1 CRÓNICAS 12 - Biblia Guarani Tumpa Iñee

David isundaro reta

¹ David oime vɨteri oñemi oiko Saúl, Cis taɨ güi yave, mbovɨ kuimbae reta jëia vae, ñeraro pe omborɨse vae reta yogüɨraja oñemoïru jae ndive Siclag pe.

² Kuae ñeraro regua reta jembiporu jae uvɨ jare tamamboka, mókoi reve iyakatu yoyavi oiporu reta. Jae ko kuae reta: Saúl jëtara Benjamín iñemuña pegua reta jae:

³ Mburuvicha Ahiezer jare Joás, Semaa Gabaaɨgua taɨ reta; Jeziel jare Pelet, Azmavet taɨ reta; Beraca jare Jehú, tëta Anatot-ɨgua reta;

⁴ Ismaías, Gabaón-ɨgua jae ko metei treinta jëia vae reta pe jëia yae vae; Jeremías, Jahaziel, Johanán, Jozabad, Gederaɨgua,

⁵ Eluzai, Jerimot, Bealías, Semarías; Sefatías harufita;

⁶ Elcana, Isías, Azareel, Joezer jare Jasobeam Coré iñemuña reta;

⁷ jare Joela jare Zebadías, Jeroham Gedor-ɨgua taɨ reta.

⁸ Jaeramiño vi Gad iñemuña amogüe oasa David pɨri oï yave ñepɨ̈roka ñuu pegua pe. Kuimbae ñeraro regua jëia vae reta ko, ipoki oñeraro reta yeopiaka pe jare mii pe. Yavaete yaguapope reta rami, jare isɨrɨkɨ guasu ɨvɨtɨ rupi rami.

⁹ Jae kuae reta: Ezer jae tenondegua, Obadías jae mokoía, Eliab jae mboapɨa,

¹⁰ Mismana jae irundɨa, Jeremías jae pandepoa,

¹¹ Atai jae ovaa, Eliel jae chiúa,

¹² Johanán jae juría, Elzabad jae chaúa,

¹³ Jeremías jae payandepoa, jare Macbanai jae oncea.

¹⁴ Kuae Gad iñemuña reta jae ko sundaro ruvicha reta. Metei taɨkuegua chugüi reta vae güɨnoi ipo pe cien kuimbae, jare tenondegua güɨnoi mil.

¹⁵ Kuae reta ko oasa ɨ̈aka Jordán, tenondegua yasɨ año omboɨpɨ vae pe tuicha yae ɨ iara pe, jare ombotekuarai reta ɨvɨpe kavi rupigua kuaraɨ oëa kotɨgua jare kuaraɨ oikea kotɨgua reta.

¹⁶ Jökoraiño vi amogüe kuimbae Benjamín jare Judá iñemuña pegua reta, yogüeru David pɨri ñepɨ̈roka pe.

¹⁷ David oë oövaiti, jare jei chupe reta: “Peyu ko yave mbɨakatu ndive jare chemborɨ vaerä, opaete chepɨa ndive añemoïru pe ndive; ërei peyu chemee cherovaicho reta pe vaerä yave, mbaetɨ reve aporoyuka, ¡ñaneñemuñagüe reta iTumpa tomae kuae re, jare jae toiporarauka!”

¹⁸ Jayave Tumpa iEspíritu ou Amasai re, jae ko treinta vae reta itenondegua, jare jei: “¡Mbɨakatu toime ndeve David, Isaí taɨ! ¡Mbɨakatu toiko nde ndive! ¡Mbɨakatu toime ndeve jare ndemborɨ vae reta pe, echa neTumpa ndemborɨ!” David omboresive jare oñono reta isundaro ruvicha reta ipɨte pe.

¹⁹ Amogüe Manasés iñemuña reta güi yogüɨraja oñemoïru David ndive, ojo tëi filisteo reta ndive oñeraro vaerä Saúl kotɨ yave (ërei David mbaetɨ omborɨ filisteo reta, echa filisteo juvicha reta oyapo yemongeta omondo ye vaerä ñeraroa güi, echa jei reta: “¡Ipuere ko oyeaɨuka juvicha Saúl pe, güɨraja yave chupe ñaneäkagüe!”)

