1 Corintios 9 - Biblia Guarani Tumpa Iñee

Kërai ko temimondo vae

¹ Che ko temimondo, chepuere ayapo cheve ikavi vae. Che aecha ko yandeYa Jesús. Pe reta etei ko jae cherembiapo yandeYa re.

² Ïru vae reta pe che temimondoä ko. Ërei peve reta che ko jae temimondo. Echa pe reta perovia yandeYa re vae oikuaauka che ko jae añetete temimondo.

³ Kuae ko che jae cheangao vae reta pe:

⁴ ¿Orepuereä yera rou oipotagüe tembíu jare roɨu?

⁵ ¿Orepuereä yera romenda kuña oporogüɨrovia vae ndive jare rogüɨraja orerupíe, ïru temimondo reta jare yandeYa tɨvɨ reta jare Cefas oyapo rami?

⁶ ¿Peyemongeta pa jaeño che jare Bernabé mbaetɨ orepuere roputuu?

⁷ ¿Ojo pa sundaro oñeraroa pe, oyemboepɨmbae reve chupe? ¿Oime pa kia uva oñotɨ vae mbaetɨ jou iagüe?, ani ¿oime pa kia vecha re oyangareko vae mbaetɨ jou ineche?

⁸ ¿Cheyeugüi aeño pa kuae jae? ¿Jökorai viä pa jei mborookuai?

⁹ Echa Moisés iporookuai pe oyekuatía oï körai: “Güeye ombopiriri trigo oï yave, agüɨye peiyuruokua.” Tumpa ¿güeye reta reño ra oyemoambeko

¹⁰ mbaetɨ pa oreré jei? Echa mborookuai oyekuatía ko oreré, echa omaetɨ vae jare trigo ombopiriri vae oäro ko oyekou vaerä iparavɨkɨagüe re.

¹¹ Ore roñotɨ yave mbae Espíritu pegua ¿jeta yae pa peve roäro pegüi mbaembae penoigüe güi yave?

¹² Ïru vae reta viña pa jupi oyemborɨuka vaerä peve, vɨtei pa ore. Ërei mbaetɨ roiporu jókuae jupi ko pe reta oremborɨ vaerä tëi vae. Opaete rogüɨropɨa, agüɨye vaerä romboavai ñee ikavi vae Cristo regua.

¹³ ¿Mbaetɨ pa peikuaa tupao pe oparavɨkɨ vae reta jou ko tembíu tupao pegua? Echa mɨmba oyeyukagüe oyeapɨ jesea pe oparavɨkɨ vae reta jou ko jókuae mɨmba oyeyukagüe isoo.

¹⁴ Jökorai ko yandeYa oyókuai ïru vae reta omborɨ vaerä ñee ikavi vae omoërakua vae reta.

¹⁵ Ërei che mbaetɨ etei kia chemborɨ vae. Mbaetɨ vi kuae aikuatía vae rupi aiporu aï peve chemborɨ vaerä. ¡Ikavi ko amano kia chemborɨmbae reve, echa jókuae ko jae cheyerovia!

¹⁶ Yepe tëi amoërakua ñee ikavi vae, ërei ngaraa ayemboete jókuae re. Echa yandeYa cheokuai amoërakua vaerä. ¡Këraita pa aiko mbaetɨ yave amoërakua ñee ikavi vae!

¹⁷ Echa che ayapo yave chekɨ̈reɨ ngatu reve, jekoviata cheve; ërei ayapo yave cheäteɨ reve, ayapo tai yandeYa cheokuai ramoño.

¹⁸ Jare jekovia cheve vae jae ko amoërakua ñee ikavi vae akovarambae reve vae. Amoambekombae reve jupi ko chemborɨ vaerä tëi ñee ikavi vae amoërakua vae re.

¹⁹ Jáeramo mbaetɨ kia pe ave chepía cheokuai vaerä. Ërei ayeapo opaete vae jembiokuairä, jeta vae güɨrovia vaerä Cristo re.

²⁰ Judío reta pɨri aï yave aiko judío rami, judío reta güɨrovia vaerä Cristo re. Mborookuai jei vae oyapo vae reta ndive aï yave, che aiko vi metei mborookuai jei vae oyapo rami (yepe tëi mbaetɨ oiko mborookuai jei vae re), güɨrovia reta vaerä Cristo re.

²¹ Jare Moisés iporookuai mbaetɨ güɨnoi vae reta ndive aï yave, che aiko vi jae reta rami, jae reta vi güɨrovia vaerä Cristo re (kuae mbaetɨ oipota jei aikoä ma Tumpa iporookuai re. Echa che aiko Cristo iporookuai re).

²² Mbaetɨ ipɨ̈rata iporogüɨrovia pe vae reta ndive aï yave, che aiko vi jae reta rami, jae reta vi güɨrovia vaerä Cristo re. Ayeapo opaete vae pe jae reta rami, opaete vae oyemboasauka vaerä.

²³ Opaete kuae ayapo ñee ikavi vae jeko pegua, anoi vaerä vi pɨpe chembae.

²⁴ ¿Mbaetɨ pa peikuaa oñoñókuai vae reta osɨi opareve, ërei meteiño omongana vae? Pesɨi pemongana regua.

²⁵ Opaete oipota oporomoamɨri vae reta oyekuaku ko opaete mbaembae güi. Jae reta omongana imbaerä oikomegua vae. Ërei yande ñanoita mbae oikomeguambae.

²⁶ Jáeramo che asɨi jökorai, mbaetɨ asɨi osɨiño vae rami. Añeraro, mbaetɨ omomboiño iyɨva vae rami.

²⁷ Aiporarauka cherete pe, oyapo vaerä che aipota oyapo vae, agüɨye vaerä apɨta ikatu pe, amoërakua ïru vae reta pe güire.