1 Corintios 5 - Biblia Guarani Tumpa Iñee

Aguasa oyapo vae oñejäa vaerä

¹ Jërakua oime pepɨte pe güɨreko ichɨraanga vae. Jókuae nunga aguasa mbaetɨ oporogüɨroviambae reta ipɨte pe.

² ¡Jökorai reve peyembotuicha! Pepɨatɨtɨta tëi ko jókuae teko re, peekɨ vaerä pepɨte güi jókuae iyapoa.

³ Echa yepe tëi mbaetɨ aï pe ndive, ërei chepɨa pe oime aï pe ndive, jare ajäa ma jókuae teko iyapoa.

⁴ Peyemboatɨ yandeYa Jesucristo jee re jare chepɨa pe aï pe ndive yave, yandeYa Jesucristo imbaepuere rupi,

⁵ jókuae kuimbae toñemee Satanás ipo pe okañɨtei vaerä jete, jare jekove oyemboasaukata yandeYa ou ye yave.

⁶ Mbaetɨ ko ikavi peyembotuicha peiko vaerä. ¿Mbaetɨ pa peikuaa jókuae mbɨyape imbovúa yepe tëi mbovɨ ërei ombovu opaete mbɨyaperä vae?

⁷ Peyetɨo mbɨyape imbovúa indechigüe güi, peï vaerä mbɨyaperä ipɨau vae oyembovumbae rami. Echa Cristo ko vecha kuimbae taɨrusu vae yandePascua pegua, omano ma yanderé.

⁸ Jáeramo yayapo arete, ërei agüɨye mbɨyape imbovúa indechigüe ndive ani ikavimbae ndive. Jaeño mbɨyape oyembovumbae ikavigüe jare añetegüe ndive.

⁹ Aikuatía ma peve, agüɨye vaerä peñemoïru iyaguasa pota vae reta ndive;

¹⁰ mbaetɨ ko poyókuai peyemboyao etei vaerä kuae ɨvɨ pe iyaguasa pota vae reta güi, ani imbaepotarai vae reta güi, ani imonda vae reta güi, ani itumpa-raanga pota vae reta güi. Echa jökorai yave, ngaraa pepuere peiko kuae ɨvɨ pe.

¹¹ Ërei aikuatía ko peve agüɨye vaerä peñemoïru jókuae che aporogüɨrovia ko jei vae iyaguasa pota vae ndive, ani imbaepotarai vae, ani itumpa-raanga pota vae, ani iyuru pochɨ vae, ikause ani imonda vae, jókuae nunga ndive agüɨye etei ekaru yepe.

¹² Echa mbaetɨ ko chepuere ajäa oporogüɨroviambae vae reta, pe reta pejäa ko pe ndive ñogüɨnoi vae oporogüɨrovia vae reta.

¹³ Tumpa ko ojäata jókuae oporogüɨroviambae vae reta. Jáeramo peekɨ pepɨte güi jókuae ikavimbae iyapoa.