1 REYES 7 - Biblia Guarani Tumpa Iñee

Salomón omopüa ïru o reta

¹ Salomón omopüa jorä, jare opa oyapo trece año pe.

² Omopüa vi o ombojee “Kaa Líbano” pe vae, kuae güɨnoi cuarenta y cinco metro pukugüe, jare ipɨgüe veintidó metro y medio, ɨvategüe trece metro y medio, kuae oñeñono irundɨ jɨsɨ okɨta ɨ̈vɨrare pegua, jese oguapɨ oyeasa vae ɨ̈vɨrare.

³ Cuarenta y cinco ko jókuae ɨvɨra oyepɨasa vae, mboapɨ jɨsɨ vae metei ñavo güɨnoi quince, jare oguapɨ jókuae jɨsɨ re. Jókuae ɨ̈vɨrare oyepɨasa vae re oyeapo oñemopöra vae.

⁴ Oime vi mboapɨ ñesɨro ventana mboapɨ apɨ vae, ïru ndive oyóvai yóvai kavi.

⁵ Opaete öke jare ventana reta oyovake ipɨgüe jare ñogüɨnoi oyóvai yóvai kavi ïru ndive mboapɨ ñesɨro.

⁶ Oyapo vi korero okɨta pegua puku vae, güɨnoi veintidó metro y medio pukugüe, trece metro y medio ipɨgüe. Jare jóvai oï vi korero okɨta pegua.

⁷ Oyapo vi korero oporojäa vaerä pɨpe, jare oñova ɨ̈vɨrare pe ɨ́vɨkotɨ güive ɨvate kotɨ.

⁸ O Salomón oiko pɨpe vae, güɨnoi ïru oka ikupe kotɨ vae, korero oyovake ïru ndive. Jare o Faraón tayɨ jae jembireko peguarä oyapo vae oyovake ïru korero ndive.

⁹ Opaete jókuae o oñemopüa vae ɨvɨ güive iyapɨte jembeɨ omopöra vae jare opaete japɨpe güive oka pe, ita jepɨ vae oñeopa kavi metei rami oyovake vae pe.

¹⁰ O iguapɨka ita reta tuichagüe jare yavai vae, metei güɨnoi irundɨ metro y medio jare ïru mboapɨ metro sesenta centímetro.

¹¹ Jókuae o iguapɨka iarambogua, ita ikavigüe, oyovake kavi oñeopa jökoraiño vi ɨ̈vɨrare pegua.

¹² Jare oka ikësea mboapɨ ñesɨro ita oñeopagüe jare metei jɨsɨ ɨ̈vɨrare pe, yandeYa jo japɨpe joka rami, jökorai vi jo.

Salomón omee mbaravɨkɨ Hiram, Tiro pegua pe

¹³ Mburuvicha guasu Salomón omondo güeru Hiram, Tiro güi,

¹⁴ jae ko metei kuña imemano vae imembɨraɨe, Neftalí iñemuña reta pegua, tu oparavɨkɨse jiero iyu vae pe Tiro pe. Hiram oikatu yae, ipɨarakuaa yae jare ipoki yae oyapo vaerä opaño mbaembae jiero iyu vae pegua, jayave jae ou mburuvicha guasu jóvai jare oyapo opaete iparavɨkɨ reta chupe.

¹⁵ Jare omondɨkui oyapo mókoi okɨta jiero iyu vae pegua, metei ñavo ɨvategüe güɨnoi ocho metro, jare ipoguasugüe oupitɨ güɨnoi metro jare setenta y cinco centímetro.

¹⁶ Oyapo vi jiero iyu vae pegua jókuae mókoi okɨta iyapɨte omopöra vae reguarä. Jókuae iyapɨte reguarä vae metei ñavo ɨvategüe güɨnoi mókoi metro veinticinco centímetro.

¹⁷ Oyapo vi oñeope karena rami vae oñono vaerä okɨta iyapɨte re, jókuae iyapɨte regua re oïta vae reguarä, metei ñavo chiu güɨnoita jókuae iyapɨte regua.

