1 Juan 4 - Biblia Guarani Tumpa Iñee

Tumpa iEspíritu jare Cristo re oyemboyovaicho vae iespíritu

¹ Cherɨvɨ aaɨu vae reta, agüɨye perovia opaete espíritu re, jaeño pejäa Tumpa pegua ra, echa kuae ɨvɨ pe jeta oë ñeemombeúa jaanga reta.

² Kuae rupi pepuere peikuaa Tumpa iEspíritu: Opaete vae omombeu Jesucristo ko jae oyeapo kuimbaerä vae yave, jae ko Tumpa güi ou vae.

³ Ërei opaete vae omombeu Jesucristo mbaetɨ ko oyeapo kuimbaerä vae yave, mbaetɨ ko ou Tumpa güi. Jókuae jae ko Cristo re oyemboyovaicho vae iespíritu, jae ko pe reta peikuaa outa vae, jare añave oime ma oï ɨvɨ pe.

⁴ Cheraɨ aaɨu vae reta, pe reta ko jae Tumpa imbae reta, jare pemoamɨri ma añetembae re oporomboe vae reta. Echa oï peré vae tuichagüe yae ko jókuae kuae ɨvɨ pe oï vae güi.

⁵ Echa jae reta ɨvɨ pegua ko. Jáeramo imiari mbaembae ɨvɨ pegua reño, jare ɨvɨ pegua reta oyeapɨsaka kavi jese reta.

⁶ Ërei yande ko jae Tumpa imbae reta. Kia oikuaa Tumpa vae, oyeapɨsaka yanderé. Ërei kia Tumpa imbaeä vae, mbaetɨ oyeapɨsaka yanderé. Körai yandepuere yaikuaa añete vae pegua espíritu ani tavɨ pegua.

Tumpa ko mboroaɨu

⁷ Cherɨvɨ aaɨu vae reta, yayoaɨu päve. Echa Tumpa güi ko ou yandeve mboroaɨu. Jókuae oporoaɨu vae güɨnoi tekove Tumpa güi, jare oikuaa ko Tumpa.

⁸ Mbaetɨ oporoaɨu vae oikuaaä ko Tumpa. Echa Tumpa ko mboroaɨu.

⁹ Kuae re ko oyekuaa Tumpa iporoaɨu yande kotɨ, kërai jae ombou Taɨ jaevaeño ɨvɨ pe, yande ñanoi vaerä tekove.

¹⁰ Kuae re oï mboroaɨu: Mbaetɨ ko yande yaaɨu Tumpa ramo, jaeño jae yanderaɨu jare ombou Taɨ rupi iñɨ̈ro vaerä yandeyoa reta re.

¹¹ Cherɨvɨ aaɨu vae reta, Tumpa jökorai yanderaɨu, jáeramo ikavi ko yande yayoaɨu päve vaerä.

¹² Mbaetɨi kia ave oecha Tumpa. Ërei yayoaɨu päve yave, Tumpa oiko yanderé, jare iporoaɨu okuakuaa yanderé.

¹³ Jare kuae re yaikuaa yaiko ko Tumpa re vae, jare jae oiko ko yanderé vae, jae ko Espíritu Santo omee yandeve vae rupi.

¹⁴ Jare ore roecha jare romoërakua Tumpa ombou Taɨ ɨvɨ pegua reta Omboasa vae.

¹⁵ Oime yave kia “Jesús ko jae Tumpa Taɨ” jei vae, Tumpa oï jese jare jae oï Tumpa re.

¹⁶ Yaikuaa ko jare yarovia ko Tumpa yanderaɨu. Tumpa ko mboroaɨu; oiko mboroaɨu pe vae oiko ko Tumpa re jare Tumpa oiko jese.

¹⁷ Jare kuae re okuakuaa mboroaɨu yanderé, yandepuere vaerä ñaï Tumpa jóvai yakɨɨyembae reve jókuae iporojäa iara pe. Echa kuae ɨvɨ pe yaiko ramboeve, jae rami ko yaiko.

¹⁸ Mboroaɨu oimea pe mbaetɨ kɨɨye, jaeño mboroaɨu ikavi yae vae ombosɨrɨ kɨɨye, echa kɨɨye güeru mbaeporara; jáeramo okɨɨye vae mbaetɨ ko oikuaa kavi Tumpa iporoaɨu.

¹⁹ Yande yaaɨu Tumpa, echa jae räri yanderaɨu.

²⁰ Oime yave kia “che aaɨu Tumpa” jei vae, ërei omotareɨ yave iñeïru oporogüɨrovia vae, iyapu yae ko. Echa iñeïru oporogüɨrovia vae oecha etei vae mbaetɨ oaɨu yave, ¿këraita pa oaɨu Tumpa oechambae vae?

²¹ Jare Jesucristo oeya yande kuae mborookuai: Oaɨu Tumpa vae, toaɨu vi iñeïru oporogüɨrovia vae.