1 REYES 17 - Biblia Guarani Tumpa Iñee

Elías omoërakua mbaetɨta okɨ vae

¹ Jayave Elías, Tisbe pegua, jae ko ɨvɨ Galaad kotɨgua, jei Acab pe: “¡YandeYa Israel iTumpa, jóvai aï vae jee re, mbaetɨta ama jare mbaetɨta ɨsápɨi ave kuae año reta rupi, che jae yaveño!”

² Jare yandeYa jei chupe:

³ “Esɨrɨ kuae güi, jare eyerova ye kuaraɨ oëa kotɨ, jare eñemi ɨ̈aka raɨ Querit pe, Jordán jóvai oï vae pe.

⁴ Jókuae ɨ̈aka raɨ güi reɨuta; jare che ayókuai güɨraü guasu reta omee vaerä joko pe rekaru.”

⁵ Jare jae oyapo yandeYa jei chupe rami; echa ojo jare oiko ɨ̈aka raɨ Querit iyɨ́vɨri Jordán jóvai, kuaraɨ oëa kotɨ.

⁶ Jare chucha reta güeru chupe mbɨyape jare soo ndeimbove yave, jare kaaru yave. Jare ɨ̈aka raɨ güi oɨu.

⁷ Mbovɨ ara ma oasa yave, jókuae ɨ̈aka raɨ opa otini, echa mbaetɨ okɨ jókuae ɨvɨ pe.

Elías jare imemano vae Sarepta pegua

⁸ Jaɨkue rupi yandeYa jei chupe:

⁹ “Epüa jare ekua tëta Sarepta pe ɨvɨ Sidón pe, jare eiko joko pe; ko che ayókuai metei kuña imemano vae ndeangareko vaerä.”

¹⁰ Jayave jae opüa jare ojo Sarepta kotɨ. Jare ojo ma oväe tëta guasu jöke pe yave, ko oï metei kuña imemano vae, yepea omonoo oiko; jae oenɨi jare jei chupe: —Romoñera reru vaerä cheve michi yepe ɨ metei vaso pe jau vaerä.

¹¹ Jare ojo güeru vaerä chupe yave, jae oenɨi ye, jare jei chupe: —Romoñera reru vaerä vi mbɨyape oñepɨ̈saagüe yepe cheve.

¹² Jare jae jei: —Añetete ndeYa Tumpa rovake, mbaetɨ anoi mbɨyape; jaeño ete anoi metei poagua pegua trigokúi tinaa pe, jare michi mii asaite jɨru pe; jare añave amonoo ko aiko mbovɨ yepe yepea, ayapo vaerä oreyeupe. Routa jare jaɨkue rupi torerovaruru.

¹³ Elías jei chupe: —Agüɨye ekɨɨye; ekua jare eyapo nde rere rami; ërei eyapo cheve räri joko güi metei michi mbɨyape tanimbugüɨ pe oyɨ vae, jare eru cheve; jare jaɨkue rupi eyapo ndeyeupe jare nemembɨ peguarä.

¹⁴ Echa yandeYa Israel iTumpa jei körai: “Trigokúi ngaraa oata tinaa pe jare asaite ave jɨru pe ngaraa jagüe, amongɨ regua ɨvɨ re.”

¹⁵ Jayave jae ojo oyapo Elías jei chupe rami; jare Elías jare imemano vae jare imembɨ jou yogüɨreko ɨma ara rupi.

¹⁶ Jare trigokúi mbaetɨ oata tinaa pe jare asaite ave mbaetɨ jagüe jɨru pe, yandeYa jei Elías rupi rami etei.

¹⁷ Kuae jaɨkue rupi kuña imemano vae imembɨ imbaerasɨ, jare jókuae mbaerasɨ oyaporai yae omano regua.

¹⁸ Jayave kuña imemano vae jei Elías pe: —¿Mbae pa che ayapo ndekotɨ kuimbae Tumpa jembiokuai? ¿Reyu pa chemomaendúa cheyoa re jare omano vaerä chemembɨ?

¹⁹ Elías jei chupe: —Eru nemembɨ cheve kuae pe. Jare jae oekɨ kuña imemano vae jäpapau güi güɨraja jo ɨvate güɨnoi vae pe, jare omboyapakua jupa pe.

²⁰ Javoi oyerure osapúkai reve, jei: “CheYa Tumpa, kuae kuña imemano vae jo pe aiko vae, ¿remaeñota pa ipɨatɨtɨ, remaeñota omano imembɨ?”

²¹ Jare oyapakua mboapɨ ye michia re, jare oyerure osapúkai reve yandeYa pe, jei: “CheYa Tumpa, ¡romoñera rembou ye vaerä kuae michia jekove chupe!”

²² YandeYa oendu Elías iyerure, jare michia jekove ou ye chupe, jare oikove ye.

²³ Jupiveiño Elías oipɨɨ michia güɨrogüeyɨ ɨ́vɨkotɨ o pe ichɨ oïa pe jare omee chupe, jei reve: —¡Mase, nemembɨ oikove oï!

²⁴ Jare kuña imemano vae jei: —Añave aikuaa nde añetete jae Tumpa iñeemombeúa jare Tumpa iñee remombeu vae añete vae ko.