1 REYES 6 - Biblia Guarani Tumpa Iñee

Salomón omopüa tupao guasu

¹ Cuatrociento ochenta año ma oasa Israel iñemuña reta ñogüɨnoe Egipto güi yave, Salomón omboɨpɨ omopüa tupao yandeYa peguarä; irundɨ año ma oiko Israel pe mburuvicha guasurä yave, yasɨ Zif pe, jae ko mokoía yasɨ.

² Mburuvicha guasu Salomón omopüa yandeYa itupao vae, güɨnoi veintisiete metro ipukugüe, jare chau ipɨgüe, ɨvategüe trece metro y medio.

³ Jare tupao guasu jenonde oï korero vae, güɨnoi chau metro ipukugüe, tupao guasu ipɨgüe rami, jare jókuae korero ipɨgüe ko irundɨ metro y medio.

⁴ Jare oyapo tupao iventana ipɨguasu japɨpe rupi jare ipɨmii ikatu rupi, oyeokenda jare oyepea vae.

⁵ Omopüa vi ovapetea ikupe rupi o reta, güɨroyere etei oyapo o reta tupao guasu jovapetea re,

⁶ igüɨ pegua ete cuarto güɨnoi mókoi metro veinticinco centímetro ipɨgüe, jare cuarto mbɨte pegua güɨnoi mókoi metro setenta y cinco centímetro ipɨgüe, jare cuarto iárambo ete güɨnoi mboapɨ metro quince centímetro ipɨgüe; echa tupao ikupe rupi omomichi äve, agüɨye vaerä oguambɨ etei oyoo reta.

⁷ Jare tupao oñemopüa yave, oyapo reta ita oñeopagüe güeru reta vae pe, jáeramo omopüa reta ñogüɨnoi yave mbaetɨ etei oyeendu martillo jare yɨɨ ave tupao pe, ani mbae nunga ïru tembiporu jiero pegua.

⁸ Jókuae mbɨte pegua cuarto jöke güɨnoi tupao iyakatu kotɨ; jare yeupika oyere yere vae rupi yayeupi cuarto mbɨte pegua pe, jare jókuae cuarto mbɨte pegua güi yayeupi cuarto iarambogua ete pe.

⁹ Jare opa oyapo tupao oñova omopöra ɨ̈vɨrare pe.

¹⁰ Omopüa vi cuarto reta tupao re güɨroyere, jare ɨvategüe oupitɨ mókoi metro veinticinco centímetro, jare ɨ̈vɨrare pe omboya oyoe cuarto reta tupao ndive.

¹¹ Jare yandeYa jei Salomón pe:

¹² “Kuae tupao nde remopüa reï vae regua tae ndeve. Reguata yave opaete cheporookuai reta rupi, jare reiko opaete cheporookuai reta jeigüe rupi yave, che ambopota ndeve opaete cheñee reta nderu David pe jae ndekotɨ vae;

¹³ jare aikota pɨpe Israel iñemuña reta ipɨte pe, mbaetɨta aeya tëta chembae Israel.”

¹⁴ Jökorai Salomón omopüa tupao jare opa oyapo.

¹⁵ Opaete tupao jovapetea oñova ɨ̈vɨrare oñeopagüe pe. Oñova jókuae ɨvɨra pe ɨ́vɨkotɨ güive ɨvate kotɨ, jare oñova vi japɨpe piso ɨvɨra ciprés jee vae pe.

¹⁶ Oyapo vi tupao jugua pe o chau metro ipɨgüe vae, jare oñova ɨ̈vɨrare oñeopagüe pe ɨvate güive ɨ́vɨkotɨ, oyapo kavi yae, tupao japɨpe oñeñono tee kavi yae Tumpa peguarä vae.

¹⁷ Jare jókuae tupao japɨpe oñeñono tee vae güɨnoi dieciocho metro ipukugüe.

