1 REYES 8 - Biblia Guarani Tumpa Iñee

YandeYa ikäjou oyereraja tupao pe

¹ Jayave Salomón omboatɨ jóvai Jerusalén pe Israel iñemuña itenondegua reta, opaete ñemuña itenondegua reta jare tëtara ñavo ñemuña juvicha reta, güɨroyakavo vaerä käjou morogüɨrökuavee päve pegua yandeYa imbae David jëta güi, jae ko Sión güi.

² Arete guasu iara pe oyemboatɨ opaete Israel iñemuña reta pegua mburuvicha guasu Salomón pɨri Etanim yasɨ pe, jae ko chiúa yasɨ pe.

³ Yogüeru oväe opaete Israel iñemuña itenondegua reta, jare sacerdote reta oipɨɨ käjou

⁴ jare güɨraja reta käjou morogüɨrökuavee päve pegua yandeYa imbae, jare tupao guakapi pegua yemboatɨ renda opaete mbaembae oñeñono tee vae ndive, kuaekuae reta opa güɨraja sacerdote reta jare levita reta.

⁵ Mburuvicha guasu Salomón jare opaete Israel iñemuña reta ñogüɨnoi jae ndive vae, ñogüɨnoi käjou morogüɨrökuavee päve pegua jóvai, omee vecha reta jare toro reta oyeyukagüe, jeta yae ramo oyepapa rapeä.

⁶ Jaɨkue rupi sacerdote reta güɨroike käjou morogüɨrökuavee päve pegua yandeYa imbae tupao japɨpe oñeñono tee kavi yae vae pe, jókuae araɨgua reta iä ipepo igüɨ pe,

⁷ echa jókuae araɨgua iä reta omoata güɨnoi ipepo ɨvate rupi, jökorai güɨnoi ipepo reta Tumpa ikäjou jare ivoɨka ɨvɨra reta iárambo.

⁸ Ërei ngatu ɨvɨra Tumpa ikäjou ivoɨka reta puku ete ramo, oyekuaa opɨta tupao japɨpe oñeñono tee vae güi, ërei ikatu güi ete mbaetɨ oyekuaa, jökorai opɨta añave regua.

⁹ Käjou pe jaeño oï mókoi ita ipe vae, Moisés oñono pɨpe Horeb pe vae, jae ko morogüɨrökuavee päve yandeYa oyapo Israel iñemuña reta ndive Egipto güi ñogüɨnoe reta yave vae.

¹⁰ Sacerdote reta ñogüɨnoe tupao japɨpe oñeñono tee vae güi yave, amapɨtu tɨnɨe yandeYa jo.

¹¹ Jókuae jeko pegua sacerdote reta mbaetɨ ipuere opɨta oyapo iparavɨkɨ pɨpe, echa yandeYa iyemboetea omotɨnɨe yandeYa jo.

Tupao guasu oñeñono tee

¹² Jayave Salomón jei: “CheYa, nde rere, reikota ko pɨtumimbi pe vae.

¹³ Ërei che omopüa o ndeveguarä, pɨpe eiko jekuae avei.”

¹⁴ Javoi mburuvicha guasu oyerova omae Israel iñemuña reta yatɨ ñogüɨnoi vae kotɨ, jare jei ñee kavi ikotɨ reta; jare opaete Israel iñemuña reta oyemboatɨ vae oyemboɨ ñogüɨnoi.

¹⁵ Jei: “Toyemboete yandeYa, Israel iTumpa, cheru David ndive imiari vae, jare iñee ombopo vae, jei reve:

¹⁶ ‘Egipto güi tëta chembae anoe güive, mbaetɨ aiparavo tëta metei ave opaete Israel iñemuña reta güi, pɨpe oñemopüa vaerä tupao guasu cheree oï pɨpe vaerä, ërei aiparavo David oï vaerä tëta Israel chembae pe.’

¹⁷ Jare cheru David oyemongeta omopüa vaerä o yandeYa, Israel iTumpa jee re.

