1 REYES 15 - Biblia Guarani Tumpa Iñee

Abiam oiko mburuvicha guasurä Judá pe

¹ Abiam omboɨpɨ oï mburuvicha guasurä Judá pe, Jeroboam, Nabat taɨ dieciocho año ma oiko mburuvicha guasurä yave.

² Mboapɨ año oiko mburuvicha guasurä Jerusalén pe. Ichɨ jee Maaca, jae ko Abisalom tayɨ.

³ Jare oyapo opaete mbaeyoa reta tu tenonde yave oyapo vae; jare mbaetɨ ipɨa jupi iYa Tumpa kotɨ, iñemuñagüe David ipɨa rami.

⁴ Ërei David re ipɨakatu ramo iYa Tumpa, omee chupe oime avei vaerä iñemuña güi mburuvicha Jerusalén pe, oiko vaerä tembipe rami opaete ara rupi, oguapɨ ramboeve taɨ jekovia pe, omomɨ̈rata vaerä Jerusalén.

⁵ Echa David ikavi oyapogüe yandeYa jóvai, jare opaete oyókuai vae güi mbaetɨ osɨrɨ oikove oiko ramboeve jaeño ete jeko Urías Het iñemuña pegua kotɨ.

^6-7 Oñeraro avei oyoupii Roboam jare Jeroboam, Roboam oikove oiko ramboeve. Jare oiko vi ñeraro Abiam jare Jeroboam ndive. Opaete Abiam oyapogüe oyekuatía oï tembikuatía pe, Judá pegua mburuvicha guasu reta regua oyekuatía oïa pe.

⁸ Abiam omano, jare oñotɨ reta iñemuñagüe reta jɨvɨa oïa pe David Jëta guasu pe. Jare taɨ Asa oguapɨ jekovia pe mburuvicha guasurä.

Asa oiko mburuvicha guasurä Judá pe

⁹ Asa omboɨpɨ oï mburuvicha guasurä Judá pe, veinte año ma Jeroboam oiko Israel pe yave,

¹⁰ cuarenta año oiko mburuvicha guasurä Jerusalén pe. Ichɨ jee Maaca, jae ko Abisalom tayɨ.

¹¹ Asa oyapo sɨmbi vae yandeYa jesa róvai, iñemuñagüe David rami.

¹² Echa opa güɨnoe omombo ɨvɨ güi kuimbae japicha ndive oasa vae rupi ombaemboete vae reta, jare opa vi oekɨ tumpa-raanga reta iñemuñagüe reta oyapogüe.

¹³ Oekɨ vi ichɨ Maaca güi mburuvicharä oiko vae, echa jae oyapouka iyeupe Asera iä. Asa omboai jókuae Asera iä jare opa oapɨ ɨ̈aka raɨ Cedrón jee vae pe.

¹⁴ Ërei yepe tëi ɨvɨtɨ rupigua mbaemboete renda mbaetɨ omboai, jae jekuaeñoi oguata jupi rupi yandeYa jesa róvai opaete ara oikove oiko ramboeve,

¹⁵ jare oñono Tumpa jo pe, tu oñono tee Tumpa peguarä vae jare jae oñono teegüe: Oro, korepoti jare mbae jepɨ vae reta.

Asa oñomoïru Ben-adad ndive

¹⁶ Oñeraro avei oyoupii Asa jare Baasa mburuvicha guasu Israel pegua ndive, yogüɨreko ramboeve.

¹⁷ Jare Baasa oporepeña Judá re yave, oikëse Ramá, agüɨye vaerä oime kia ojo imiari mburuvicha guasu Judá pegua pe.

¹⁸ Jayave mburuvicha guasu Asa omboatɨ opaete oro, korepoti yandeYa jo pe mbaembae jepɨ vae oñeñovatúa pe oimeño vae, jare mburuvicha guasu imbaembae jepɨ vae oñeñovatúa pegua, opa omee jembiokuai reta pe, jare omondo Ben-adad pe mburuvicha guasu Siria pegua pe, jae ko Tabrimón taɨ, Hezión jɨmɨmino, jae oiko Damasco pe, omondo jei chupe:

¹⁹ “Yayapo nde jare che metei morogüɨrökuavee päve, cheru jare nderu oyapo rami. Mase ko amondo ndeve mbota: Oro jare korepoti. Emboai morogüɨrökuavee päve renoi Baasa mburuvicha guasu Israel pegua ndive vae, jare tachereeya mbɨakatu pe.”