¹⁸ Opaete japɨpe oñeova ɨ̈vɨrare oñeopagüe pe oñemopöra kavi reve andai iä pe jare mbaepotɨ iä pe. Opaete kuae reta ɨ̈vɨrare pegua, mbaetɨ etei oyekuaa metei ave ita yepe.

¹⁹ Salomón oyapo kaviuka, o oñeñono tee kavi yae Tumpa peguarä vae, oñono vaerä pɨpe käjou morogüɨrökuavee päve pegua yandeYa imbae.

²⁰ Jókuae tupao japɨpe oñeñono tee kavi yae vae güɨnoi chau metro päve ipɨgüe jare ɨvategüe, jare oñova oro oyeambae pe; jaeramiño vi ikäti kavi vae incienso oyeapɨ jese vae ɨ̈vɨrare pegua oñova oro pe.

²¹ Jökorai Salomón oñova oro oyeambae pe opaete tupao japɨpe, jare japɨpe oñeñono tee kavi yae vae jenonde oñono karena oro pegua.

²² Opaete tupao oñova oro pe ɨvate güive ɨ́vɨkotɨ, jökoraiño vi ikäti kavi vae incienso oyeapɨ jese vae, tupao japɨpe oñeñono tee kavi yae vae jóvai oï vae.

²³ Oyapo vi araɨgua iä tupao japɨpe oñeñono tee kavi yae vae pe, ɨvɨra olivo pegua, metei ñavo ɨvategüe güɨnoi irundɨ metro y medio,

²⁴ jare metei ñavo ipepo reta güɨnoi mókoi metro veinticinco centímetro. Jayave mókoi reve ipepo omoata yave oupitɨ irundɨ metro y medio.

²⁵ Mókoi reve araɨgua iä oyovake, ɨvategüe jare ipukugüe;

²⁶ ɨvategüe güɨnoi irundɨ metro y medio, jökoraiño vi ïru.

²⁷ Jare Salomón oñono jókuae mókoi araɨgua iä tupao japɨpe oñeñono tee kavi yae vae pe. Jókuae metei araɨgua iä ipepo omoata (oipɨso) vae oupitɨ ovapetea jare ïru araɨgua iä ipepo oupitɨ ïru ovapetea, jare ïru ipepo omboya reta oyoe o mbɨte pe.

²⁸ Salomón opa oñova oro pe jókuae araɨgua reta iä.

²⁹ Jare opaete ovapetea japɨpe jare ikupe rupi oikuatía jese araɨgua iä, karandaɨ iä jare mbaepotɨ iä reta.

³⁰ Jare tupao japɨpe piso, oñova oro pe jare ikupe rupi.

³¹ Tupao japɨpe oñeñono tee kavi yae vae jökerä oyapo ɨvɨra olivo pegua, jare öke-ɨta oyepɨasa vae ndive güɨnoi pandepo ekina.

³² Mókoi reve öke, ɨvɨra olivo pegua, jese oyapo araɨgua reta iä, karandaɨ iä jare mbaepotɨ iä; javoi opareve oñova oro pe jókuae mbae iä reta.

³³ Tupao jökerä oyapo poste ɨvɨra olivo pegua, irundɨ ipɨgüe oyovake vae.

³⁴ Jökerä oyapo ɨvɨra ciprés pegua, öke ñavo re oï mókoi jöke oyepea päve vae. Metei jöke oyepea oyeapa vae jare jovaicho jökorai vi oyepea.

³⁵ Oyapo vi jese araɨgua iä, karandaɨ iä jare mbaepotɨ iä, javoi opa oñova oro ipïreriasɨ vae pe.

³⁶ Oka japɨpe pegua oikëse mboapɨ ñesɨro ita oñeopagüe pe jare metei jɨsɨ ɨ̈vɨrare pe.

³⁷ Irundɨa año ma Salomón oiko yave, yasɨ Zif pe, omboɨpɨ oñono reta yandeYa jo iguapɨka,

³⁸ jare once año ma oiko yave yasɨ Bul pe, jae ko juri yasɨ jókuae año pe, opa oyeapo tupao. Salomón opa oyapo tupao chiu año pe.