¹⁸ Ërei ngatu yandeYa jei cheru David pe: ‘Ndepɨa pe nekɨ̈reɨ yae remopüa tupao cheree re vae, ikavi yae ko jókuae ndepɨa jemimbota;

¹⁹ ërei nde mbaetɨta remopüa jókuae o, nderaɨ renoita vae, jae omopüata tupao cheree re.’

²⁰ Jare yandeYa ombopo iñee jeigüe vae; echa che apüa cheru David jekovia pe, jare aguapɨ Israel pe mburuvicha guasu iguapɨa pe yandeYa jei rami, jare amopüa tupao yandeYa Israel iTumpa jee re.

²¹ Jare kuae tupao japɨpe añono tee käjou yemomaendúa pegua jendarä, pɨpe oime oï yandeYa oyapo morogüɨrökuavee päve ñaneñemuñagüe reta ndive ɨvɨ Egipto güi güɨnoe yave vae.”

²² Jaɨkue rupi Salomón oñeñono mɨmba oyeyuka oyeapɨ jese vae yandeYa imbae jóvai, opaete Israel iñemuña reta yatɨ vae jóvai, jare omopüa ipo ara kotɨ,

²³ jei: “CheYa, Israel iTumpa, mbaetɨ Tumpa nde rami vae, ɨvate ara pe ave, ani ɨvɨ pe, nde reñovatu morogüɨrökuavee päve nderembiokuai reta peguarä vae, nderóvai oguata kavi, opaete ipɨa ndive kavi vae reta;

²⁴ rembopo neñererökuavee nderembiokuai cheru David pe; rere vae, jare rembopo, añave oasa oï rami.

²⁵ Añave cheYa, Israel iTumpa, embopo nderembiokuai cheru David pe rerökuavee rere reve vae: Cheróvai mbaetɨta oata ndeve neñemuña güi oguapɨ vaerä mburuvicha guasurä Israel pe, nderaɨ reta oyapo ko yave cheporookuai reta, jare oguata kavi reta ko yave cheresa róvai rupi, nde cheróvai reguata kavi rami.

²⁶ Añave, cheYa, Israel iTumpa, embopo ñee reta rere nderembiokuai cheru David pe vae.

²⁷ Ërei ¿añetete ra ko Tumpa oikota ɨvɨ pe? Mase, ara reta viña pa ipɨguasuä ndeve, ¡vɨtei pa kuae tupao amopüagüe!

²⁸ Ërei jeseve, reenduta kuae nderembiokuai iyerure jare iporomoñera chupe; cheYa Tumpa, eendu nderembiokuai isapúkai jare iyerure, añave oyapo oï nderóvai vae;

²⁹ emae avei pɨ̈tu yave jare ara pe kuae o re, kuae: ‘Cheree oïta pɨpe’ rere chupe vae re; jare eendu nderembiokuai yerure oyapo yave kuae o pe.

³⁰ Añave eendu, nderembiokuai iyerure, jare Israel tëta ndembae vae iyerure; oyerure reta yave kuae pe, nde reenduta vi reikoa pe, ara pe; eendu jare neɨ̈ro.

³¹ Kia nunga vae iyoa yave japicha kotɨ, jare güeru jei vaerä añete vae nderee re mɨmba oyeyuka oyeapɨ jese vae jóvai kuae tupao guasu pe yave,

³² eendu ara pe jare eyapo jupi vae nderembiokuai pe. Jeko vae toiporara jeko re aeño, jare jekombae pe eyapo jupi vae jeko kavi rupi.

³³ Tovaicho reta omoamɨri yave Israel tëta ndembae iyoa ndekotɨ jeko pegua, ërei oyerova ye yave omee mbaemboete ndekotɨ, jare oyerure nemoñera reve yave kuae tupao pe,

³⁴ eendu chupe reta ara pe, neɨ̈ro iyoa re, jare emboyerova ye ɨvɨ remee iñemuña reta pe vae pe.

