1 SAMUEL 15 - Biblia Guarani Tumpa Iñee

Saúl iñeereenduä jare oñereröɨrouka

¹ Jaɨkue rupi Samuel jei Saúl pe: —YandeYa ko cheokuai roparavo yave mburuvicha guasurä, jëta imbae vae Israel iñemuña reta re; jáeramo añave, eïndaivi reendu vaerä yandeYa iñee amombeuta ndeve vae.

² Körai jei yandeYa imbaepuere yae ete vae: “Che aiporaraukata Amalec iñemuña reta oyapo Israel iñemuña reta pe vae re, echa oë oyovaicho jese tape rupi, Egipto kotɨ güi yogüeru yogüɨreko yave.

³ Jáeramo, ekua eporepeña Amalec iñemuña reta re, jare opa emboai opaete mbaembae güɨnoi vae, agüɨye nepïri jese reta; eyuka kuimbae reta, kuña reta, michia reta, jare oa ramo vae reta ave, guaka reta, vecha reta, camello reta jare mburika reta.”

⁴ Jayave Saúl omboatɨ opaete isundaro reta Telaim pe, omae jare oipapa kavi, jare opaete reve dosciento mil Israel kotɨgua pegua ñemuña jare diez mil Judá kotɨgua.

⁵ Jare Saúl ojo Amalec iñemuña reta jëta guasu kotɨ, jare oñemi kavi ɨvɨtɨ päu ipe kavi vae pe.

⁶ Jare Saúl jei ceneo reta pe: —¡Pesɨrɨ jare peë Amalec iñemuña reta ipɨte güi agüɨye vaerä pomokañɨtei jae reta ndive, echa pe reta pemboyekuaa peporoparareko Israel iñemuña reta kotɨ yogüeru reta yave Egipto güi! Jayave ceneo reta asɨrɨ Amalec iñemuña reta güi.

⁷ Jare Saúl omboɨpɨ oñeraro Amalec iñemuña reta ndive, Havila güive Shur jee vae kotɨ, Egipto güi kuaraɨ oëa kotɨ oï vae jare opa omoamɨri.

⁸ Jare oipɨɨ jekove reveño Agag, Amalec iñemuña reta juvicha guasu, ërei oyuka opaete isundaro reta kɨsepuku pe.

⁹ Jare Saúl jare isundaro reta mbaetɨ oyuka Agag, jare vecha ikavigüe reta, jare mɨmba tuichagüe reta, jare mɨmba oyemongɨragüe reta, jare vecha kuimbae reta, jare opaete mbaembae ikavigüe, mbaetɨ oipota reta opa omboai; ërei opaete mbae ikavimbae jare pɨ̈chɨi vae reta opa omboai.

¹⁰ Jare yandeYa jei Samuel pe, körai:

¹¹ —Chembopɨatɨtɨ Saúl añono ramboeve mburuvicha guasurä, echa opia chegüi, jare mbaetɨ oyapo jaegüe. Jare Samuel ipɨatɨtɨ yae, oyerure yandeYa pe opaete jókuae pɨ̈tu omoñera reve.

¹² Samuel opüa ndei köe mbove ojo vaerä oñoövaiti Saúl ndive; jare omombeu reta Samuel pe, körai: Saúl ou Carmel pe, jare joko pe omopüa ita iyeupe, jókuae oporomoamɨri vae regua; jare oyerova joko güi oasa ojo Gilgal kotɨ.

¹³ Jare Samuel ou Saúl pɨri, jare Saúl jei chupe: —YandeYa tiporerekua nderé; che ayapo yandeYa iñee jei vae.

¹⁴ Jayave Samuel jei: —¿Aipoa vecha iñee jare guaka iñee aendu aï vae pa mbae?

¹⁵ Jare Saúl jei: —Amalec iñemuña reta güi ko güeru reta; echa sundaro reta iñɨ̈ro vecha jare guaka ikavigüe pe, ndeYa Tumpa pe oyeyuka oñemee vaerä, ërei ïru reta opaetei romokañɨtei.

¹⁶ Jayave Samuel jei Saúl pe: —¡Nekïrii, tachemiari ndeve yandeYa jei cheve pɨare vae re! Jare jae jei: —¡Nemiari!

¹⁷ Jare Samuel jei: —¿Yepe tëi michi yae viña remae ndeyé reveä pa, reiko Israel pegua ñemuña reta itenondeguarä? YandeYa ko ndeparavo mburuvicha guasurä Israel iñemuña reta re.

