1 Corintios 6 - Biblia Guarani Tumpa Iñee

Oñeapo oporogüɨroviambae vae reta pe vae regua

¹ Kia nunga vae pepɨte pe omboeko ïru vae mbae re yave, ¿maera pa oñeapo jese oporogüɨroviambae reta pe? ¿Maera pa mbaetɨ oñeapo jese oporogüɨrovia vae reta pe?

² ¿Mbaetɨ pa peikuaa oporogüɨrovia vae reta ojäata ko ɨvɨ pegua reta vae? Jökoraita ko yave ¿maera pa mbaetɨ pepuere peñono kavi jókuae teko michi yae vae?,

³ ani ¿mbaetɨ pa peikuaa yande ñajäata ko araɨgua reta vae? ¿Vɨtei pa kuae ɨvɨ pegua teko reta?

⁴ Jáeramo oime yave kia omboeko ïru vae kuae ɨvɨ pegua teko re, ¿maera pa pemaeño oporojäa oporogüɨroviambae vae reta, oporogüɨrovia vae reta ipɨte pe mbaeä etei vae?

⁵ Körai jae pomomaraiuka vaerä. ¿Mbaetɨ pa ko metei ave iyarakuaa katu vae pepɨte pe ñeapo oñono kavi vaerä peve?

⁶ Echa oporogüɨrovia vae reta oñeapo oyoe yave, oñeapo oporogüɨroviambae vae reta pe.

⁷ Echa jökorai peñeapo oyoe yave, tuicha ko peyavɨ. Agüɨye peñeapo oyoe, yepe tëi ïru vae oyapo ikavimbae vae peve ani pembotavɨ.

⁸ Ërei pe etei peyapo ikavimbae vae jare pembotavɨ ïru oporogüɨrovia vae reta.

⁹ ¿Mbaetɨ pa peikuaa jupimbae vae reta ngaraa yogüɨreko Tumpa iporookuaía pe vae? Agüɨye peyavɨ. Aguasa oyapo vae reta, itumpa-raanga pota vae reta, menda re oyuvanga vae reta, kuimbae kuña jeko omomora vae reta, kuimbae oyoupii oyogüɨreko vae reta,

¹⁰ imonda vae reta, imbaepotarai vae reta, isavaɨpose vae reta, iyuru pochɨ vae reta ani oporombotavɨ vae reta ngaraa yogüɨreko Tumpa iporookuaía pe.

¹¹ Jökorai ko pe reta yepi. Ërei peyetɨouka ma, peñeñono teeuka ma, peyembojupiuka ma yandeYa Jesús jee re jare yandeRu Tumpa iEspíritu rupi.

Perete rupi pemboete Tumpa

¹² Chepuere ko ayapo opaete aipota vae, ërei mbaetɨ ko opaete jaekavi ayapo vaerä. Chepuere ko ayapo opaete aipota vae, ërei ngaraa añemaeño metei pe ave.

¹³ Tembíu yanderɨe peguarä ko, jare yanderɨe tembíu pegua ko. Ërei Tumpa omboaita ko mókoi reve. Ërei yanderete mbaetɨ ko aguasa peguarä jaeño ko oï yandeYa peguarä, jare yandeYa yanderete peguarä.

¹⁴ Tumpa omoingove ye yandeYa vae, yandemoingove yeta vi ko imbaepuere pe.

¹⁵ ¿Mbaetɨ pa peikuaa perete jae ko Cristo jete? ¿Aekɨta pa Cristo jete güi amee iyaguasa pota vae pe? ¡Ngaraa ko!

¹⁶ ¿Mbaetɨ pa peikuaa kuimbae oasa metei kuña iyaguasa pota vae ndive vae, oyeapo ko metei jete jae ndive vae? Echa Tumpa jei körai: “Mókoi reve toyogüɨreko metei ramiño.”

¹⁷ Ërei jókuae oñemoïru yandeYa ndive vae oyeapo ko metei ramiño yandeYa ndive.

¹⁸ Petekuarai aguasa güi. Oipotagüe ïru mbaeyoa peyapo vae peyapoä ko perete pe. Ërei aguasa peyapo yave, perete kotɨ etei ko peyoa.

¹⁹ ¿Mbaetɨ pa peikuaa perete ko jae Espíritu Santo jo? Echa Tumpa ombou peve Espíritu Santo, jare jae oiko pepɨa pe. Jáeramo perete pembaeä ma ko.

²⁰ Echa perete Tumpa oguagüe ko. Jáeramo pemboete Tumpa perete pe jare perekove pe. Echa mókoi reve Tumpa imbae ko.