1 REYES 9 - Biblia Guarani Tumpa Iñee

Tumpa oyapo morogüɨrökuavee päve Salomón ndive

¹ Salomón opa ma oyapo yave tupao yandeYa peguarä, jare mburuvicha guasu jo; jare opaete Salomón oyemongeta oyapo vaerä vae yave,

² yandeYa oyekuaa chupe mokoía ma, Gabaón pe oyekuaa chupe rami.

³ Jare yandeYa jei chupe: “Che aendu ndeyerure jare neporomoñera reyapo cheróvai vae. Che añono tee kuae o nde remopüa vae, añono vaerä cheree pɨpe jekuae avei pegua; jare opaete ara rupi ayangarekota jese.

⁴ Nde reguata kavi yave cheróvai nderu David oguata rami, opaete ndepɨa ndive jare sɨmbi rupi, reyapo reve opaete mbaembae royókuai vae, reñovatu reve cheporookuai reta,

⁵ jayave romboguapɨ eteta mburuvicha guasurä kuae Israel pe, jare ndeporookuaía toiko jekuae avei pegua, nderu David amomiari rami, jae reve: ‘Ngaraa oata neñemuña güi metei kuimbae mburuvicha guasurä Israel pe.’

⁶ Ërei pe reta jare peraɨ reta pesɨrɨ chegüi jare mbaetɨ peyapo mborookuai reta amee peve vae yave, jare peo pemboete tumpa ambuae reta yave,

⁷ aekɨta Israel iñemuña reta kuae ɨvɨ amee chupe vae güi, amombota cheróvai güi kuae tupao añono tee vae, jare Israel toiko tëtaguasu reta opuka jese vaerä.

⁸ Jare kuae tupao ikavi yae vae, oyemboaita opɨta, oipotagüe oasa iyɨ́vɨri rupi vae ipɨakañɨta omae jese, jare oyoyaita, jare jeita: ‘¿Maera ra Tumpa körai oyapo kuae ɨvɨ jare kuae tupao?’

⁹ Jare jei retata: ‘Oeya reta iYa Tumpa Egipto güi güɨnoe iñemuñagüe reta vae jare omboete reta tumpa ambuae; jáeramo Tumpa ombou jese reta opaete mbae ikavimbae.’ ”

Ïru mbaravɨkɨ Salomón oyapo vae

¹⁰ Oasa veinte año Salomón opa güire oyapo mókoi o, jae ko yandeYa itupao jare mburuvicha guasu jo,

¹¹ opaete kuae reta reguarä omee Hiram mburuvicha guasu Tiro pegua, ɨ̈vɨrare jare pino, jare opaete oro jae oipota rami. Mburuvicha guasu Salomón omee vi Hiram pe veinte tëta guasu ɨvɨ Galilea pe.

¹² Ërei Hiram ojo omae tëta guasu reta Salomón omee chupe vae re yave, mbaetɨ oipota,

¹³ jare jei: “¿Mbae nunga tëta guasu reta pa ko kuae remee cheve vae cherɨvɨ?” Jáeramo jókuae ɨvɨ pe tëta reta ñogüɨnoi vae ombojee Cabul. Jökorai jee añave rupi.

¹⁴ Hiram ombou Salomón pe oro vae ko oupitɨ tres mil noveciento sesenta kilo.

¹⁵ Kuae jeko pegua mburuvicha guasu Salomón omee mborookuai oyeapo vaerä yandeYa itupao, mburuvicha guasu jo, Milo, Jerusalén ikësea, jökoraiño vi tëta Hazor, Meguido jare Gezer.

¹⁶ Echa Faraón mburuvicha guasu Egipto pegua ou yepe opɨ̈ro tëta Gezer, opa oapɨ jare opa oyuka cananeo reta pɨpe yogüɨreko vae, javoi ombopota jókuae tëta guasu pe tayɨ Salomón jembireko.

¹⁷ Jayave Salomón omopüa ye Gezer, jare Bet-horón ɨvɨ kotɨgua,

¹⁸ Baalat jare Tadmor, ñuu pe ɨvɨ Judá pe.

¹⁹ Jökoraiño vi omopüa ye opaete tëta guasu reta tembíu omboɨru pɨpe vae, jare käretou ñeraro pegua reta jenda, jare kavayu regua reta jëta, jare opaete Salomón ikɨ̈reɨ oyapo Jerusalén pe vae, Líbano pe jare opaete ɨvɨ güɨnoi ipo pe vae pe.

²⁰ Opaete tëta Israel iñemuña peguambae opɨtagüe reta, amorreo reta, Het iñemuña reta, ferezeo reta, heveo reta jare jebuseo reta,

²¹ iñemuñagüe reta opɨta jókuae ɨvɨ pe vae, Israel iñemuña reta mbaetɨ ipuere omokañɨtei vae, Salomón omombaravɨkɨ yae reta, jökorai yogüɨreko añave rupi.

²² Ërei mbaetɨ metei ave omombaravɨkɨ Israel iñemuña reta tembiokuai rami, jaeño oñono ñeraro reguarä, sundaro juvicharä, käretou iyangarekoarä, jare kavayu reguarä.

²³ Mbaravɨkɨ re omae vae reta Salomón ipo pe ñogüɨnoi vae, oupitɨ quiniento cincuenta, kuae reta oporomombaravɨkɨ mbae oyeapo vae re.

²⁴ Faraón tayɨ oyakavo David Jëta Guasu güi mburuvicha guasu Salomón oyapo o chupe vae pe. Jayave Salomón oyapo Milo.

²⁵ Mboapɨ vese año pe, Salomón omee mɨmba oyeyukagüe opaetei oyeapɨ vae, jare yembopɨakatu pegua, mɨmba oyeyuka oyeapɨ jese vae jae oyapo yandeYa pe vae re, jare oapɨ ikäti kavi vae incienso yandeYa jóvai. Jökorai oyapo reta opa tupao oyapo güire.

²⁶ Mburuvicha guasu Salomón oyapo vi barco reta Ezión-geber pe, Elot iyɨpɨ pe Ɨguasu Pɨ̈ta vae jembeɨ pe, ɨvɨ Edom pe.

²⁷ Hiram omondo jókuae barco reta pe jembiokuai reta, oikatu ɨ rupi oguata vae reta Salomón jembiokuai reta ndive.

²⁸ Kuae reta yogüɨraja Ofir pe jare güeru reta joko güi oro, catorce mil kilo seri, jare güɨraja reta mburuvicha guasu Salomón pe.