¹⁸ Jare yandeYa ndeokuai ndemondo, jare jei: “Ekua, emboai opaete Amalec iñemuña reta, eñeraro jae reta ndive opa remboai regua, iyoa reta jeko pegua.”

¹⁹ ¿Maera pa reenduä yandeYa iñee? Nderovaicho reta imbaembae re reyemombae, reyapo ikavimbae yandeYa jesa róvai.

²⁰ Jare Saúl jei Samuel pe: —Aendu ko yandeYa iñee, jare aja ayapo cheokuai vae, jare aru Agag mburuvicha guasu Amalec pegua, jare opa amboai Amalec iñemuña reta.

²¹ Ërei sundaro reta oipɨɨ vecha reta jare guaka reta ikavigüe, jókuae yepopeyu oï jese vae güi; Gilgal pe omee vaerä mɨmba oyeyukagüe ndeYa Tumpa pe.

²² Jayave Samuel jei: “¿Oyerovia yae pa yandeYa mɨmba reta oyeyukagüe opaetei oyeapɨ vae re, jare mɨmba reta oyeyuka vae re, iñeerendu katu vae re rami? Añetete, ñeereendu katu ko ikavi yae mɨmba reta oyeyukagüe güi, jare yeapɨsaka katu vecha kuimbae reta ikɨragüe güi.

²³ Echa mbaekuaa rupi mbae maratuta vae re oikuaa vae iyoa rami ko ipɨapochɨ vae iyoa; tumpa-raanga omboete vae rami ko iñeereendumbae. Nde reröɨro yandeYa iñee jeko pegua, jae ñereröɨro vi agüɨye vaerä reiko mburuvicha guasurä.”

²⁴ Jayave Saúl jei Samuel pe: —Ayapo mbaeyoa; echa ayavɨ yandeYa iporookuai reta jare neñee reta, echa akɨɨye ramo opaete vae güi jare amborɨ katu jae reta iñee. Neɨ̈ro cheve añave cheyoa re,

²⁵ jare yaja che ndive amboete vaerä yandeYa.

²⁶ Jare Samuel jei Saúl pe: —Ngaraa ma aja nde ndive; echa reröɨro yandeYa iñee, jare yandeYa nereröɨro ma agüɨye vaerä reiko mburuvicha guasurä Israel iñemuña reta re.

²⁷ Jare Samuel oyerova ma ojo vaerä yave, jae oipɨɨ jemimonde jembeɨ pe, jare osoro chupe.

²⁸ Jayave Samuel jei chupe: —Körai yandeYa omondoro añave ndeporookuaía Israel iñemuña reta güi, jare omee metei nerëtaɨgua pe, jeko kavi yae ndegüi vae pe.

²⁹ Jare Tumpa Israel iyemboetea ngaraa iyapu jare ngaraa vi oipoepɨ iyemongeta, echa jae mbaetɨ ko kuimbae rami oipoepɨ vaerä iyemongeta.

³⁰ Jare jei: —Ayapo mbaeyoa. Ërei romoñera chemboete vaerä mburuvicha rami Israel iñemuña reta jóvai jare itenondegua reta jóvai, jare eyu che ndive amboete vaerä ndeYa Tumpa.

³¹ Jare Samuel ojo Saúl ndive, jare Saúl omboete yandeYa.

³² Jaɨkue rupi Samuel jei: —Peru cheve Agag, mburuvicha guasu Amalec pegua. Jare Agag ou Samuel jóvai oyerovia reve jare jei iyeupe: “Oasa ma mano jasɨ katu yae vae.”

³³ Jare Samuel jei: —Ndekɨsepuku pe reeya jeta kuña reta imembɨmbae, jökoraita opɨta ndesɨ imembɨmbae ïru reta ipɨte pe. Jayave Samuel opa oyasɨa sɨa Agag yandeYa jóvai Gilgal pe.

³⁴ Javoi jaɨkue rupi Samuel ojo Ramá pe, jare Saúl ojo jëta kotɨ Gabaa pe.

³⁵ Kuae jaɨkue rupi mbaetɨ ye Samuel oecha Saúl opaete oikove oiko ramboeve. Samuel oäpiro Saúl, jare yandeYa ipɨatɨtɨ oñono ramo Saúl mburuvicha guasurä Israel iñemuña reta re.