1 REYES 19 - Biblia Guarani Tumpa Iñee

Elías otekuarai Horeb kotɨ

¹ Acab omombeu Jezabel pe opaete Elías oyapogüe, jare kërai opa oyuka kɨse pe Baal regua omoërakua vae reta vae.

² Jayave Jezabel omondo Elías pe ñee jerajaa, jei körai: “¡Täta toiporarauka tumpa reta cheve! Pɨareve koyave mbaetɨ yave che royuka, nde reyuka vae reta rami.”

³ Jare Elías oecha mbaetɨta ikavi ramo, opüa jare ojo, güɨroasayepe vaerä jekove, jare ou tëta Beerseba pe ɨvɨ Judá pe, jare joko pe oeya jembiokuai.

⁴ Jare jae ojo ñuu kotɨ, metei ara oguata, jare ou oguapɨ metei ɨvɨra igüɨ pe; jare oipotaecha omano, jare jei: “¡Joko peño mo cheYa, eekɨ chegüi cherekove, echa mbaetɨ ko ayapɨraa cheru reta chereko kavi pe!”

⁵ Jare oyapakua ɨvɨra igüɨ pe jare oke; jare ɨma katu yave ou metei araɨgua oñátai, jare jei chupe: “Epüa ekaru.”

⁶ Jayave jae omae, jare oecha ko iñäka pe oï mbɨyape tätapɨi re oyɨgüe, jare ɨ metei ɨakua pe; jou jare oɨu, jare oke ye.

⁷ Jare ou ye yandeYa iaraɨgua mokoía ma, oñátai jare jei chupe: “Epüa ekaru, echa mombɨrɨ ko oï reguata vaerä.”

⁸ Jare opüa okaru jare oɨu; jókuae tembíu omomɨ̈rata, jare oguata cuarenta ara jare cuarenta pɨ̈tu, ojo regua oväe Horeb pe, Tumpa iɨvɨtɨ re.

⁹ Joko pe oike metei ɨvɨkua pe, jare joko pe oke. Jare yandeYa jei chupe: “¿Mbae pa reyapo kuae pe Elías?”

¹⁰ Jare jae jei: “Ayandu cherägüɨro yae nde cheYa Tumpa Imbaepuere yae ete vae re; echa Israel iñemuña reta oeya morogüɨrökuavee päve reyapo vae, jare opa omboai reta mɨmba oyeyuka oyeapɨ jese vae reta ndembae, jare opa oyuka reta kɨsepuku pe neñeemombeúa reta; jaeño che apɨta, jare añave chereeka reta cheyuka vaerä.”

¹¹ Jae jei chupe: “Eë ikatu pe, jare eñeñono ɨvɨtɨ re cheróvai.” Jare, ko yandeYa ou, jare ɨvɨtu täta yae jare imbaepuere yae vae omondoro ɨvɨtɨ vae, jare oyoka ɨ̈vavira reta vae, ou yandeYa jenonde; ërei yandeYa mbaetɨ ou jókuae ɨvɨtu re. Jare ɨvɨtu jaɨkue ou ɨvɨkana, ërei ngatu yandeYa mbaetɨ ou ɨvɨkana ndive.

¹² Jare ɨvɨkana jaɨkue rupi ou tata; ërei ngatu yandeYa mbaetɨ ou jókuae tata re. Jare tata jaɨkue rupi oyeendu mbae iñee mbegüe kavi jare pöiasɨ vae.

¹³ Jare Elías oendu yave, oyasoi jova jemimonde pe, jare oë, oñeñono ɨvɨkua jöke pe. Jare ou chupe metei ñee, jei körai: “¿Mbae pa reyapo kuae pe Elías?”

¹⁴ Jare jei: “Ayandu cherägüɨro yae nde cheYa Tumpa imbaepuere yae ete vae re; echa Israel iñemuña reta oeya morogüɨrökuavee päve reyapo vae, jare opa omboai reta mɨmba oyeyuka oyeapɨ jese vae reta ndembae, jare opa oyuka reta kɨsepuku pe neñeemombeúa reta; jaeño che apɨta, jare añave chereeka reta cheyuka vaerä.”

¹⁵ Jayave yandeYa jei chupe: “Eyerova ekua jókuae ñuu reyúa rupi, ekua Damasco pe eiparavo Hazael mburuvicha guasurä Siria peguarä,

¹⁶ jare Jehú, Nimsi jɨmɨmino mburuvicha guasurä Israel pe; jare Eliseo, Safat taɨ tëta Abel-mehola pegua, eiparavo cheñeemombeuarä nderekovia pe.

¹⁷ Jökorai Hazael güi ojoyepegüe Jehú oyukata, jare Jehú güi ojoyepegüe Eliseo oyukata.

¹⁸ Jare che ayapota opɨta vaerä Israel pe siete mil, Baal jóvai mbaetɨ oyetavatɨka vae reta, jare mbaetɨ oovapɨte vae reta.”

Eliseo iñeenɨi

¹⁹ Jae ojo ramboeve joko güi, oväe Eliseo, Safat taɨ ombaeara ñogüɨnoi doce yoayu güeye reta pe, jare jae oiko taɨkue ete ou vae ndive. Jare Elías oasa jóvai rupi jare omombo jese jemimonde iarambogua.

²⁰ Jayave jae oeya güeye reta, jare osɨi ou Elías jaɨkue jare jei: —Romoñera remaeño aja vaerä aovapɨte cheru jare chesɨ, jare jaɨkue rupi taja nderupíe. Jare jae jei chupe: —Ekua jare eyu ye. Ërei nemaendúa che ayapo ndeve vae re.

²¹ Oyerova ye, jare oipɨɨ oyuka metei yoayu güeye jare iaraogüe pe omboyɨ soo, jare omee jou imborɨa reta. Jaɨkue rupi opüa ojo Elías jaɨkue, jare oyeokuai chupe.