²⁰ Ben-adad omokɨ̈reɨ, jókuae mburuvicha guasu Asa jei chupe vae, jayave omondo isundaro itenondegua reta oporepeña Israel pegua tëta guasu reta re. Jökorai opɨ̈ro Ijón, Dan, Abel-bet-maaca, jare opaete Cineret, jare opaete ɨvɨ Neftalí.

²¹ Baasa oikuaa yave opaete kuae, oeya Ramá oikëse güɨnoi vae, jare oyerova ye ojo Tirsa pe.

²² Jayave mburuvicha guasu Asa omondo oenɨi opaete Judá iñemuña pegua, oatambae reve metei ave kia nunga vae, jare Ramá güi güɨraja reta iyeupe ita reta jare ɨvɨra reta Baasa oiporu oikëse vaerä pɨpe vae, jare jókuae pe mburuvicha guasu Asa oikëse Geba Benjamín pegua jare Mizpa.

Asa imano

²³ Ïru mbaembae Asa oyapogüe, jare opaete imbaepuere regua, jare tëta reta omopüagüe regua oyekuatía oï tembikuatía pe, Judá pegua mburuvicha guasu reta regua oyekuatía oïa pe. Indechi yae pe Asa imbaerasɨ ipɨ pe,

²⁴ jare omano yave oñotɨ reta iñemuñagüe reta oñeotɨa pe, David Jëta guasu pe. Jare taɨ Josafat oguapɨ jekovia pe mburuvicha guasurä.

Nadab oiko Israel pe

²⁵ Nadab, Jeroboam taɨ omboɨpɨ oï mburuvicha guasurä Israel pe, Asa mokoía año ma oiko mburuvicha guasurä Judá pe yave; jare mókoi año oiko Nadab mburuvicha guasurä Israel pe.

²⁶ Jare oyapo ikavimbae yandeYa jesa róvai, echa omomoe tu jeko, jókuae Israel iñemuña reta pe oyapouka mbaeyoa reta vae rupi.

²⁷ Jara Baasa, Ahías taɨ, jae ko Isacar iñemuña pegua, jae oñemopüa Nadab kotɨ, jare oyuka Gibetón pe, filisteo reta jëta pe, echa joko pe Nadab jare sundaro reta Israel pegua oñova ñogüɨnoi tëta Gibetón.

²⁸ Baasa oyuka Nadab, mboapɨa año ma oiko Asa mburuvicha guasurä Judá pe yave, jare jae oï jekovia pe mburuvicha guasurä.

²⁹ Jare jae omboɨpɨ oï yave, oyuka opaete Jeroboam iñemuña reta, mbaetɨ etei oeya kia ave jekove ndive Jeroboam imbae vae reta güi, opaetei omokañɨtei, yandeYa jei rami jembiokuai Ahías, Silo pegua rupi.

³⁰ Kuae ko Jeroboam iyoa jeko pegua, jare Israel iñemuña reta pe oyapouka mbaeyoa vae re. Jókuae rupi omboarasɨuka yandeYa Israel iTumpa vae re.

³¹ Ïru mbaembae Nadab oyapogüe oyekuatía oï tembikuatía pe, Israel pegua mburuvicha guasu reta regua oyekuatía oïa pe.

³² Oñeraro avei oyoupii Asa jare Baasa mburuvicha guasu Israel pegua ndive, oikove yogüɨreko ramboeve.

Baasa oiko Israel pe

³³ Mboapɨa año ma oiko Asa mburuvicha guasurä Judá re yave, Baasa, Ahías taɨ, omboɨpɨ oï mburuvicha guasurä Tirsa pe opaete Israel re, jare veinticuatro año oiko mburuvicha guasurä.

³⁴ Ërei Baasa oyapo ikavimbae yandeYa jesa róvai, echa omomoe Jeroboam jeko, Israel iñemuña reta pe oyapouka mbaeyoa vae rupi.