³⁵ Ndembae vae reta iyoa ndekotɨ vae jeko pegua okɨä yave, ërei oyerure kuae tupao pe nemoñera reve jare oyembopɨambuae reve iyoa güi reiporarauka chupe vae re yave,

³⁶ eendu chupe reta ara güi, neɨ̈ro nderembiokuai reta iyoa re, Israel tëta ndembae pe, jare emboe reta tape kavi re jupi yogüɨrajata vae re. Jayave embou ama kuae ɨvɨ remee ndembae vae reta pe vae re.

³⁷ Karuai yae yave ɨvɨ pe, ani mbaerasɨ ovakatu vae, ani kuaraɨasɨ opa yave omombiru temitɨ, ani mbaerasɨ pire ichuumbi yave, ani tuku, ani temitɨ oipɨte vae reta; tovaicho reta oñova yave orerëta guasu reta jare opüa oreré ani mbae nunga susere ani mbaerasɨ guasu oime yave,

^38-39 eendu opaete yerure reta kia ñavo oyerure yave, ani opaete ndembae vae Israel güi, oime yave susere; ërei oupi ipo oyerure kuae tupao kotɨ yave. Nde eendu ara pe, jókuae reikoa pe, jare neɨ̈ro chupe; jare emee metei ñavo pe kërai jeko oï rupi, echa ndeño reikuaa kuimbae reta ipɨa iyemongeta.

⁴⁰ Jökorai ndemboeteta yogüɨreko ramboeve ɨvɨ remee oreñemuñagüe reta pe vae pe.

⁴¹ Jökoraiño vi ketɨgua, tëta ndembae peguambae vae, yogüeru yave mombɨrɨ güi nderee oendu jeko pegua

⁴² jare oyerure kuae tupao pe yave (echa oikuaa nderee tuicha yae vae ko jare ndembaepuere tuicha yae vae),

⁴³ eendu ara pe, jókuae reikoa pe, jare emee chupe opaete jae oiporugüe, ndekuaa vaerä tëtaguasu reta opaete ɨvɨ rupi jare omee mbaemboete ndeve tëta Israel ndembae vae oyapo rami, jökorai toikuaa kuae tupao amopüa ndeve vae pe nderee oyemboete vae.

⁴⁴ Tëta ndembae vae ñogüɨnoi yave oñoraro vaerä jovaicho reta ndive kia pe, remondoa pe, joko güi oyerure yave ndeve omae reve kuae tëta nde reiparavogüe kotɨ jare kuae tupao ayapo vae kotɨ,

⁴⁵ eendu ara güi iyerure nemoñera reve vae, jare eyapo chupe jupi vae.

⁴⁶ Iyoa reta ndekotɨ yave, echa mbaetɨta ko kia iyoambae, jare kuae re ndearasɨ chupe reta jare remee jovaicho reta ipo pe yave, güɨraja vaerä tembipɨɨrä köiño ani mombɨrɨ,

⁴⁷ jókuae oyererajaa pe oyerova yave ndekotɨ jare omombeu iyoa jare oyapo ko ikavimbae,

⁴⁸ oyerova opaete ipɨa jare jekove ndive ndekotɨ yave jókuae ɨvɨ jovaicho reta güɨrajaa pe, jare oyerure omae reve kuae ɨvɨ remee iñemuñagüe reta pe kuae tëta reiparavo vae kotɨ yave,

⁴⁹ eendu ara pe jókuae reikoa pe, iyerure reta nemoñera reve vae jare eyapo jupi vae.

⁵⁰ Jare neɨ̈ro tëta ndembae vae pe iyoa ndekotɨ vae re, opaete oyembopɨapochɨ ndekotɨ vae re. Jare emee jókuae oporogüɨraja vae pe oiparareko vaerä omae jese.

⁵¹ Echa tëta ndembae ko, nde renoe reta Egipto güi, horno jiero omondɨkui rami vae güi.

⁵² Che nderembiokuai iyerure re eïndaivi reyeapɨsaka vaerä jare tëta ndembae vae iyerure nemoñera reve vae re. ¡Eendu chupe opaete jókuae iyerure!

