1 Juan 1 - Biblia Guarani Tumpa Iñee

Ñee tekove pegua

¹ Roikuatía peve Ñee tekove opambae vae regua. Jae oikoño mai ndei ɨvɨ oyeapo mbove. Jare ore roendu jókuae Ñee. Roecha kavi, romae jese. Royavɨkɨ vi orepo pe etei.

² Jókuae Ñee tekove opambae vae etei ko, ore etei roecha. Romoërakua peve jae ko tekove opambae vae. Jae oimeño mai oiko yandeRu Tumpa ndive, ërei oyekuaa oreve.

³ Romombeu peve roecha jare roendu vae, pe reta vi peñemoïru vaerä ore ndive. Jare kuae ñañemoïru vae añetete ko yandeRu Tumpa jare Taɨ Jesucristo ndive.

⁴ Kuae mbaembae regua roikuatía peve peyerovia yae vaerä.

Tumpa ko tembipe

⁵ Romombeu peve ñee Jesucristo omombeu oreve vae. Jae ko kuae: Tumpa ko tembipe, mbaetɨ etei jese kërai ave pɨtumimbi.

⁶ Yae yave ñañemoïru ma ko jae ndive, ërei yaiko yave pɨtumimbi pe yandeapu ko, jare mbaetɨ yayapo añete vae.

⁷ Ërei yaiko yave tembipe pe, Tumpa oiko tembipe rami, ñañemoïru ko oyoupi, jare Taɨ Jesucristo jugüɨ yandeyoe opaete mbaeyoa güi.

⁸ Yae yave mbaetɨ ko yandeyoa, yayembotavɨ ko yande aeño. Mbaetɨ etei ko oï yanderé añete vae.

⁹ Yamombeu yave Tumpa pe yandeyoa reta, jae ko jupi yae iñɨ̈ro vaerä yandeyoa reta re jare yandeyoe vaerä opaete ikavimbae güi.

¹⁰ Yae yave mbaetɨ ko yayapo mbaeyoa, yamboapu ko Tumpa jare iñee mbaetɨ oï yanderé.