²⁰ Kuimbae reta Manasés iñemuña pegua oasa David pɨri Siclag pe vae jae: Adnas, Jozabad, Jediael, Micael, Jozabad, Eliú jare Ziletai, sundaro Manasés iñemuña pegua reta jeta vae juvicha reta.

²¹ Kuae reta omborɨ David tovaicho reta kotɨ, echa opaete jëia vae reta ko, jare yogüɨreko sundaro ruvicharä.

²² Jare pɨareve ñavo yogüeru jeta David pɨri vae, oyeapo regua jeta yae sundaro, Tumpa isundaro reta jeta yae rami.

²³ Kuae jae opaete reve oyemboatɨ David ndive Hebrón pe ñeraro peguarä vae, omboasa reta vaerä Saúl iporookuaía chupe, yandeYa jei rami:

²⁴ Judá iñemuña reta güi, seis mil ochociento kuimbae iyeopiaka reve jare imii reve reve, oïndaivi oñeraro vaerä vae.

²⁵ Simeón iñemuña reta güi siete mil cien kuimbae, jëia ñeraro peguarä vae reta.

²⁶ Leví iñemuña reta güi cuatro mil seisciento,

²⁷ jare tres mil seteciento Aarón iñemuña reta güi, juvicha Joiada ndive,

²⁸ jare taɨrusu jëia vae Sadoc ndive, veintidó jëtara mburuvicha reta.

²⁹ Benjamín iñemuña reta Saúl jëtara reta güi: Tres mil kuimbae, echa jayave rupi jeta vɨteri jae reta yogüɨreko Saúl ndive.

³⁰ Efraín iñemuña reta güi veinte mil ochociento, jëia yae vae reta, jëtara ipɨte pe jërakua yae vae reta.

³¹ Manasés iñemuña oyemboyaogüe reta güi dieciocho mil, kuae reta oyembojee yogüɨraja vaerä omboguapɨ David mburuvicha guasurä.

³² Isacar iñemuña reta güi dosciento mburuvicha, oikuaa yae ara reta re vae jare mbae ko Israel oyapota vae re; jae reta jei vae jëtara reta oyapo.

³³ Zabulón iñemuña reta güi, cincuenta mil sundaro oïndaivi oñeraro vaerä vae, oipotagüe tembiporu ñeraro pegua pe, okɨɨyembae reve omborɨ reta vaerä David.

³⁴ Neftalí iñemuña reta güi, mil sundaro ruvicha reta, jare treinta y siete mil kuimbae iyeopiaka jare mii ndive vae jae reta ndive.

³⁵ Dan iñemuña reta güi, veintiocho mil seisciento sundaro okɨɨyembae oñeraro vaerä vae reta.

³⁶ Aser iñemuña reta güi, cuarenta mil sundaro oïndaivi oñeraro vaerä vae.

³⁷ Jare ɨ̈aka Jordán jovaicho güi Rubén iñemuña reta, Gad iñemuña reta jare Manasés iñemuña reta oyemboyaogüe güi ciento veinte mil kuimbae, oipotagüe tembiporu ñeraro pegua ndive.

³⁸ Opaete kuae kuimbae reta oïndaivi oñeraro vaerä vae yogüɨraja metei yemongeta ndive Hebrón pe omboguapɨ vaerä David mburuvicha guasurä opaete Israel iñemuña reta re; jare opaete ïru Israel iñemuña reta metei rami vi ipɨa oyeapo vaerä jökorai.

³⁹ Jare ñogüɨnoi David pɨri mboapɨ ara, okaru jare jou reta vino, echa jëtara reta oyapo kavi chupe reta.

⁴⁰ Jëta-ɨpɨ rupigua reta, jare Isacar iñemuña reta, Zabulón jare Neftalí iñemuña reta ave, güɨraja tembíu chupe mburika re, camello re, mburika guasu jare güeye re. Oipotagüe tembíu güɨraja reta jeta: Trigokúi, ɨva oyemboipe oñemotinigüe, uva oñemotinigüe, vino, asaite, toro jare vecha; echa oime yerovia tuichagüe Israel pe.