1 SAMUEL 12 - Biblia Guarani Tumpa Iñee

Samuel oñemoñee tëta pegua reta pe

¹ Jayave Samuel jei opaete Israel iñemuña reta pe: —Mase, aendu jare ayapo opaete pere cheve vae, jare añono peve peruvicha guasurä.

² Añave, ko oï peruvicha guasu pereroata vaerä. Che chendechi ma, ërei cheraɨ reta ñogüɨnoi pe reta ndive, che aiko pe reta ndive chetaɨrusu güive añave regua, kuae ara.

³ Ko, aï peróvai: Oime yave apɨ̈ro kia igüeye, ani imburika, ani cheñee ndaye kia re, ani aiporarauka kia pe, ani aipɨɨ vɨari korepoti mbae re, pepuere chemboeko yandeYa jóvai jare mburuvicha guasu jóvai; jare tamboepɨ jókuae ayapogüe.

⁴ Jayave jae reta jei chupe: —Mbaetɨ etei mbae ikavimbae reyapo oreve, mbaetɨ reiporarauka oreve, jare mbaetɨ vi korepoti reipɨɨ vɨari pe, ani ïru mbae kuimbae reta ipo güi.

⁵ Jare jae jei chupe reta: —YandeYa jare mburuvicha guasurä peiparavo vae jovake mbaetɨ peväe teko cheré. Jare jae reta jei chupe: —¡Jökorai ko!

⁶ Jayave Samuel jei opaete vae pe: “YandeYa oenɨi Moisés jare Aarón vae, jare peñemuñagüe reta güɨnoe ɨvɨ Egipto güi vae, jae toï oecha vaerä yandeve añave.

⁷ Añave peyeapo katu, ayoakata pe reta ndive yandeYa jóvai, jae iporoparareko pekotɨ vae re jare peñemuñagüe reta kotɨ vae re.

⁸ Jacob oike ɨvɨ Egipto pe yave, peñemuñagüe reta osapúkai yandeYa kotɨ oiporara reta yave, yandeYa ombou Moisés jare Aarón, jare jae reta güɨnoe peñemuñagüe reta Egipto güi, jare güeru oñono reta kuae ɨvɨ pe.

⁹ Ërei jae reta iñakañɨ iYa Tumpa güi, jare jae omee sundaro ruvicha Sísara Hazor pegua ipo pe, filisteo reta ipo pe, jare mburuvicha guasu Moab pegua ipo pe; kuae reta oñeraro jae reta ndive.

¹⁰ Jare jae reta güɨroäse jare jei reta yandeYa pe: ‘Oreyoa echa rosɨrɨ ndegüi oreYa jare romboete tumpa-raanga Baal reta jare Astarot, orereepɨ orerovaicho reta ipo güi, jare toroyeokuai ndeveño.’

¹¹ Jayave yandeYa ombou Jerobaal, Barac, Jefté jare Samuel pereepɨ vaerä perovaicho reta peɨ́vɨri ñogüɨnoi vae güi, jare peiko pɨagüive kuae ɨvɨ pe.

¹² Ërei peecha oporepeña peree mburuvicha guasu Nahas Amón pegua yave, peiporu cheve peruvicha guasurä, pereroata vaerä, oime reve peYa Tumpa peruvicha guasurä.

¹³ Añave, ko oï mburuvicha guasu peiparavogüe, pe reta peiporu vae; yandeYa oñono peve peruvicha guasurä vae.

¹⁴ Añave, peipoɨu yandeYa güi yave, peyeokuai yave chupe jare peendu iñee jare peyapo katu yave jae iporookuai, pe reta peruvicha guasu, jayave peiko kavita.

¹⁵ Ërei mbaetɨ peyapo yandeYa iporookuai yave, peñeereenduä yandeYa kotɨ yave, jae oiporaraukata peve jare peruvicha guasu pe, peñemuñagüe reta pe oiporarauka rami.

¹⁶ Jayave peäro, agüɨye pekua räri, pemae, jare peechata kuae mɨakañɨ tuicha vae yandeYa oyapota peresa róvai vae.

¹⁷ Añave, trigo yagüɨye iara ko. Ërei ayerureta yandeYa pe, jare jae ombouta ama jare ararɨapu, peikuaa vaerä tuicha yae ko ikavimbae peyapo peiporu ramboeve peruvicha guasurä.”

¹⁸ Jare Samuel oyerure yandeYa pe, jare yandeYa ombou omongɨ jare ararɨapu, jare opaete vae okɨɨye yae yandeYa güi jare Samuel güi.

¹⁹ Jayave opaete vae jei Samuel pe: —Eyerure yandeYa pe ore nderembiokuai reta re agüɨye vaerä romano; echa romoïru yé oreyoa reta roiporu kuae mburuvicha guasu vae pe.

²⁰ Jare Samuel jei chupe reta: —Agüɨye pekɨɨye. Peyapo ko opaete ikavimbae, ërei agüɨye peyerova yandeYa güi, peyeokuai chupe opaete pepɨa ndive.

²¹ Agüɨye pemboete tumpa-raanga, echa mbaetɨ ipuere oporomborɨ ani oporoepɨ echa jaangaño ko.

²² Echa yandeYa, jae jee re ngaraa oeya imbae vae reta; echa yandeYa oipota pe reta peiko jae imbaerä.

²³ YandeYa tachemborɨ agüɨye vaerä ayerure poi peré, pomboe aveita peguata kavi vaerä jupi rupi.

²⁴ Jaeño peipoɨu yandeYa güi, peyeokuai kavi chupe añete rupi opaete pepɨa ndive, pemaendúa jeta mɨakañɨ tuicha vae oyapo peve vae re.

²⁵ Ërei ngatu peapɨäño yave peyapo ikavimbae, pekañɨteita peruvicha guasu ndive.