1 CRÓNICAS 21 - Biblia Guarani Tumpa Iñee

David oipapa opaete vae

¹ Satanás oñemopüa Israel iñemuña reta re jare omokɨ̈reɨ David ipɨa pe oipapa vaerä Israel iñemuña reta.

² Jayave David oyókuai Joab jare tëta pegua mburuvicha reta, jei: —Pekua peipapa Israel iñemuña reta Beerseba güive Dan pe, jare peru cheve aikuaa vaerä mbovɨ ra oime vae.

³ Ërei Joab jei: —YandeYa tomoïru cien vese ye kuae tëta cheruvicha; ¿opaete jae reta ndeve oyeokuai vaeä pa ko? ¿Maera pa kuae reipota reyapo cheruvicha? ¿Maera pa reitɨta Israel iñemuña reta mbaeyoa pe?

⁴ Ërei ngatu mburuvicha guasu iñeepɨ̈rata yae Joab pe, jare jae oë ojo ombaepapa opaete Israel rupi javoi ou Jerusalén pe omombeu David pe mbovɨ oime vae.

⁵ Jare Joab omombeu David pe mbovɨ opaete reve Israel pegua vae, jae ko: Metei millón cien mil kuimbae ipuere ma ñeraro pe yogüɨraja vae, jare Judá pegua reta cuatrociento setenta mil.

⁶ Ërei mbaetɨ oipapa Leví jare Benjamín iñemuña reta, echa Joab pe mbaetɨ jaekavi kuae mborookuai mburuvicha guasu omee vae.

⁷ Jökoraiño vi Tumpa pe mbaetɨ etei jaekavi, jare ombou tembiporara Israel iñemuña reta re.

⁸ Ërei David oyemombeu Tumpa pe jei: —CheYa, cheyoa ko tuicha ayapo ramboeve kuae, ërei añave romoñera neɨ̈ro vaerä cheve cheyoa re, echa ayapo ko yarakuaambae rami.

⁹ Jayave yandeYa jei mbae re oecha voi vae Gad pe, jae ko David pe oyeokuai vae:

¹⁰ “Ekua nemiari David pe, ere chupe: YandeYa jei körai: ‘Mboapɨ mbae añonota ndeve, eiparavo chugüi metei ayapo vaerä ndeve.’ ”

¹¹ Gad ojo David pɨri jei chupe: —YandeYa jei körai:

¹² Eiparavo: Karuai mboapɨ añota vae, ani mboapɨ yasɨ neamɨrita reiko nderovaicho reta jóvai vae, ani yandeYa oiporaraukata mboapɨ ara vae, kuae ko jae mbaerasɨ ovakatu vae yandeYa iaraɨgua güeruta opaete kuae ɨvɨ Israel re vae. Eiparavo añave, amombeu vaerä chembou vae pe.

¹³ Jayave David jei Gad pe: —Chepɨatɨtɨ yae aï. Ërei romoñera, che taa yandeYa ipo pe, echa iporoparareko tuicha yae ko, agüɨye taa kuimbae reta ipo pe.

¹⁴ Jayave yandeYa ombou mbaerasɨ ovakatu vae Israel iñemuña reta re, jare setenta mil omano reta.

¹⁵ YandeYa ombou iaraɨgua omboai vaerä Jerusalén. Ërei omboai ma güɨnoi yave, yandeYa omae jare jasɨ ipɨa pe jókuae susere ombou vae re, jare jei jókuae araɨgua pe: “¡Joko peño mo!” YandeYa iaraɨgua oï Jebús pegua Ornán itrigo oyembopiriría pe.

¹⁶ David omopüa iñäka yave oecha yandeYa iaraɨgua oyekuaa oï ɨvate, güɨnoi ipo pe ikɨsepuku güɨnoe jɨru güi vae güɨropövee Jerusalén kotɨ. Jayave David jare tenondegua reta ndive, oyetavatɨka itindɨasɨ reve ɨvɨ re, oñeapeva reve temimonde mbɨatɨtɨ pegua pe,

¹⁷ jare David jei Tumpa pe: —¡Che ko aporookuai oyepapa vaerä opaete vae! ¡Che ko cheyoa, che ko ayapo ikavimbae! ¿Mbae pa kuae jekombae reta oyapo? CheYa Tumpa, cheré eitɨ neporonupa jare cheñemuña reta re, agüɨye mbaerasɨ ovakatu vae tou tëta ndembae vae re.

David omopüa metei mɨmba oyeyuka oyeapɨ jese vae

¹⁸ Jayave yandeYa iaraɨgua oyókuai Gad jei vaerä David pe omopüa vaerä metei mɨmba oyeyuka oyeapɨ jese vae yandeYa pe Ornán Jebús pegua itrigo oyembopiriría pe.

¹⁹ Jayave David ojo oyapo vaerä Gad jei yandeYa jee re chupe rami.

²⁰ Ornán trigo ombopiriri vae oyerova omae yave oecha araɨgua, ërei irundɨ taɨ ñogüɨnoi jae ndive vae opa oñemi.

²¹ Jare David ou oväe Ornán oïa pe yave, Ornán omae jare oecha David, jayave oë jókuae trigo ombopiriría güi jare oyetavatɨka itindɨ reve ɨvɨ re David jóvai.

²² Jayave David jei Ornán pe: —Emee cheve kuae trigo rembopiriría amopüa vaerä pɨpe metei mɨmba oyeyuka oyeapɨ jese vae yandeYa pe. Emee tagua jepɨ kavi oï rupi, oasa vaerä manoɨvɨ guasu tëta güi.

²³ Jare Ornán jei chupe: —Ko oï cheruvicha guasu, eyapo pɨpe ndeve jaekavi vae, güeye ave tamee mɨmba oyeyuka opaetei oyeapɨ vaerä jare ɨvɨra mbaembopiririka yepearä jare trigo mbotarä, ¡tamee opaete!

²⁴ Ërei mburuvicha guasu David jei Ornán pe: —Yasoropai kuae re, ërei agua ñotai ko opaete jepɨ kavi oï rupi, ngaraa ndembae aekɨ ndegüi amee vaerä yandeYa pe jare amee mɨmba opaetei oyeapɨ vae amboepɨmbae reve.

²⁵ Jökorai David omboepɨ Ornán pe jókuae mbaembopiriri rendaa seisciento reare oro pegua pe,

²⁶ jare joko pe omopüa metei mɨmba oyeyuka oyeapɨ jese vae yandeYa pe, jare omee mɨmba oyeyukagüe opaetei oyeapɨ vae jare mɨmba oyeyuka oñemee mbɨakatu pegua vae. Javoi oyerure yandeYa pe, jare jae omboyevɨ chupe ombou reve tata ara güi mɨmba oyeyuka oyeapɨ jese vae re, mɨmba oyeyukagüe opaetei oyeapɨ vae re.

²⁷ Jayave yandeYa jei araɨgua pe oñovatu vaerä ikɨsepuku jɨru pe.

Tupao jendarä

²⁸ David oecha yave iyerure yandeYa omboyevɨ chupe Ornán jebuseo ombaembopiriría pe, omee joko pe mɨmba oyeyukagüe.

²⁹ Yepe tëi küaraɨa guakapi pegua Moisés omopüa ñuu pe yandeYa peguarä vae oime oï jókuae ara ɨvatea pe Gabaón pe,

³⁰ ërei David mbaetɨ ojo joko pe oparandu Tumpa pe, echa okɨɨye yae oecha ramo yandeYa iaraɨgua ikɨsepuku ndive.