1 Juan 5 - Biblia Guarani Tumpa Iñee

Mborogüɨrovia oporomoamɨri vae

¹ Opaete güɨrovia Jesús ko jae Cristo vae reta güɨnoi ko tekove Tumpa güi. Jare oaɨu yandeRu Tumpa vae oaɨu vi Tumpa taɨ reta.

² Yaaɨu yave Tumpa jare yayapo yave jae iporookuai reta, yaikuaa yayoaɨu ko yande Tumpa taɨ reta.

³ Echa yaaɨu yave Tumpa, yayapo iporookuai reta; jare mbaetɨ ko yavai yayapo vaerä iporookuai reta.

⁴ Tekove Tumpa güi güɨnoi vae omoamɨri ɨvɨ pegua teko. Yandeporogüɨrovia rupi ko ñamoamɨri ɨvɨ pegua teko.

⁵ Güɨrovia Jesús ko jae Tumpa Taɨ vae, omoamɨri ɨvɨ pegua teko.

Espíritu Santo omombeu vae

⁶ Kuae Jesucristo ko jae omboɨpɨ iparavɨkɨ ɨ jare tugüɨ rupi vae; mbaetɨ ɨ rupiño, ɨ rupi jare tugüɨ rupi vi. Espíritu Santo ko omombeu kuae regua. Echa Espíritu Santo añete vae ko.

⁷ Oime ko mboapɨ ara pe omombeu kuae regua vae, jae ko: YandeRu, Ñee jare Espíritu Santo. Kuae mboapɨ reta meteiño ko.

⁸ Jökoraiño vi oime mboapɨ ɨvɨ pe omombeu kuae regua vae, jae ko: Espíritu Santo, ɨ jare tugüɨ; kuae mboapɨ reta imiari oyovake.

⁹ Kuimbae reta omombeu yandeve vae yarovia, ërei Tumpa omombeu yandeve vae ko añetetegüe. Jökorai ko Tumpa omombeu yandeve Taɨ regua vae.

¹⁰ Tumpa Taɨ re güɨrovia vae, güɨnoi ko ipɨa pe jókuae oñemoërakua vae; mbaetɨ güɨrovia Tumpa re vae, omboapu ko Tumpa, echa mbaetɨ güɨrovia Tumpa omombeu Taɨ regua vae.

¹¹ Jare Tumpa omombeu yandeve vae jae: Jae omee yandeve tekove opambae vae; kuae tekove oï Taɨ re.

¹² Tumpa Taɨ güɨnoi ipɨa pe vae, güɨnoi tekove; ërei mbaetɨ Tumpa Taɨ güɨnoi ipɨa pe vae, mbaetɨ güɨnoi tekove.

Tekove opambae vae yaikuaa vae regua

¹³ Kuaekuae aikuatía peve, pe perovia Tumpa Taɨ jee re vae reta pe, peikuaa vaerä penoi ko tekove opambae vae.

¹⁴ Jare yandepuere yarovia katu Tumpa, echa yaikuaa Tumpa oendu ko yandeve yayerure yave chupe jae jemimbota rupi mbae re.

¹⁵ Jare yaikuaa jae oendu ko yandeve oipotagüe mbae re yayerure chupe yave, yaikuaa jae oyapota ko yandeyerure.

¹⁶ Metei oporogüɨrovia vae oecha yave iñeïru oporogüɨrovia vae oyapo mbaeyoa mano peguambae vae yave, toyerure Tumpa pe jese, jare Tumpa omeeta oikoño vaerä; kuae ko oyapo mbaeyoa mano peguambae vae reta pegua. Oime ko mbaeyoa mano pegua, jókuae re mbaetɨ jae peve peyerure vaerä.

¹⁷ Opaete mbae jupimbae vae mbaeyoa ko. Ërei oime ko mbaeyoa mano peguambae vae.

¹⁸ Tumpa güi güɨnoi tekove vae, yaikuaa mbaetɨ ko oyapo mbaeyoa. Echa Tumpa Taɨ etei oyangareko jese, jare aña guasu ngaraa opoko jese.

¹⁹ Yaikuaa ko yande jae Tumpa taɨ reta, jare kërai aña guasu güɨnoi mbaepuere opaete ɨvɨ re.

²⁰ Jaeramiño vi yaikuaa ko Tumpa Taɨ ou kuae ɨvɨ pe jare omee yandeve yaikuaa vaerä Tumpa añetete vae; jare ñaï ma añetete vae re, jae ko Jesucristo Tumpa Taɨ re. Jae ko kuae Tumpa añetete vae jare tekove opambae.

²¹ Cheraɨ aaɨu vae reta, peyeandu tumpa-raanga reta güi. ¡Amén!