1 Pedro 5 - Biblia Guarani Tumpa Iñee

Peyangareko Tumpa imbae reta re

¹ Amoñera oporogüɨrovia vae reta itenondegua reta pepɨte pe ñogüɨnoi vae. Che vi akuakuaa ma jae reta rami, jare amoërakua vi Cristo oiporara yanderé vae re. Jare Cristo oyekuaa yave, che vi ayeroviata jae ndive.

² Peyangareko Tumpa imbae reta pepɨte pe ñogüɨnoi vae reta re kia peokuaimbae reve jare pekɨ̈reɨ ngatu reve; agüɨye pemongana jupimbae vaeräño, jaeño pekɨ̈reɨ ngatu reve,

³ agüɨye peyemboiya etei peyangareko jese vae reta re, jaeño peechauka ikavi chupe reta.

⁴ Jare Cristo oporogüɨrovia vae reta iyangarekoa reta Juvicha ou ye yave, omeeta peve äka-regua mbaemboete oikomeguambae vae.

⁵ Pe taɨrusu reta, peiko petenondegua reta jeia re. Jare opaete vae peiko kavi oyoupi peñemomichi reve; echa: “Tumpa oyovaicho ipɨarai vae reta kotɨ, ërei ipɨakavi oñemomichi vae reta kotɨ.”

⁶ Jáeramo, peñemomichi Tumpa imbaepuere tuicha yae vae jóvai, jae pembotuicha vaerä ara oväe yave.

⁷ Peeya Tumpa pe opaete peyemoambeko jese vae, echa jae oyangareko oï peré.

⁸ Peyeandu katu jare peïndaivi, echa perovaicho aña guasu yaguapope oñee rami oeka kia omokañɨtei vaerä.

⁹ Ërei peñemomɨ̈rata chupe peporogüɨrovia pe, peikuaa ko kërai opaete ɨvɨ rupi ïru oporogüɨrovia vae reta oiporara vi ñogüɨnoi pe rami.

¹⁰ Ërei Tumpa ipɨakavi tuicha yae vae, yandeparavo omee vaerä yandeve yerovia opambae vae Jesucristo rupi vae, peiporarata güire michi pegua jae etei pembojupita, pemomɨ̈ratata jare pemoäta ngatuta.

¹¹ Jae toyemboeteuka jare timbaepuere jekuaekuae avei rupi. ¡Amén!

Tamaraeme reta

¹² Kuae mbovɨ aikuatía peve pomboarakuaa vaerä, jare arajaukata Silvano ndive peve, jae ko yanderɨvɨ jupi vae; amombeu peve kuae Tumpa ipɨakavi añetete vae ko, pe reta peï pɨpe vae.

¹³ Opaete oporogüɨrovia vae Babilonia pe ñogüɨnoi vae omondo peve tamaraeme. Tumpa oiparavo reta jae peparavo rami. Jaeramiño vi cheraɨ Marcos omondo peve tamaraeme.

¹⁴ Peyapo maraetei oyoupe peyovapɨte peyoaɨu reve kavi. Mbɨakatu toï opaete pe reta Jesucristo re peï vae ndive. ¡Amén!