1 SAMUEL 1 - Biblia Guarani Tumpa Iñee

Samuel oa

¹ Oiko metei kuimbae Ramataim Zofim pegua pe, ɨvɨtɨ Efraín pe, Elcana jee vae, jae ko Jeroham taɨ, Jeroham jae ko Eliú taɨ, Eliú jae ko Tohu taɨ, Tohu jae ko Zuf taɨ, Efraín iñemuña pegua.

² Jare Elcana mókoi jembireko. Metei jee Ana, ïru jee Penina. Jare Penina oime imembɨ reta, ërei Ana mbaetɨ imembɨ.

³ Año ñavo jókuae kuimbae ojo jëta güi tëta Silo jee vae pe ombaemboete vaerä jare omee vaerä mɨmba oyeyukagüe yandeYa imbaepuere yae ete vae pe. Jókuae mókoi Elí taɨ yogüɨrekoa pe, Ofni jare Finees, yandeYa isacerdote.

⁴ Jare Elcana omee mɨmba oyeyukagüe yave, omee jembireko Penina pe imbaerä vae, jare imembɨraɨe reta pe, jare imemɨkuña reta pe, omee iñavo imbaerä vae.

⁵ Ërei Ana pe omee oiparavo kavigüe; echa oaɨu yae, yepe tëi yandeYa mbaetɨ omee imembɨ vaerä.

⁶ Jare iñemɨi Penina omoambeko avei, omboarasɨ jare ombopɨatɨtɨ vaerä, echa yandeYa mbaetɨ omee imembɨ vaerä.

⁷ Jökorai año ñavo omoambeko avei; ojo yandeYa jo kotɨ yave; jáeramo Ana oyaeo jare okarúä.

⁸ Jare ime Elcana jei chupe: “Ana, ¿maera pa reyaeo? ¿Maera pa rekarúä? ¿Maera pa ndepɨatɨtɨ? ¿Jaekaviä pa che ndeve, payandepo nemembɨ vaerägüe güi?”

⁹ Jare tëta Silo pe Ana oï yave, opüa opa okaru güire; sacerdote Elí oguapɨ ramboeve oï metei tenda pe okɨta iyɨpɨ pe yandeYa itupao pe.

¹⁰ Ana oyemboasɨ katu yae reve oyerure yandeYa pe, jare jeta oyaeo.

¹¹ Jare oyapo ñererökuavee jei reve: “CheYa imbaepuere yae ete vae, jupi ko remae che nderembiokuai ipɨatɨtɨ vae re yave, jare nemaendúa cheré yave, jare remee che nderembiokuai pe imembɨrä kuimbae ko yave, tañono tee ndeveguarä jókuae michia raɨ opaete ara oikove oiko ramboeve jare mbaetɨta ia oñeapi.”

¹² Jare jae ɨma yae oyerure yandeYa jóvai jeko pegua, Elí omae ngatu oï Ana iyuru re;

¹³ ërei Ana oyerure ipɨa peño, jembeño omomɨi, iñee mbaetɨ oyeendu; jare Elí pe osavaɨpogüe vaeecha.

¹⁴ Jayave Elí jei chupe: —¿Kërai yave regua pa resavaɨpota reï? ¡Ekuera mo vino güi!

¹⁵ Jare Ana jei chupe: —Mbaetɨ ko jökorai cheru. Che jae ko metei kuña oiporara yae oiko vae; mbaetɨ jau vino ani mbae oporombosavaɨpo vae ave, yandeYa jóvai ko aru amboyekuaa chepɨatɨtɨ.

¹⁶ Agüɨye eyemongeta che nderembiokuai kuña jeko kavimbae ko vae; chepɨa kavimbae jare chepɨatɨtɨ yae vae re ko jekuae güɨrave chemiari aï.

¹⁷ Elí jei chupe: —Ekua mbɨakatu ndive jare Israel iTumpa tomee ndeve reiporu chupe vae.

¹⁸ Jare jae jei: —Yasoropai tuicha. Jare Ana ojo ye ouä rupi, okaru mbaetɨ ye ma ipɨatɨtɨ.

¹⁹ Jare ndeimbove yave opüa omboete reta yandeYa, jare opa ye yogüɨraja reta jëta kotɨ Ramá pe. Jare Elcana güɨroke jembireko Ana; jare yandeYa oyapo jókuae oiporu chupe vae.

²⁰ Ana ipurúa, jare ou ma ara reta oväe oyekuaku vaerä yave, oa imembɨ metei kunumi raɨ, jare ombojee Samuel, echa jei: “CheYa pe aiporu vae ko.”

²¹ Jaɨkue rupi Elcana ojo opaete jo pegua reta ndive omee vaerä mɨmba oyeyukagüe yandeYa pe, iñee ombopo vaerä. Jae oyapoñoi rami.

²² Ërei Ana mbaetɨ ojo, jei ime pe körai: —Che mbaetɨta aja kunumi raɨ okambu poi regua, jayave ramo araja voi vaerä aeya yandeYa ipo pe, jare opɨta ete vaerä oiko joko pe.

²³ Jare ime Elcana jei chupe: —Eyapo jaekavita ndeve vae, epɨta rembokambu poi regua; toiko yandeYa jemimbotaño. Jare Ana opɨta jare oyangareko imembɨ re ombokambu poi regua.

²⁴ Jare ombokambu poi güire, güɨraja jupíe; jare mboapɨ toro taɨrusu vae, jare veintidó kilo trigo jare metei jɨru vino; güɨraja yandeYa jo pe Silo pe; ërei kunumi raɨ michi vɨteri.

²⁵ Oyuka reta toro taɨrusu vae, jare güeru reta Elí pe kunumi raɨ.

²⁶ Jare Ana jei Elí pe: —¡Chekɨvɨ! Mase, che ko jae jókuae kuña ndeɨpɨ pe oyerure oiko yandeYa pe vae.

²⁷ Kuae kunumi raɨ re ko ayerurese aiko, jare yandeYa omee cheve aiporu chupe vae.

²⁸ Añave, che añono tee yandeYa peguarä; oikove oiko ramboeve toiko yandeYa imbaerä. Jare joko pe Elí omboete yandeYa.