1 SAMUEL 10 - Biblia Guarani Tumpa Iñee

Samuel oiparavo Saúl mburuvicha guasurä

¹ Jayave Samuel oipɨɨ metei asaite jɨru jare opɨyere Saúl iñäka re, jare oovapɨte, jei reve chupe: —YandeYa ndeparavo imbae vae Israel iñemuña reta juvicha guasurä.

² Añave, reo ma cheɨpɨ güi yave, reväeta mókoi kuimbae reta Raquel jɨvɨa iyɨpɨ pe, Benjamín iñemuña reta iɨvɨ pe, Selsa jee vae pe. Jae reta jeita ndeve jókuae mburika reta reo reeka vae opa ma oñeväe ye; nderu mbaetɨ ma ipɨatɨtɨ jókuae re; añave perei ma ipɨaä oï, jei reve: “Mbae ra ko ayapota cheraɨ kotɨ.”

³ Javoi joko güi reasa kutɨ katu, reo reväe ɨvɨra encinarupa Tabor pe oïa pe yave, nerövaitita mboapɨ kuimbae reta Bet-el kotɨ yogüɨraja omboete vaerä Tumpa vae; metei güɨraja mboapɨ kavara kuimbae taɨrusu vae, ïru güɨraja mboapɨ mbɨyape, jare kuimbae mboapɨa güɨraja metei jɨru vino.

⁴ Jókuae reta opa oyapo maraetei ndeve güire, omee retata ndeve mókoi mbɨyape, jókuae eipɨɨ chugüi reta.

⁵ Jókuae jaɨkue rupi reota reväe Tumpa iɨvɨtɨ re, sundaro filisteo reta jeyupa güɨnoia pe; jare reike jókuae tëta pe yave, reövaitita mbovɨ ete ñeemombeúa reta yogüeru ɨvɨtɨ mbaemboete renda güi vae, jae reta jenonde yogüɨrajata ngitara imbopúa, angúa raɨ, jare mimbɨ imoñeea jare arpa imbopúa reta, jare jae reta omombeu Tumpa iñee.

⁶ Jare Tumpa iEspíritu outa nderé mbaepuere ndive, jare remombeuta jae reta ndive Tumpa iñee; jare oipoepɨta ndeyemongeta.

⁷ Jare opaete kuae mɨakañɨ reta oasa nde ndive yave, eyapo reyemongeta jaekavita ndeve vae, echa Tumpa oime ko oï nde ndive.

⁸ Javoi ekua cherenonde Gilgal pe; jayave che ajata ndépɨri amee vaerä mɨmba oyeyukagüe opa etei oyeapɨ vae, jare mɨmba oyeyukagüe yembopɨakatu pegua. Reärota chiu ara, che aja aväe ndépɨri regua, jare amombeuta ndeve mbae ko reyapota vae.

⁹ Jare Saúl oyerova Samuel oïa güi ojo ñoete Tumpa oipoepɨ ipɨa; jare opaete jókuae mɨakañɨ reta oyeapo chupe jókuae ara.

¹⁰ Jare opa yogüɨraja reta oväe jókuae ɨvɨtɨ oïa pe yave, ko jókuae mbovɨ ete ñeemombeúa reta vae oñoövaiti jae ndive, jare Tumpa iEspíritu ou jese mbaepuere ndive, jare omombeu Tumpa iñee jae reta ndive.

¹¹ Jare opaete tenonde rupi oikuaa Saúl vae reta oecha omombeu Tumpa iñee, ñeemombeúa reta ndive yave, tëta pegua reta oparandu yoyavi oyoupe, jei reta: “¿Maratu ra oiko Cis taɨ? ¿Saúl vi yera Tumpa iñeemombeúa?”

¹² Jare amogüe reta jei: “¿Kia pa ko jae kuae reta tu?” Kuae jeko pegua opɨta ñeerä: “¿Saúl vi yera Tumpa iñeemombeúa?” jei vae.

¹³ Jare omombeu poi Tumpa iñee, jare ojo oväe ɨvate ɨvɨtɨ mbaemboete renda pe.

¹⁴ Metei Saúl itutɨ jei chupe jare jembiokuai pe: —¿Kerupi pa peiko? Jare jae jei: —Rojo roeka mburika reta; jare mbaetɨ roväe chupe ramo rojo roväe Samuel pɨri.

¹⁵ Jare Saúl itutɨ jei: —Romoñera remombeu vaerä cheve ¿mbae pa ko Samuel jei ndeve?

¹⁶ Jare Saúl jei itutɨ pe: —Omombeu kavi voi oreve, mburika reta opa ye ma oñeväe vae. Ërei Samuel omomiari mburuvicharä oïta vae regua, mbaetɨ etei imiari itutɨ pe.

¹⁷ Jaɨkue rupi Samuel omboatɨuka opaete Israel iñemuña reta yandeYa jóvai, Mizpa pe,

¹⁸ jare jei chupe reta: —Körai jei yandeYa, Israel iTumpa: “Che ko pogüɨnoe Egipto güi, jare poyora Egiptoɨgua reta ipo güi, jare opaete ïru tëta reta oiporarauka peve vae reta ipo güi.”

¹⁹ Ërei añave pe reta peröɨro peTumpa, opaete mbɨatɨtɨ jare mbaeporara reta güi peñovatu vae, echa peiporu peruvicha guasurä. Añave, peyemboatɨ yandeYa jóvai, peñemuña ñavo rupi jare peñoëtara vae ñavo rupi.

²⁰ Jare Samuel jei oya katu vaerä opaete Israel iñemuña reta ñemuña ñavo rupi, joko güi oyeparavo Benjamín iñemuña reta.

²¹ Jare jei oya katu vaerä Benjamín iñemuña, jëtara ñavo rupi, joko güi oyeparavo Matri jëtara reta; joko güi oyeparavo Saúl Cis taɨ. Jare oeka reta yave, mbaetɨ oväe chupe.

²² Jare oparandu reta ye yandeYa pe, mbaetɨño ra ou oväe jókuae kuimbae joko pe. Jare yandeYa jei: “Oime kuae pe oñemi oï voɨta pɨte pe.”

²³ Jayave osɨi reta yogüɨraja güeru joko güi; güeru reta oñono opaete vae ipɨte pe yave, oecha reta ipuku yae opaete vae güi.

²⁴ Jare Samuel jei opaete vae pe: —¿Peecha pa yandeYa oiparavogüe, kërai mbaetɨ kia jae rami opaete kuae tëta pe vae? Jayave opaete vae osapúkai oyerovia reve oyepopete reta jese.

²⁵ Jayave Samuel jei opaete vae jóvai mburuvicha guasu iporookuai reta regua, jare oikuatía metei tembikuatía pe, jare oñovatu yandeYa jo pe.

²⁶ Jare Samuel omondo opaete vae jëta jëta ae kotɨ. Jare Saúl ojo vi jëta kotɨ Gabaa pe, jare yogüɨraja jupíe kuimbae ñeraro regua reta, yandeYa oñátai ipɨa vae reta.

²⁷ Ërei amogüe jeko kavimbae vae reta jei: “¿Këraita ra kuae yandereepɨ?” Güɨröɨro reta, mbaetɨ güeru reta mbota chupe; ërei jae oikuaambae ramiño oyeapo.