¹⁸ Oyapo vi mókoi ñesɨro temitɨ granada jee vae ia iä, jókuae oñeope vae jembeɨ rupi güɨroyere vaerä oñono, oñova vaerä okɨta iyapɨte regua reta. Jókuae mókoi okɨta iyapɨte reguarä.

¹⁹ Iyapɨte regua reta ñogüɨnoi okɨta reta korero jenonde kotɨgua re vae, güɨnoi mókoi metro seri jare güɨnoi tüpa-ɨpɨecha iä.

²⁰ Jókuae mókoi okɨta vae iyapɨte regua reta güɨnoi temitɨ granada jee vae ia iä, dosciento, mókoi ñesɨro güɨroyere jese metei ñavo re, jókuae jɨ̈epoa rupi.

²¹ Kuae okɨta reta oñono tupao ikorero jenonde kotɨ. Jare omopüa yave jókuae okɨta akatu kotɨgua ombojee Jaquín, jare okɨta asu kotɨgua ombojee Boaz.

²² Okɨta iyapɨte güɨnoi tüpa-ɨpɨecha vae iä. Jökorai opa oyeapo mbaravɨkɨ okɨta reta regua.

Tupao pegua mbaembae reta

²³ Hiram oyapo vi ɨrɨru tuichagüe jiero iyu vae oyemondɨkuigüe pegua. Yapúa kavi jembeɨ oyere, jembeɨ güi ïru jembeɨ pe güɨnoi irundɨ metro y medio ipɨgüe. Ɨvategüe güɨnoi mókoi metro jare veinticinco centímetro, jare ikúa oyere oñejäa vae güɨnoi trece metro y medio.

²⁴ Jókuae ɨrɨru jembeɨ igüɨ rupi oyapo mókoi ñesɨro temitɨ andai ia iä, cuarenta y cinco centimetroa pe oñono payandepo, jare kuae reta oyemondɨkui oyeapo ɨrɨru ndive metei ramiño.

²⁵ Ɨrɨru oguapɨ doce toro iä jiero iyu vae pegua re, mboapɨ omae ɨvɨtuguasu kotɨ, mboapɨ arayevɨ kotɨ, mboapɨ kuaraɨ oëa kotɨ jare mboapɨ kuaraɨ oikea kotɨ; opareve güɨnoi jumbɨ ɨrɨru igüɨ kotɨ.

²⁶ Ɨrɨru yandambusugüe güɨnoi juri centímetro; jembeɨ kopaecha, ani tüpa-ɨpɨ ipotɨ rami; iporusugüe oupitɨ cuarenta y cuatro mil litro pegua.

²⁷ Oyapo vi payandepo guapɨka jiero iyu vae pegua, metei ñavo güɨnoi metei metro jare ochenta centímetro pukugüe jare ipɨgüe, ɨvategüe güɨnoi metei metro jare treinta y cinco centímetro.

²⁸ Jókuae guapɨka oyeapo körai: Iguapɨa iyɨke yɨke ipe päve päve,

²⁹ jare jókuae ipe vae reta re oime yaguapope reta iä, toro reta iä jare araɨgua reta iä. Kuae yaguapope reta jare toro reta iárambo jare igüɨ rupi, oime oñemopöra kavi oyeapo mbaepotɨ iä pe.

³⁰ Guapɨka ñavo güɨnoi irundɨ ruera jiero iyu vae pegua jare ieje reta jiero iyu vae pegua vi. Guapɨka iekina ñavo güɨnoi ɨrɨru jugua iyokoka, güɨnoi jembeɨ oñemopöra kavi vae.

³¹ Ɨrɨru iyuru oë guapɨka jembeɨ japɨpe, jókuae oasa cuarenta y cinco centímetro ɨvategüe. Iyuru yapúa jare iyokoka reta güɨnoi sesenta y ocho centímetro ɨvategüe. Iyuru jembeɨ oyekuatía vae ipe, mbaetɨ yapúa.

³² Irundɨ ruera vae ñogüɨnoi jókuae ipe vae igüɨ pe, jare ieje reta guapɨka re. Ruera reta ɨvategüe güɨnoi sesenta y ocho centímetro,

³³ jare ruera güɨnoi vae käretou iruera rami etei ko. Oime ieje reta, iaro, irayo reta, jare eje oñeësɨvo jupi vae reta, opaete kuae reta jiero iyu vae pegua.