⁵³ Echa nde rembosɨrɨ ndeyeupe kuae tëta ïru tëta reta ɨvɨ pe ñogüɨnoi vae ipɨte güi, jökorai remombeu nderembiokuai Moisés rupi, renoe oreñemuñagüe reta Egipto güi yave, cheYa Tumpa.”

⁵⁴ Salomón opa oyerure omoñera reve vae yave, opüa jókuae oyetavatɨka oï jókuae mɨmba oyeyuka oyeapɨ jese vae jóvai güi, ipo omopüa oï ara kotɨ vae güi,

⁵⁵ oyemboɨ jare jei ñee kavi opaete Israel iñemuña reta pe iñeeäta reve körai:

⁵⁶ “¡Toyemboete yandeYa mbɨakatu omee imbae vae tëta Israel pe vae, jae oñererökuavee rupi! Echa mbaetɨ etei ombopombae jae oñererökuavee jembiokuai Moisés rupi vae.

⁵⁷ Toï yande ndive yandeYa Tumpa, ñaneñemuñagüe reta ndive oikose rami. Agüɨye tosɨrɨ ani tiyandereeya.

⁵⁸ Yandepɨa ñañono ikotɨño yayapo vaerä opaete jae jemimbota jare ñañovatu iporookuai reta, mborookuai reta oyókuai ñaneñemuñagüe reta oyapo vaerä vae.

⁵⁹ Kuae aiporu yandeYa pe vae, toiko avei yandeYa Tumpa jóvai köiño ara rupi jare pɨ̈tu yave, oyapo vaerä jupi vae jembiokuai pe jare Israel tëta imbae pe, iara oväe rupi.

⁶⁰ Jökorai oikuaa reta vaerä opaete ɨvɨ pegua tëtaguasu reta yandeYa jae ko Tumpa, mbaetɨ yé ïru Tumpa vae.

⁶¹ Jáeramo pepɨa jupi reve kavi peiko yandeYa Tumpa ndive, peyapo reve iporookuai reta jeigüe vae, añave rupi rami.”

⁶² Kuae jaɨkue rupi mburuvicha guasu, jare opaete Israel iñemuña reta omee mɨmba oyeyukagüe yandeYa pe.

⁶³ Salomón omee yandeYa pe mɨmba oyeyukagüe yembopɨakatu pegua, veintidó mil toro jare ciento veinte mil vecha. Jökorai mburuvicha guasu jare opaete Israel iñemuña reta oñono tee yandeYa itupao.

⁶⁴ Jókuae ara voi mburuvicha guasu oñono tee oka mbɨte, yandeYa itupao jóvai oï vae, echa joko pe omee mɨmba oyeyukagüe opaetei oyeapɨ vae, mbota temitɨ jäɨgüe jare mɨmba oyeyukagüe yembopɨakatu pegua ikɨragüe, echa michi opɨta mɨmba oyeyuka oyeapɨ jese vae jiero iyu vae pegua yandeYa jóvai oï vae, mbaetɨ iyave opaete mɨmba oyeyukagüe opaetei oyeapɨ vae, mbota temitɨ jäɨgüe, mɨmba oyeyukagüe yembopɨakatu pegua ikɨragüe.

⁶⁵ Jókuae ara pe Salomón jare opaete Israel iñemuña reta, jetagüe yogüeru, Hamat güive ojoi oväe ɨ̈aka Egipto kotɨ yogüeru oyapo reta vaerä arete guasu küaraɨa pegua yandeYa Tumpa jóvai chiu ara pegua, jare ïru chiu ye ndive oupitɨ catorce ara arete.

⁶⁶ Pɨareve pe omboyupavo opaete vae. Jare jae reta jei ñee kavi mburuvicha guasu pe, jare oyerovia reve opa yogüɨraja jëta kotɨ, Tumpa oyapo ikavi vae jembiokuai David kotɨ vae re, jare Israel tëta imbae vae re.