1 Corintios 7 - Biblia Guarani Tumpa Iñee

Menda regua

¹ Añave aikuatía vi peve jókuae mbaembae re peparandu cheve vae re. Ikavi tëi ko kuimbae agüɨye güɨreko kuña.

² Ërei agüɨye vaerä oime aguasa, metei ñavo kuimbae togüɨnoi jembireko ae jare metei ñavo kuña togüɨnoi ime ae.

³ Kuimbae toyapo jembireko jete oipota vae. Jaeramiño vi kuña toyapo ime ndive ime jete oipota vae.

⁴ Kuña mbaetɨ ko güɨnoi mbaepuere jete re, ime ko güɨnoi mbaepuere. Jaeramiño vi kuimbae mbaetɨ ko güɨnoi mbaepuere jete re, jaeño jembireko.

⁵ Agüɨye peyeopia oyougüi, ërei mókoi reve pemiari kavi peyeopia mbovɨ ara pegua peyerure vaerä Tumpa pe yave, jaekaviño jökorai peyapo. Ërei agüɨye peyoeya ete. Taɨkue rupi peke päve ye, agüɨye vaerä Satanás pe perëgua, pepuereä peyeopia perete oipota vae güi yave.

⁶ Ërei kuae che jae peve cheyeugüi aeño, mbaetɨ ko mborookuai rami.

⁷ Ërei ikavi viña opaete kuimbae reta yogüɨreko vaerä che aiko rami. Ërei metei ñavo pe Tumpa omee kërai yaiko vaerä; amogüe pe oñemee vae oyoavɨ ïru vae pe oñemee vae güi.

⁸ Jáeramo che jae jókuae jaegüɨrai vɨteriño vae reta pe jare imemano vae reta pe kuae, jaekavi tëi ko agüɨye vaerä omenda, che rami.

⁹ Ërei ipuereä oyeopia jete oipota vae güi vae, tomenda. Echa ikavi ko omenda, agüɨye vaerä oiporara mendase.

¹⁰ Jare omenda vae reta pe jae körai, mbaetɨ che. Tumpa etei oyókuai reta: “Kuña agüɨye toeya ime.”

¹¹ Ërei oeya ime yave, toiko jaegüɨrai ani toï kavi reta ye ime ndive. Kuimbae agüɨye toeya jembireko.

¹² Ërei ïru reta pe che jae kuae mbaetɨ yandeYa jei: Oime yave metei oporogüɨrovia vae jembireko oporogüɨroviambae vae yave, ërei jembireko oipota oiko jae ndive yave, agüɨye toeya.

¹³ Jaeramiño vi metei kuña oporogüɨrovia vae ime oporogüɨroviambae vae yave, ërei ime oipota oiko jae ndive yave, agüɨye toeya.

¹⁴ Echa kuimbae oporogüɨroviambae vae oñeñono tee ko imenda rupi jembireko iporogüɨrovia rupi. Jaeramiño vi kuña oporogüɨroviambae vae ime rupi. Jare oyoeya reta yave, imichia reta ikɨa ko Tumpa jóvai. Ërei añave ikɨambae reta ko.

¹⁵ Ërei oporogüɨroviambae vae ikɨ̈reɨ oporoeya yave tojoño, echa kuña ani kuimbae oporogüɨrovia vae jókuae oiporara oiko vaerää ko. Echa Tumpa yandeparavo ko yaiko vaerä mbɨakatu rupi.

¹⁶ Echa nde, kuña, mbaetɨ reikuaa oyemboasaukata ra neme ndereko pegua. Jaeramiño vi nde, kuimbae, mbaetɨ reikuaa oyemboasaukata ra nderembireko ndereko pegua.

¹⁷ Ërei metei ñavo toiko yandeYa omee chupe vae rupi. Metei ñavo toiko Tumpa oenɨi oyemboasauka vaerä yave oiko rami. Jare jökorai ayókuai opaete oporogüɨrovia vae reta.

¹⁸ Tumpa oenɨi oyemboasauka vaerä oyembocircuncidaukagüe vae yave, topɨta jökoraiño. Jaeramiño vi Tumpa oenɨi oyemboasauka vaerä oyembocircuncidaukambae vae yave, agüɨye toyembocircuncidauka.

¹⁹ Yayembocircuncidauka vae, mbaeä ko jare yayembocircuncidaukambae vae, mbaeä vi. Ikavi vae jae ko yayapo Tumpa iporookuai reta vae.

²⁰ Metei ñavo topɨta Tumpa oenɨi oyemboasauka vaerä yave oiko rami.

