1 Juan 3 - Biblia Guarani Tumpa Iñee

Tumpa taɨ reta

¹ Mase, kërai yandeRu Tumpa yanderaɨu yae, ñanereenɨi jae taɨ retarä. Jáeramo ɨvɨ pegua reta mbaetɨ yandekuaa, echa jae reta mbaetɨ oikuaa Tumpa.

² Cherɨvɨ aaɨu vae reta, añave yande ko jae Tumpa taɨ reta ma. Jare ndeiño oyekuaa kërai eteita ko yande vae, ërei yaikuaa Cristo ramita ko yande jae ou ye yave, echa yaechata jae etei.

³ Jare opaete oäro oï vae reta, oyetɨo avei, echa Cristo ikɨambae ko.

⁴ Ërei iyoa vae, oyavɨ ko Tumpa iporookuai; echa mbaeyoa oñemopüa ko Tumpa kotɨ.

⁵ Jare peikuaa kërai Jesucristo oyeapo kuimbaerä omboai vaerä yandeyoa reta. Jare jae mbaetɨ etei iyoa.

⁶ Oï avei Jesucristo re vae, mbaetɨ iyoa. Iyoa vae mbaetɨ ko oecha ani oikuaa Jesucristo.

⁷ Cheraɨ aaɨu vae reta, agüɨye kia tapembotavɨ. Jupi vae oyapo vae, jupi ko, Jesucristo jupi rami.

⁸ Jekuaeño mbaeyoa oyapo vae aña guasu imbae ko. Echa aña guasu iyoa avei iyɨpɨ güive. Tumpa Taɨ oyeapo kuimbaerä omboai vaerä aña guasu iparavɨkɨ.

⁹ Tumpa güi tekove güɨnoi vae mbaetɨ oyapo mbaeyoa, echa güɨnoi ma tekove Tumpa güi; mbaetɨ ipuere oyapo mbaeyoa, echa güɨnoi ma tekove Tumpa güi.

¹⁰ Yandepuere yaikuaa kia ra ko jae Tumpa taɨ reta jare kia ra ko jae aña guasu taɨ reta vae. Opaete kia jupimbae oyapo vae, jare mbaetɨ oaɨu ïru oporogüɨrovia vae, Tumpa taɨä ko.

¹¹ Echa iyɨpɨ güive peendu kuae ñee: “Yayoaɨu päve oyoupi.”

¹² Agüɨye yaiko Caín rami. Echa Caín aña guasu imbae ko jare oyuka tɨvɨ. Jare ¿maera ra oyuka? Caín oyapo ikavimbae vae, jare tɨvɨ oyapo jupi vae ramo.

¹³ Cherɨvɨ reta, agüɨye pepɨakañɨ ɨvɨ pegua reta pemotareɨ yave.

¹⁴ Yande yaikuaa yaasa ma ko mano güi tekove pe, jókuae yaikuaa yayoaɨu vae rupi. Mbaetɨ oaɨu ïru oporogüɨrovia vae, omano vɨteri ko oï.

¹⁵ Iñeïru oporogüɨrovia vae omotareɨ vae, oporoyuka vae rami ko. Jare peikuaa ko metei oporoyuka vae mbaetɨ etei güɨnoi tekove opambae vae iyé.

¹⁶ Kuae re yaikuaa kërai ko mboroaɨu vae, echa Jesucristo omano yanderé. Jaeramiño vi ikavi ko yande ñamee yanderekove ïru oporogüɨrovia vae reta re.

¹⁷ Ërei oime yave kia oikokatu kuae ɨvɨ pe vae, jare oecha ïru oporogüɨrovia vae pe oata mbae vae mbaetɨ oiparareko yave, ¿këraita pa oï jese Tumpa iporoaɨu?

¹⁸ Cheraɨ aaɨu vae reta, agüɨye yayoaɨu ñaneñee peño ani yandeyuru peño, toyekuaa yayapo vae rupi jare añetete rupi.

¹⁹ Kuae re yaikuaa yande ko añete vae pegua, jare yandepuere ñaï pɨagüive jae jóvai.

²⁰ Echa yandepɨa omboeta yandeve vae güi ko Tumpa iporomboeta tuicha yae, echa jae oikuaa opaete mbaembae.

²¹ Cherɨvɨ aaɨu vae reta, mbaetɨ yave yandepɨa omboeta, yayeko Tumpa re;

²² oipotagüe mbae yaiporu chupe vae jae omeeta yandeve, yayapo iporookuai reta jare mbaembae omboyerovia vae ramo.

²³ Jare Tumpa yandeokuai vae jae ko yarovia vaerä Taɨ Jesucristo jare yayoaɨu päve vaerä jae yandeokuai rami.

²⁴ Jare Tumpa iporookuai reta oyapo vae oiko avei ko Tumpa re, jare Tumpa jese. Jare kuae re yaikuaa Tumpa oiko ko yanderé vae: Jae ko Espíritu Santo omee vae rupi.