹¹ Jare iyɨvɨrigua reta jei chupe: —¿Jaeä yera kuae David, Saúl jembiokuai kuae pegua mburuvicha guasu? ¿Chupeä yera otairari vae reta opɨrae jei reve: “Saúl oporoyuka mil rupi jare David oporoyuka diez mil rupi?”

¹² Jare David oikuaa opaete kuae imiari reta ñogüɨnoi vae re, jare okɨɨye Aquis mburuvicha guasu Gat pegua güi.

¹³ Jáeramo oipoepɨ jeko jae reta jóvai, imbokere vaeecha oyeapo jae reta ipɨte rupi, opa oikuatía tía öke, jare omaeño jendɨayɨ osɨrɨ jendɨvaa rupi.

¹⁴ Jayave Aquis jei iyɨvɨrigua reta pe: —Pe reta peecha ko kuae kuimbae imbokere, ¿Maera pa peru cheve?

¹⁵ ¿Oata pa imbokere vae cheve, jare peru kuae oyapo vaerä jae jeigüe cheróvai? ¿Oiketa pa kuae nunga chero pe?