1 CRÓNICAS 11 - Biblia Guarani Tumpa Iñee

David oguapɨ mburuvicha guasurä Israel iñemuña reta pe

¹ Jayave opaete Israel iñemuña reta oyomboatɨ jare yogüɨraja imiari David ndive Hebrón pe, jei reta chupe: “Mase, ore nerëtara ete ko, metei tugüɨ vae.

² Jare tenonde rupi Saúl oikose mburuvicha guasurä oreve yave, nde ko rerajase Israel iñemuña reta ñeraroa pe, jare reroyerova reta ye yepi. Jare yandeYa jei vi ndeve: ‘Nde reyangarekota tëta chembae Israel re, jare reikota Israel pe mburuvicharä.’ ”

³ Jökorai yogüeru opaete Israel iñemuña reta itenondegua reta mburuvicha guasu David pɨri Hebrón pe, jare jae oyapo morogüɨrökuavee päve jae reta ndive Hebrón pe yandeYa jóvai. Jayave jae reta omboguapɨ David mburuvicha guasurä Israel re, Tumpa güɨrökuavee rami Samuel rupi.

David opɨ̈ro ñepɨ̈roka Sión pegua

⁴ Jayave David jare opaete Israel iñemuña yogüɨraja Jerusalén pe, jae vi ko jee Jebús. Jókuae ɨvɨ pe yogüɨreko jebuseo reta,

⁵ jae reta jei David pe: “Nde mbaetɨta reike kuae pe.” Ërei David opɨ̈ro ñepɨ̈roka Sión pegua, añave rupi David Jëta guasu jee vae.

⁶ Jare David jei yepe: “Tenonde oporepeña jebuseo reta re vae añonota tenondegua mburuvicharä.” Jare tenonde opüa jese vae jae Joab, Sarvia imembɨraɨe, jare oñono tenondeguarä.

⁷ Jaɨkue rupi David oñemoëta jókuae ñepɨ̈roka pe, jáeramo jee David Jëta guasu.

⁸ Jare iyɨ́vɨri rupi David omopüa güɨroyere tëta, Milo güive tëta ikësea pe. Joab omopüa ye tëta guasu reta oataño vae.

⁹ Jare David imbaepuere okuakuaa ojo oiko, jare yandeYa imbaepuere yae ete vae oï jae ndive.

David isundaro jëia yae vae reta

¹⁰ Jae kuae David isundaro jëia yae vae reta, omborɨ iporookuaía pe opaete Israel iñemuña ndive omboguapɨ mburuvicha guasurä Israel re vae, yandeYa omoërakua chupe reta rami.

¹¹ Kuae tee reta oñemoapɨta vae jae David isundaro jëia yae vae reta: Jasobeam, Hacmoni taɨ treinta jëia vae reta itenondegua, metei ara oyuka tresciento kuimbae mii pe.

¹² Kuae jaɨkuegua jae Eleazar, ahohíta, Dodo taɨ, jae ko mboapɨ jëia yae vae güi metei.

¹³ Jae oï David ndive Pasdamim pe filisteo reta oyemboatɨ oñeraro vaerä joko pe yave. Joko pe oime kó temitɨ cebada oï pɨpe vae, Israel iñemuña reta opa otekuarai yave filisteo reta güi,

¹⁴ jae reta oyemboɨ kó mbɨte pe jare oporoepɨ, opa omoamɨri filisteo reta. Jökorai yandeYa omee oporomoamɨri reta yae vaerä.

¹⁵ Metei ara treinta vae güi mboapɨ yogüɨraja ɨ̈vavira Adulam pegua pe David pɨri, ɨvɨkua pe oïa pe. Oime reve filisteo reta güɨnoi jeyupa ɨvɨpe kavi Refaim pe.

¹⁶ Jayave David oï ñepɨ̈roka pe, filisteo reta ñogüɨnoi ramboeve Belén pe.

¹⁷ David ipɨa pe oipota vae jei körai: “¡Mbae mona kia omee ɨ jau ɨkua oï Belén jöke pe vae güi!”

