1 Pedro 2 - Biblia Guarani Tumpa Iñee

¹ Jáeramo, peeya opaete ikavimbae vae, opaete mborombotavɨ, opaete tova mókoi, akatúä reta jare opaete ñeeasɨ katu.

² Peyúe neche oyeambae vae ara pegua, michia oa ramo vae ikambúe rami, jókuae rupi pekuakuaa vaerä jare penoi vaerä yemboasa,

³ peikuaa yave yandeYa ipɨakavi ko vae.

Ita oikove vae

⁴ Peyemboya yandeYa re, jae ko jókuae ita oikove vae, ɨvɨ pegua reta güɨröɨro jókuae ita. Ërei Tumpa peguarä ko oyeparavogüe jare ikavigüe.

⁵ Jaeramiño vi pe reta ko jae ita oikove vae reta rami, peyeapo metei o Espíritu pegua vae jare sacerdote pegua mbaravɨkɨ ikɨambae vae, pemee vaerä mbota Espíritu pegua Tumpa omboyerovia vae Jesucristo rupi.

⁶ Echa Tumpa Iñee jei vi: “Mase, ko añonota Sión pe metei ita, o ekina iguapɨka okúembae, ita oyeparavogüe, ikavi yae vae, jese güɨrovia vae ngaraa oñemomaraiuka.”

⁷ Pe perovia jese vae reta peguarä ko jae ita ikavigüe; ërei mbaetɨ güɨrovia jese vae reta pe ko: “O iyapoa reta güɨröɨro ita vae, ou opɨta o ekina iguapɨkarä.”

⁸ Jae ko metei ita pɨ̈sa-yeyuka pegua, ita oporopɨaka vae. Echa jae reta oyepɨaka reta Tumpa iñee oendúä ramo, jókuae ra oyembojee reta ramo.

Pe reta ko Tumpa imbae vae reta

⁹ Ërei pe reta ko jae ñemuña oyeparavogüe, sacerdote reta, tëtaguasu oñeñono tee vae, Tumpa peparavo jae imbaerä, pemoërakua vaerä mbae tuichagüe oyapogüe, perenoe pɨtumimbi güi peiko vaerä jembipe ikavi yae vae pe.

¹⁰ Tenonde yave pe reta Tumpa imbae retaä ko, ërei añave peyeapo ma Tumpa imbae retarä; tenonde yave Tumpa mbaetɨ peparareko, ërei añave peparareko.

Peiko Tumpa pe oyeokuai vae rami

¹¹ Cherɨvɨ aaɨu vae reta, pomoñera ketɨgua rami peiko kuae ɨvɨ pe vae, peyeandu pesoo jemimbota reta oïraro perekove vae güi.

¹² Peechauka kavi pereko oporogüɨroviambae vae reta ipɨte pe. Iñeenguru pekotɨ ikavimbae peyapo vaeecha vae reta, oecha perembiapo ikavi vae yave, omboete retata Tumpa, iporojäa iara pe.

¹³ YandeYa perovia ramo peyapo opaete mburuvicha reta ɨvɨ pegua jei vae; mburuvicha guasu, echa peruvicha ko,

¹⁴ tëta ruvicha, echa Tumpa ko ombou reta peve oiporarauka vaerä ikavimbae vae oyapo vae reta pe jare ombotuichauka vaerä ikavi vae oyapo vae reta.

¹⁵ Echa Tumpa jemimbota jae ko ikavi vae peyapo vae rupi pemokïrii iyarakuaambae vae reta.

¹⁶ Agüɨye peiko oyepɨɨgüe rami, ërei yeyora pe peï agüɨye peiporu ikavimbae vae peyapo vaerä, jaeño Tumpa pe peyeokuai.

¹⁷ Pemboete opaete vae. Peaɨu oporogüɨrovia vae reta. Peipoɨu Tumpa güi. Pemboete mburuvicha guasu.

¹⁸ Tembiokuai reta, peiko peya jeia re pemboete reve; agüɨye peya reta ipɨakavi jare ipɨaguasu vae reta peño, ipɨa pochɨ vae reta pe vi.

¹⁹ Echa ikavi ko kia oiporara yave Tumpa jóvai jupimbae reve.

²⁰ Echa ikavimbae peyapo vae re peiporara jare peropɨa yave ¿oyemboeteta pa? Ërei peiporara yave ikavi vae peyapo jeko pegua, jókuae ko omboyeroviata Tumpa.

²¹ Echa kuaerä Tumpa peparavo. Echa Cristo oiporara yanderé; oeya yandeve yayapo vaerä jae oyapo rami;

²² echa Cristo mbaetɨ etei iyoa. Mbaetɨ etei oporombotavɨ.

²³ Yepe tëi ïru vae reta jei ikavimbae vae ikotɨ, ërei jae mbaetɨ omboyevɨ ñee ikavimbae vae ikotɨ reta. Oiporara oï yave, mbaetɨ jei oiporaraukata ko chupe reta vae. Jaeño oñono Tumpa oporojäa jupi rupi vae ipo pe.

²⁴ Cristo etei güɨraja yandeyoa reta jete re kurusu re, yande ñamano ñaï mbaeyoa pe vae yaikove vaerä jupi vae re. Jare jae oyekutu vae rupi yakuera.

²⁵ Echa opaete pe reta peropa yepi vecha reta jopa rami, ërei añave peyerova ye ma Oyangareko vae jare Omae peré vecha re rami vae kotɨ.