1 CRÓNICAS 10 - Biblia Guarani Tumpa Iñee

Saúl jare taɨ reta imano

¹ Filisteo reta oñeraro Israel iñemuña reta ndive, jare Israel iñemuña reta opa otekuarai filisteo reta güi, jare jeta omano ɨvɨtɨ Gilboa pe.

² Jare filisteo reta oaɨkuemoña Saúl jare taɨ reta, jare oyuka reta chugüi taɨ reta Jonatán, Abinadab jare Malquisúa.

³ Javoi jeiete yae ñeraro Saúl kotɨ, jare uvɨ regua reta oupitɨ jare oñɨvo.

⁴ Jayave Saúl jei iyeopiaka ivoɨa pe: “Eekɨ ndekɨsepuku javoi chekutu pɨpe, agüɨye vaerä yogüeru kuae Tumpa re güɨroviambae reta oyuvanga cheré.” Ërei iyeopiaka ivoɨa mbaetɨ oipota echa okɨɨye yae. Jayave Saúl oipɨɨ ikɨsepuku jare oa jese.

⁵ Yeopiaka ivoɨa oecha yave Saúl omano, jae oa vi ikɨsepuku re jare oyeyuka.

⁶ Jökorai omano reta jókuae ara Saúl jare mboapɨ reve taɨ jare opaete jëtara reta vi.

⁷ Jare opaete Israel iñemuña reta yogüɨreko ɨvɨtɨ päu ipe kavi rupi vae, oecha opa otekuarai vae, jare Saúl mboapɨ reve taɨ ndive opa omano yave, omombo oeya reta tëta guasu jare opa otekuarai. Jayave filisteo reta yogüeru oväe joko pe jare opɨta yogüɨreko reta pɨpe.

⁸ Pɨareve pe filisteo reta yogüɨraja oekɨ vaerä mbaembae omanogüe reta güi yave, oväe reta Saúl jare taɨ reta jëogüegüe oyepɨso ñogüɨnoi ɨvɨtɨ Gilboa pe.

⁹ Jayave omboi reta chugüi jemimondegüe jare oyasɨa güɨraja reta iñäkagüe, jare jembiporu ñeraro pegua, javoi omondo reta ñee jerajaa reta opaete filisteo reta iɨvɨ rupi, omoërakua vaerä opaete vae pe jare itumpa reta pe.

¹⁰ Jare oñono reta Saúl jembiporugüe itumpa-raanga reta itupao pe, jare iñäkagüe ombosavava Dagón itupao pe.

¹¹ Jare tëta Jabes, Galaad pegua reta oikuaa filisteo reta kërai oyapo Saúl yave,

¹² opaete kuimbae jëia vae reta opüa jare yogüɨraja reta güeru Saúl jare taɨ reta jetegüe Jabes pe, joko pe oñotɨ reta ikägüegüe ɨvɨra encina jee vae igüɨ pe. Javoi oyekuaku reta tembíu güi chiu ara.

¹³ Jökorai omano Saúl ipɨapochɨ jeko pegua, echa ñäteɨ oyapo yandeYa oyókuai tëi oyapo vaerä vae. Jare yandeYa jei vae mbaetɨ oyapo, jare ojo oparandu maratuta vae imombeúa pe ramo,

¹⁴ oparandu vaerägüe yandeYa pe. Jáeramo yandeYa oekɨ chugüi jekove, jare mborookuaía omee David, Isaí taɨ pe.