1 CRÓNICAS 5 - Biblia Guarani Tumpa Iñee

Rubén iñemuña reta

^1-3 Rubén, Israel taɨrɨpɨ taɨ reta jae: Hanoc, Falú, Hezrón jare Carmi. Rubén, añetete ko jae Israel taɨrɨpɨ, ërei membɨrɨpɨyekou imbaerä tëi vae oyemboasa José taɨ reta pe chugüi, echa Rubén güɨroke tu jembireko. Ërei ngatu Judá imbaepuere yae opaete tɨvɨ reta güi, jare chugüi oë mburuvicharä; ërei membɨrɨpɨyekou oñemee José pe.

^4-6 Joel iñemuña reta jae: Semaías, Semaías taɨ jae Gog, Gog taɨ jae Simei, Simei taɨ jae Micaía, Micaía taɨ jae Reaía, Reaía taɨ jae Baal, Baal taɨ jae Beera. Beera jae ko Rubén iñemuña reta juvicha, jae ko mburuvicha guasu Tiglat-pileser Asiria pegua güɨraja tembipɨɨrä vae.

⁷ Beera jëtara reta oñemoñesɨro kavi oñemoapɨta oï vae juvicha jae: Jeiel, Zacarías

⁸ jare Bela, Azaz taɨ, Sema jɨmɨmino, Sema jae Joel taɨ. Bela oiko Aroer pe, iɨvɨ ojoi oväe Nebo pe jare Baal-meón pe.

⁹ Kuaraɨ oëa kotɨ oñemoëta reta ñuu rupi, ɨ̈aka Éufrates kotɨ güi ñuu ou vae pe regua, echa jeta yae oñemuña jɨmba reta ɨvɨ Galaad pe.

¹⁰ Saúl oiko yave mburuvicha guasurä, Rubén iñemuña reta oñeraro Agar imembɨraɨe iñemuña reta ndive, omoamɨri jare oñemoëta reta jëtagüe pe, ɨvɨ Galaad kuaraɨ oëa kotɨgua pe.

Gad iñemuña reta

¹¹ Gad iñemuña reta yogüɨreko Rubén iñemuña reta jóvai ɨvɨ Basán pe tëta guasu Salca pe regua vae jae:

¹² Joel jae mburuvicha, jaɨkuegua Safán, jae jaɨkuegua Jaanai, jare Safat.

¹³ Jëtara reta jee oñesɨro kavi rupi vae jae: Micael, Mesulam, Seba, Jorai, Jacán, Zía jare Heber, opaete reve chiu.

¹⁴ Abihail, Huri taɨ, Huri jae Jaroa taɨ, Jaroa jae Galaad taɨ, Galaad jae Micael taɨ, Micael jae Jesisai taɨ, Jesisai jae Jahdo taɨ Jahdo jae Buz taɨ.

¹⁵ Ahí jae Abdiel taɨ, Guni jɨmɨmino, jae oiko jëtara reta juvicharä.

¹⁶ Opaete jae reta yogüɨreko Galaad pe, Basán pe jare tëta raɨ raɨ iyɨvɨrigua rupi, jare ɨvɨ Sarón pe jɨmba reta omongarúa rupi, ojoi oväe jembeɨ pe regua.

¹⁷ Opaete kuae reta oñemoapɨta tëtara pegua tembikuatía pe, Jotam mburuvicha guasu Judá pegua iara pe jare Jeroboam mburuvicha guasu Israel pegua iara pe.

Mókoi ñemuña jare metei oyemboyao vae regua

¹⁸ Rubén jare Gad iñemuña reta jare Manasés iñemuña reta oyemboyaogüe, jae ko kuimbae jëia yae vae reta, güɨnoi reta yeopiaka, kɨsepuku jare uvɨ jare ipoki yae oñeraro vaerä. Oupitɨ cuarenta y cuatro mil seteciento sesenta kuimbae ñeraro regua reta.

¹⁹ Kuae oñoraro reta Agar imembɨraɨe iñemuña reta ndive, jare Jetur, Nafis jare Nodab iñemuña reta ndive.

²⁰ Ërei Tumpa omborɨ reta, jare Agar imembɨraɨe iñemuña reta opaete imborɨa reta ndive oa ipo pe, echa ñeraro pɨte pe oyerure reta Tumpa pe omborɨ vaerä. Jare Tumpa omborɨ reta echa güɨrovia reta jese.

²¹ Javoi oipɨɨ reta opa güɨraja jovaicho reta jɨmbagüe, cincuenta mil camello, dosciento cincuenta mil vecha jare dos mil mburika. Oipɨɨ reta vi cien mil tovaicho.

²² Jeta yae omano tovaicho, echa Tumpa etei ko oñeraro. Jare oñemoëta reta joko pe, tembipɨɨrä opa oyererajauka regua.

²³ Manasés iñemuña reta oyemboyaogüe yogüɨreko ɨvɨ Basán güive ojoi oya Baal-hermón pe, Senir jare ɨvɨtɨ Hermón pe, echa jeta yae ko oñemuña reta.

²⁴ Jëtara juvicha reta jae: Efer, Isi, Eliel, Azriel, Jeremías, Hodavías jare Jahdiel, opaete reve kuimbae jëia vae reta ko, kuimbae jërakua vae jare tëtara juvicha reta.

²⁵ Ërei oyembopɨapochɨ reta iñemuñagüe reta iTumpa kotɨ jare omboete reta jókuae ɨvɨ pegua tëta reta itumpa-raanga, jókuae Tumpa opa omoë omombo jae reta jenonde güi vae.

²⁶ Jókuae jeko pegua, Israel iTumpa ombopɨa-kɨ̈reɨ Pul, mburuvicha guasu Asiria pegua, jae ko Tiglat-pileser, jae opa güɨnoe Rubén iñemuña reta jare Gad iñemuña reta jare Manasés iñemuña reta oyemboyaogüe iɨvɨ güi; jare opa güɨraja reta Halah pe, Habor, Hara jare ɨ̈aka Gozán pe, añave yogüɨrekoa pe.