1 SAMUEL 19 - Biblia Guarani Tumpa Iñee

Saúl omomburu oyuka vaerä David

¹ Saúl omomiari taɨ Jonatán jare opaete jembiokuai reta oyuka reta vaerä David. Ërei Jonatán oaɨu yae David ramo,

² omondo omombeu David pe jei reve: —Cheru Saúl oipota ndeyuka, jayave eyeandu pɨareve ndeimboveasɨ, eñemi ketɨ yayekuaambaeä pe.

³ Che ajata cheru ndive jókuae reñemi reïa rupi. Chemiarita nderé cheru pe, oime yave mbae jei amombeuta ndeve.

⁴ Jare Jonatán omomiari kavi tu Saúl, David re, jei: —Agüɨye ndeyoa nderembiokuai David re, echa jae mbaetɨ mbae ikavimbae oyapo ndeve, jaeño ma oyeokuai kavi ndeve.

⁵ Jae oñemoëgua ko mano pe oyuka yave filisteo Goliat, jare yandeYa güɨroasayepe Israel iñemuña reta jókuae ara jovaicho reta güi, nde etei reecha jare reyerovia remae jese. ¿Maera pa reipota reyuka jekombae reve? ¿Remomburu David mbaetɨ reve oñeväe teko jese?

⁶ Jare Saúl oendu Jonatán jeigüe yave jei Tumpa jee re: —YandeYa oikove vae jee re, jae ngaraa omano.

⁷ Jayave Jonatán oenɨi David, jare omombeu chupe opaete jókuae ñee reta. Jare jae etei güɨraja ye David, Saúl oïa pe, jökorai oiko ye ípɨri, tenonde oyeokuaise rami.

⁸ Kuae jaɨkue rupi oiko ye ñeraro, jare David ojo ye oñeraro filisteo reta ndive, jeta oporoyuka jare opa ombotekuarai.

⁹ Jare Tumpa omaeño ou espíritu ikavimbae vae Saúl re oguapɨ oï yave jo pe, jae güɨnoi ipo pe mii David ombopu ramboeve arpa.

¹⁰ Saúl oipota tëi oikutu David mii pe ovapetea re, ërei David ombóguai jare mii oyeatɨka ovapetea rei. Jókuae pɨ̈tu David otekuarai jare ojo.

¹¹ Saúl omondo ñee jerajaa reta David jëta pe, oäro reta vaerä jare oyuka vaerä ndeimbove yave. Ërei jembireko Mical omombeu David pe jei reve: —Mbaetɨ yave kuae pɨ̈tu retekuarai, ndeimbove remanota.

¹² Jayave Mical ombosagüɨu omoë David ventana rupi o güi, jökorai David otekuarai, jare ojoyepe.

¹³ Javoi Mical oipɨɨ mbae iägüe omboyapakua tupa pe, jare kavara jaagüe oñono iñäkarä, jare omboyasoi oñono.

¹⁴ Jare Saúl ombou yave ñee jerajaa oipɨɨ vaerä David, Mical omombeu chupe reta, imbaerasɨ ko oï.

¹⁵ Ërei Saúl omondo ye ñee jerajaa reta omae vaerä David re, jei chupe reta: —¡Yepe tëi toï jupa pe, pevoɨ peru cheve, jare tayuka!

¹⁶ Jayave oike reta yave David jo pe, oecha reta mbae iägüeño oï tupa pe, jare iñäkarä güɨnoi kavara jaagüe.

¹⁷ Jókuae re Saúl jei Mical pe: —¿Maera pa körai chembotavɨ, jare remaeño ojoyepe cherovaicho? Jare Mical jei: —Echa jae jei cheve, cheyukata mbaetɨ yave amaeño ojo.

¹⁸ David otekuarai jare ojoyepe, jare ojo oväe Samuel pɨri Ramá pe, jare imiari chupe opaete Saúl oyapo chupegüe vae. Javoi yogüɨraja Samuel ndive oñemoëta Naiot pe.

¹⁹ Jare Saúl oikuaa David oime oï Naiot pe Ramá pe yave,

²⁰ Saúl omondo iñee jerajaa reta güeru vaerä David, jare kuae reta oecha metei atɨ ñeemombeúa reta omombeu Tumpa iñee ñogüɨnoi, Samuel oï joko pe tenonde chupe reta, jare ogüeyɨ vi Tumpa iespíritu jókuae ñee jerajaa reta re jare jae reta vi omombeu Tumpa iñee.

²¹ Saúl oikuaa yave kuae re, omondo ïru ñee jerajaa reta, jare jae reta vi omombeu Tumpa iñee. Ërei Saúl omondo ye mboapɨa ma iñee jerajaa reta, jare jae reta vi omombeu Tumpa iñee.

²² Jayave jae etei ojo Ramá pe, jare ojo oväe yave ɨkua guasu Secú pe oï vae pe, oparandu Samuel re jare David re. Jare metei omombeu chupe jei reve: “Oime ñogüɨnoi Naiot Ramá pe.”

²³ Jare ojo jokotɨ. Jare ogüeyɨ vi jese Tumpa iespíritu, jare oguata reve omombeu Tumpa iñee, ojo regua oväe Naiot Ramá pe.

²⁴ Jare omboi jemimonde jare omboɨpɨ omombeu Tumpa iñee, ïru reta rami Samuel jóvai, opaete jókuae ara jare jókuae pɨ̈tu, joko güi oë kuae ñee “¿Saúl vi yera ñeemombeúa?”