1 Pedro 3 - Biblia Guarani Tumpa Iñee

Omenda vae reta kërai yogüɨreko vaerä

¹ Jaeramiño vi pe kuña reta peiko peme reta jeia re, jökorai yave, güɨroviambae Tumpa iñee vae reta ipuere güɨrovia pereko rupi, oyemombeumbae reve chupe reta.

² Oecha yave pereko reta jupi, jare peporomboete.

³ Peyemboete reta agüɨye kia oecha vaeräño, peñemopöra oro pe vae, ani temimonde jepɨ yae vae,

⁴ jaeño tipöra peɨvɨte, pepɨa pe, oikomeguambae vae pe. Ñemomichi pe jare mbɨakatu pe, kuae ko ikavi yae Tumpa pe.

⁵ Echa jökorai tenondegua kuña oñeñono tee vae reta oñemopöra, güɨrovia Tumpa re vae reta, yogüɨreko reve ime reta jeia re.

⁶ Sara oiko Abraham jeia re rami, jei reve chupe: “Cheya.” Pe reta ko jae imemɨkuña reta peyapo yave ikavi vae, pekɨɨyembae reve mbaembae güi.

⁷ Jaeramiño vi pe kuimbae reta, peiko perembireko ndive pearakuaa reve kavi, pemboete reve vaso tätambae rami, jae reta vi ko güɨnoi tekove pe reta rami, peyerure reta agüɨye vaerä güɨnoi yemboavai.

Yemongeta ikavigüe

⁸ Ïru mbae ye. Penoi metei ramiño yemongeta, peyoparareko, peyoaɨu, pepɨakavi jare peïru pota,

⁹ ikavimbae oyapo peve vae pe agüɨye pemboekovia ikavimbae pe, agüɨye peyepopeyu oyepopeyu peré vae re, ërei peñee kavi, echa peikuaa ko peyeparavo penoi vaerä mborerekua.

¹⁰ Echa jei: “Kia oipota oaɨu yave tekove jare oecha ara ikavigüe vae, ikü togüɨroyeandu ikavimbae güi, jare agüɨye toporombotavɨ.

¹¹ Tosɨrɨ ikavimbae güi, jare toyapo ikavi vae, tipɨakatu avei opaete vae ndive.

¹² Echa yandeYa oyangareko jupi vae reta re, jare oyeapɨsaka avei oï iyerure reta re; ërei yandeYa iyarasɨ ko ikavimbae vae oyapo vae reta kotɨ.”

¹³ ¿Kia pa oyapota ikavimbae vae peve, peyapo avei yave ikavi vae?

¹⁴ Ërei peiporara yave jupigüe peyapo vae re, peyerovia. Jáeramo agüɨye pekɨɨye chugüi reta ani peyembojopa.

¹⁵ Pemboete yandeYa Tumpa pepɨa pe. Peïndaivi avei peï peñemomichi reve, peñemoe vaerä oparandu peve maera ra peäro peï peyerovia reve vae reta pe,

¹⁶ peyemongeta ikavi rupi, iñeenguru pekotɨ ikavimbae peyapo vaeecha vae reta, imara vaerä peangao perembiapo kavi Cristo re vae reta.

¹⁷ Echa ikavi ko peiporara ikavi vae peyapo reve, Tumpa oipota yave, ikavimbae peyapo vae re peiporara vae güi.

¹⁸ Cristo vi metei veseño oiporara yandeyoa reta re. Jupi vae oiporara jupimbae vae reta re, yandereraja vaerä Tumpa pe. Jae jete omano kuimbae rami ërei oikove ye Espíritu pegua.

¹⁹ Jare espíritu rupi ojo omoërakua omanogüe reta tembipɨɨ rami ñogüɨnoi vae pe.

²⁰ Echa Noé oiko yave jae reta mbaetɨ güɨrovia Tumpa jei vae, yepe tëi Tumpa ipɨaguasu chupe reta jare oäro Noé jókuae barco guasu oyapo oiko ramboeve. Ërei juriño oasayepe ɨ güi.

²¹ Jókuae ɨ ombojaanga añave pe reta peyemboasauka peyembobautisauka yave Jesucristo oikove ye ou omanogüe vae reta ipɨte güi ramo. Pepuereä peyemboasauka peyoe perete vae rupi. Jaeño peyemongeta kavi yave Tumpa kotɨ.

²² Jesucristo ojo ma ara pe vae oime oï Tumpa iyakatu kotɨ; jae jeia re ñogüɨnoi araɨgua reta, mburuvicha reta jare mbaepuere güɨnoi vae reta.