1 REYES 21 - Biblia Guarani Tumpa Iñee

Nabot iuvarupa

¹ Opaete kuaekuae reta oasa. Oiko metei kuimbae Jezreel pegua Nabot jee vae, güɨnoi metei uvarupa mburuvicha guasu Samaria pegua Acab jo iyɨpɨ pe.

² Metei ara Acab jei Nabot pe: —Emee cheve ndeuvarupa cheko raɨrä, echa oï chero iyɨpɨ pe, kuae jekovia pe tamee ndeve uvarupa ikavigüe; ani reipota yave tamboepɨ ndeve jepɨ oï rupi.

³ Ërei Nabot jei Acab pe: —Tumpa mbaetɨ oipota che amee vaerä cheru oeya chembaerä vae.

⁴ Acab ojo jo kotɨ ipɨatɨtɨ jare iyarasɨ reve Nabot jei chupe vae re, echa jei chupe mbaetɨta omee tu imbaegüe opɨta imbaerä vae. Ojo oväe jare oyapakua omae reve ovapetea kotɨ, jare mbaetɨ oipota okaru.

⁵ Jayave jembireko Jezabel oya jese jare jei chupe: —¿Maera pa ndepɨatɨtɨ mbatee, jare mbaetɨ reipota rekaru?

⁶ Acab jei chupe: —Chemiari Nabot, Jezreel pegua ndive, jae chupe omee vaerä agua iuvarupa; ani oipota yave ïru uvarupa ndive aipoepɨ vaerä. Ërei jae mbaetɨ oipota omee cheve.

⁷ Jayave jembireko Jezabel jei chupe: —¡Ërei nde jae ko mburuvicha guasu Israel pegua! Epüa, ekaru pɨagüive. ¡Che ameeta ndeve Nabot, Jezreel pegua iuvarupa!

⁸ Jayave jae oikuatía tupapire Acab jee re, jare omboyeɨ jese mburuvicha ipoäka-vera, jare omondo tenondegua reta pe jare mburuvicha reta pe, Nabot jëta pegua reta pe.

⁹ Jókuae oikuatía vae pe jei: “Pemoërakua yekuaku tembíu güi vae, jare peñono Nabot re opaete vae jóvai.

¹⁰ Javoi peñono jóvai mókoi kuimbae ipɨapochɨ vae yapu reve oporomboeko vae, imiari reta vaerä ikotɨ, jei reve: ‘Nde rere ñee ikavimbae Tumpa kotɨ jare mburuvicha guasu kotɨ.’ Javoi penoe ikatu pe peyapi ita pe, jökorai tomano.”

¹¹ Jare opaete vae reta, tenondegua reta jare mburuvicha reta, Jezabel oyapo ombou kuatía rupi oyókuai rami.

¹² Omoërakua reta yekuaku tembíu güi vae jare omboguapɨ reta Nabot opaete vae jóvai.

¹³ Jayave yogüeru jókuae mókoi ipɨapochɨ vae, jare imiari reta Nabot kotɨ opaete vae reta jóvai jei reta reve: “Nabot jei ñee ikavimbae Tumpa kotɨ jare mburuvicha guasu kotɨ.” Jayave güɨnoe reta ikatu pe jare oyapi reta ita pe oyuka.

¹⁴ Javoi omondo omombeu reta Jezabel pe, Nabot oyeapi ita pe jare omano vae.

¹⁵ Jezabel kuae oikuaa rupive, jei Acab pe: —Ekua, jare eipɨɨ Nabot, Jezreel pegua iuvarupagüe ndembaerä, jókuae ñäteɨ tëi omee ndeve vae. Nabot mbaetɨ ma oiko, omano ma.

¹⁶ Acab oikuaa kavi ma omano ko Nabot yave, ojo oyemombae jókuae uvarupa re.

¹⁷ Jayave yandeYa imiari Elías, Tisbe pegua pe, jei reve:

¹⁸ “Epüa ekua emae Acab mburuvicha guasu Israel pegua re, Samaria pe oiko vae. Jae añave oime oï Nabot iuvarupa pe, opɨ̈rogüe pe.

¹⁹ Jare köraita rere chupe: ‘YandeYa jei körai: Reyuka Nabot jare repɨ̈ro chugüi imbaembaegüe, jáeramo jókuae jugüɨgüe yaɨmba reta oerea pe, nderugüɨgüe oereta vi yaɨmba reta.’ ”

²⁰ Jare Acab jei Elías pe: —¿Jayave cheväe cherovaicho? Elías jei: —Jökorai. Echa ikavimbae vaeño reyapo yandeYa jesa róvai.

²¹ Jáeramo yandeYa jei: “Ambouta nderé mbaesusere tuichagüe, jare opata amboai neñemuña reta, neñemuña tembiokuai reta ani tembiokuaimbae vae reta Israel pe.

²² Kuae ayapota neñemuña reta pe, Jeroboam, Nabat taɨ pe ayapo rami etei, jare Baasa, Ahías taɨ pe rami, echa chemboarasɨuka reyapogüe jare reyapouka mbaeyoa Israel pe vae.”

²³ Jezabel regua yandeYa jei vi körai: “Yaɨmba reta jouta Jezabel tëta Jezreel pe.”

²⁴ Jare neñemuña omano yave tëta pe, yaɨmba reta jouta, jare kaa pe omano yave, uruapúa reta jouta.

²⁵ (Mbaetɨ yé kia Acab rami vae, jembireko Jezabel jeigüe rupi ojo, oyapo ikavimbae vaeño yandeYa jesa róvai.

²⁶ Oyapo pɨ̈chɨi yae vae, omboete tumpa-raanga amorreo reta rami, jókuae tëta reta yandeYa opa güɨnoe omombo jae reta jenonde güi vae reta oyapose vae.)

²⁷ Acab oendu yave opaete kuaekuae reta, omondoro jemimonde jare omonde temimonde mbɨatɨtɨ pegua jare oyekuaku tembíu güi. Oke jókuae temimonde ndive jare ipɨatɨtɨ yae reve oiko.

²⁸ Jayave yandeYa jei Elías pe:

²⁹ “¿Reecha pa Acab kërai oñemomichi cheróvai? Oñemomichi vae jeko pegua mbaetɨta ambou jese ikavimbae oikove oiko ramboeve, iñemuña reta re ambouta kuri ikavimbae.”