¹⁸ Jayave jókuae mboapɨ jëia vae yogüɨraja filisteo reta jeyupa pe jare güɨnoe ɨ Belén jöke pe ɨkua oï vae güi güɨraja David pe. Ërei David mbaetɨ oipota jou, jaeño opɨyere yandeYa peguarä, jare jei:

¹⁹ “¡Tumpa tachereepɨ kuae güi! ¡Echa kuae kuimbae reta jugüɨ jau vae ramita ko, echa mano pe ko oñeñono reta opa ramboeve yogüɨraja güeru!” Jare mbaetɨ oipota jou. Kuae oyapo jókuae mboapɨ jëia vae reta.

²⁰ Abisai, Joab tɨvɨ jae ko treinta vae reta itenondegua, jae oñeraro imii pe tresciento vae reta ndive jare oyuka. Jökorai jërakua yae vi mboapɨ vae reta ndive.

²¹ Imboetea yae ïru reta güi, jare oiko tenondeguarä, ërei mbaetɨ omboyovake jókuae tenonde mboapɨ vae reta.

²² Benaía, jae ko Joiada jëia vae taɨ tëta Cabseel pegua, jae oyapo jeta mbae tuicha vae. Jae oyuka mókoi reve jëia yae vae Moab pe, jae vi ogüeyɨ metei ɨvɨkua pe oyuka metei yaguapope iroɨ oa iara pe.

²³ Jae vi omoamɨri metei Egiptoɨgua ipuku yae vae, mókoi metro oasa güɨnoi vae, jae güɨraja ipo pe imii tembiapo oñeñono jese vae ipo guasu rami vae. Ërei Benaía oporepeña jese ɨvɨra ndive, pɨpe oipoekɨ imii güi, jare oyuka imii pe ae.

²⁴ Kuae Benaía, Joiada taɨ oyapogüe rupi jërakua yae mboapɨ vae reta ndive,

²⁵ jare imboetea yae ïru reta güi, ërei mbaetɨi omboyovake tenonde mboapɨ vae reta. Jare David oñono iyangarekoa reta juvicharä.

²⁶ Jëia vae reta jae: Asael, Joab tɨvɨ; Elhanán, Dodo Belén pegua taɨ;

²⁷ Samot, Harod-ɨgua; Heles, pelonita;

²⁸ Ira, Iques Tecoaɨgua taɨ; Abiezer, Anatot pegua;

²⁹ Sibecai, Husaɨgua; Ilai, ahohíta;

³⁰ Maharai, Netofaɨgua; Heled, Baana Netofaɨgua taɨ;

³¹ Itai, Ribai Gabaa pegua taɨ, jae ko oï Benjamín iɨvɨ pe vae; Benaía, Piratón-ɨgua;

³² Hurai, ɨ̈aka Gaas pegua; Abiel, Arabaɨgua;

³³ Azmavet, Bahurim-ɨgua; Eliaba, Saalbim-ɨgua;

³⁴ Hasem, Gimzoɨgua taɨ reta, Jonatán, Sage Arar-ɨgua taɨ;

³⁵ Ahíam, Sacar taɨ, jae vi Arar-ɨgua; Elifal, Ur taɨ;

³⁶ Hefer, mequeratita; Ahías, pelonita;

³⁷ Hezro, Carmel-ɨgua; Naarai, Ezbai taɨ;

³⁸ Joel, Natán tɨvɨ; Mibhar, Hagrai taɨ;

³⁹ Selec, Amón iñemuña; Naharai, Berot pegua, Joab, Sarvia imembɨraɨe jembiporu ivoɨa;

⁴⁰ Ira, Jatir-ɨgua; Gareb, Jatir-ɨgua vi;

⁴¹ Urías Het iñemuña; Zabad, Ahlai taɨ;

⁴² Adina, Siza taɨ, Rubén iñemuña juvicha, jare treinta kuimbae jae ndive;

⁴³ Hanán, Maaca taɨ; Josafat mitnita;

⁴⁴ Uzías, Astarot-ɨgua; Sama jare Jehiel, Hotam Aroer-ɨgua taɨ reta;

⁴⁵ Jediael, Simri taɨ, jare tɨvɨ Joha tizita;

⁴⁶ Eliel mahavita; Jerebai jare Josavía, Elnaam taɨ reta; Itma Moab iñemuña;

⁴⁷ Eliel, Obed jare Jaasiel, mesobaita.