1 CRÓNICAS 25 - Biblia Guarani Tumpa Iñee

Otairari vae reta jare ombaembopu vae reta

¹ Jökoraiño vi David jare Israel pe tenondegua vae reta oiparavo mbaravɨkɨ peguarä Asaf taɨ reta, Hemán taɨ reta jare Jedutún taɨ reta, itairari reta rupi omoërakua vaerä oikota kuri vae arpa ndive, ngitara ndive jare platillo ndive. Kuae jae kuimbae reta ipoki mbaravɨkɨ peguarä vae jee:

² Asaf taɨ reta güi: Zacur, José, Netanías jare Asarela. Oporombotairari vae jae tu Asaf, jae omombeu oikota kuri vae mburuvicha guasu iporookuai rupi.

³ Jedutún taɨ ova vae reta güi jae: Gedalías, Zeri, Jesaías, Hasabías, Matatías jare Simei. Oporombotairari vae jae tu Jedutún, jae itairari rupi omoërakua oikota kuri vae arpa ndive, omee vaerä yasoropai jare mbaemboete yandeYa pe.

⁴ Hemán taɨ reta güi jae: Buquías, Matanías, Uziel, Sebuel, Jeremot, Hananías, Hanani, Eliata, Gidalti, Romanti-ezer, Josbecasa, Maloti, Hotir jare Mahaziot.

⁵ Opaete kuae reta jae Hemán taɨ reta; Hemán jae ko mbae re oecha voi vae, mburuvicha guasu pe oyeokuai vae, Tumpa güɨrökuavee chupe imbaepuere yae vaerä; echa Tumpa omee Hemán güɨnoi vaerä catorce taɨ jare mboapɨ tayɨ.

⁶ Opaete kuae reta tu ombotairari, otairari reta yave tupao pe omoïru reve platillo pe, ngitara pe jare arpa pe. Asaf, Jedutún jare Hemán ñogüɨnoi mburuvicha guasu jeia re.

⁷ Opaete reve ipoki otairari vae jare ïru jëtara oikatu otairari yandeYa pe vae reta oupitɨ dosciento ochenta y ocho.

⁸ Jayave omboyao reta oyoupe suerte rupi mbaravɨkɨ; ñogüɨnoi mbaravɨkɨ pe tenondegua taɨkuegua ndive ani oyemboe ramo vae oikatu vae ndive.

^9-31 Oyeapo yave suerte oyemboyao opɨta tenondegua güive veinticuatroa pe vae jae: José, Asaf taɨ Gedalías Zacur Izri Netanías Buquías Jesarela Jesahías Matanías Simei Azareel Hasabías Subael Matatías Jeremot Hananías Josbecasa Hanani Maloti Eliata Hotir Gidalti Mahaziot Romanti-ezer Metei vae ñavo taɨ reta ndive jare jëtara reta ndive. Opaete reve doce.