³⁴ Irundɨ ekina ñavo guapɨka iyokokarä ñogüɨnoi vae, oyeapo metei güiño.

³⁵ Ɨvategüe jembeɨ yapúa vae oupitɨ güɨnoi veintidó centímetro, ipe vae jare oyeapo kavi ɨvate vae oyeapo metei güiño.

³⁶ Hiram oikuatía jese araɨgua iä, yaguapope iä, karandaɨ iä jókuae ipe jare omopöra jembeɨ rupi.

³⁷ Jökorai oyapo payandepo reve guapɨka, jiero iyu vae oyemondɨkui vae pegua, metei ramiño oyovake kavi yae.

³⁸ Oyapo vi payandepo ɨrɨru jiero iyu vae pegua. Metei ñavo güɨnoi metei metro ochenta centímetro, iporusugüe ochociento ochenta litro pegua; jókuae payandepo vae ɨrɨru metei ñavo oyemboguapɨ metei guapɨka re,

³⁹ pandepo guapɨka oñono tupao iyakatu kotɨ, jare pandepo guapɨka iyasu kotɨ. Ɨrɨru tuicha vae oñeñono tupao iyakatu kotɨ, kuaraɨ oëa kotɨ arayevɨ kotɨ äve mí.

⁴⁰ Hiram oyapo vi yapepo reta, sɨpe reta jare tasa guasu reta. Jökorai opa oyapo mbaravɨkɨ Salomón pe, yandeYa itupao peguarä.

⁴¹ Jae ko mókoi okɨta, jare iyapɨte regua reta yapúa vae, jare mókoi pɨsa rami oñeope vae, jókuae okɨta iyapɨte omopöra vae yapúa vae oñova vae;

⁴² cuatrociento temitɨ granada jee vae ia iä jókuae mókoi oñeope vae reguarä, mókoi jɨsɨ metei ñavo oñeope vae re, pɨpe oñeova jókuae mókoi okɨta iyapɨte regua yapúa vae;

⁴³ payandepo guapɨka, jare payandepo vi ɨrɨru; jae ko ɨrɨru reta ñogüɨnoi jókuae guapɨka reta re vae,

⁴⁴ jare ɨrɨru tuicha vae, doce toro iä güɨnoi igüɨ pe vae,

⁴⁵ yapepo, sɨpe, tasa guasu reta. Opaete kuae reta Hiram oyapo Salomón pe vae, jiero iyu vae oyemondɨkui vae pegua, yandeYa jo peguarä.

⁴⁶ Mburuvicha guasu omondɨkuiuka oyapo ɨvɨkuitï pegua molde pe Jordán pe, Sucot jare Saretán ipäu pe.

⁴⁷ Jeta yae tembiporu jiero iyu vae pegua ramo, Salomón mbaetɨ ojäauka mbovɨ etei ko ipoɨ vae.

⁴⁸ Salomón oyapouka vi opaete mbaembae yandeYa jo peguarä vae: Ikäti kavi vae incienso oyeapɨ jese vae oro pegua, mesa oro pegua mbɨyape reta mbaemboete pegua oñeñono jese vae;

⁴⁹ oyapo vi mechero renda reta oro pegua mbaepotɨ reta iä reve, pandepo oï akatu kotɨ jare pandepo asu kotɨ, kuae reta oï tupao japɨpe oñeñono tee kavi yae vae jóvai, jare mechero reta, tenasa reta oro pegua,

⁵⁰ kopa reta, mecha oyetɨo pɨpe vae, tasa reta, kuchara raɨ reta, ikäti kavi vae incienso oyeapɨ pɨpe vae, oro oyeambae pegua. Oro pegua vi visagra reta tupao japɨpe oñeñono tee kavi yae vae jöke regua reta, jare tupao jöke regua vi.

⁵¹ Mburuvicha guasu Salomón oyapouka yandeYa jo peguarä vae, opa oyeapo. Güɨraja vi tu David oñono tee yandeYa peguarä vae mbaembae reta oro pegua jare korepoti pegua, jare oñovatu yandeYa jo pe oï mbaembae oñeñovatúa pe.