²¹ Tumpa oenɨi oyemboasauka vaerä metei tembiokuai yave, agüɨye tipɨatɨtɨ jókuae re. Ërei ipuere oyeyora iya güi yave, jaekavi ko oyapo vaerä.

²² Echa yandeYa oenɨi oyemboasauka vaerä tembiokuai yave, oyeyora ma ko yandeYa peguarä. Jaeramiño vi yandeYa oenɨi oyemboasauka vaerä tembiokuaimbae vae yave, jae oyeapo ma ko Cristo jembiokuairä.

²³ Pe reta ko Tumpa oguagüe vae. Jáeramo agüɨye peyeapo ïru vae reta jembiokuairä.

²⁴ Cherɨvɨ reta, metei ñavo topɨta Tumpa oenɨi oyemboasauka vaerä yave oiko rami, jökorai toyeokuai Tumpa pe.

²⁵ Kuñatai jaegüɨrai vae reta regua mbaetɨ anoi mborookuai yandeYa güi. Ërei cheyemongeta jaeta, pepuere chererovia jupi aiko yandeYa iporoparareko rupi ramo.

²⁶ Ayemongeta jaekavi ko metei kuimbae opɨta vaerä añave oï ramiño, kuae ara reta pe yavai yae vae jeko pegua.

²⁷ Kuimbae omenda ma vae, agüɨye toeya jembireko. Jare kuimbae ndeiño omenda vae, topɨta jökoraiño.

²⁸ Ërei omenda yave, mbaetɨ ko iyoa. Jaeramiño vi kuñatai omenda yave, mbaetɨ ko iyoa. Ërei omenda vae reta güɨnoita ko yemoambeko, jare che aipotaä tëi viña jökorai.

²⁹ Ërei che jae peve kuae, cherɨvɨ reta: Mbaetɨta ma ɨma yaiko vaerä. Jáeramo jembireko vae reta toiko mbaetɨ jembireko vaeecha.

³⁰ Jaeramiño vi ipɨatɨtɨ vae reta toiko mbaetɨ ipɨatɨtɨ vaeecha. Jaeramiño vi oyerovia vae reta toiko mbaetɨ oyerovia vaeecha. Jaeramiño vi ombaegua vae reta toiko mbaetɨ güɨnoi vaeecha.

³¹ Jare kuae ɨvɨ pegua re oyekou vae reta toiko mbaetɨ oyekou vaeecha. Echa opaete mbaembae kuae ɨvɨ pegua opata ko.

³² Aipotaecha viña mbaembae pemoambeko vaerä. Echa kuimbae jaegüɨrai vae oyemoambeko yandeYa iparavɨkɨ re, ombopɨakatu vaerä yandeYa.

³³ Ërei kuimbae omenda vae oyemoambeko mbaembae ɨvɨ pegua re, ombopɨakatu vaerä jembireko.

³⁴ Jaeramiño vi kuña ime reve vae oyoavɨ kuñatai jaegüɨrai vae güi. Echa kuñatai jaegüɨrai vae oyemoambeko yandeYa iparavɨkɨ re, oñoñono tee vaerä jete jare jekove Tumpa peguarä. Ërei kuña omenda vae oyemoambeko mbaembae ɨvɨ pegua re, ombopɨakatu vaerä ime.

³⁵ Jare kuae che jae peve ikavi peve vaerä. Mbaetɨ ko jae poyopia vaerä menda güi. Jaeño aipota peyapo vaerä jupi vae jare jaekavi vae, pepuere vaerä peyeokuai yandeYa pe yemboavaimbae reve.

³⁶ Ërei amogüe vae oyemongeta tayɨ mbaetɨ jaekavi opɨta vaerä omendambae, ërei tayɨ oipota tëi omenda. Tomaeño tayɨ re omenda vaerä, jökorai yave, mbaetɨ ko iyoa.

³⁷ Ërei ipɨa pe oyemongeta jaekavi jare jupi mbaetɨ vaerä omomenda tayɨ vae, jaekavi ko oyapo.

³⁸ Jáeramo kuimbae omomenda tayɨ vae jaekavi ko oyapo. Ërei kuimbae mbaetɨ omomenda tayɨ vae, jaekavi yae ko oyapo.

³⁹ Kuña omenda vae oñeapɨti ko oï, ime oikove oiko ramboeve. Ërei ime omano yave, ipuere omenda ye jae oipota vae ndive. Ërei tomenda oporogüɨrovia vae ndive.

⁴⁰ Ërei chevegua jae ikavi yae ko chupe mbaetɨ omenda ye yave. Jare aikuaa Tumpa iEspíritu oime anoi.