1 Corintios 10 - Biblia Guarani Tumpa Iñee

Yeandu katu tumpa-raanga reta imboete kotɨ

¹ Cherɨvɨ reta, aipota peikuaa kavi vaerä, kërai opaete ñaneñemuñagüe reta yogüɨreko jókuae amapɨtu igüɨ pe, jare opaete oasa reta ɨguasu.

² Jare opaete vae oyembobautisa Moisés re amapɨtu pe jare ɨguasu pe.

³ Jare opaete vae jou tembíu Espíritu pegua.

⁴ Jare opaete vae oɨu Espíritu pegua. Jare oɨu reta jókuae ita guasu Espíritu pegua jupíe reta oiko vae güi. Jare jókuae ita guasu jae ko Cristo ko.

⁵ Ërei jeta chugüi reta mbaetɨ ombopɨakatu Tumpa, jáeramo opa oyukauka oeya ñuu rupi.

⁶ Jare Tumpa oechauka yandeve kuae mbaembae oasa jae reta ndive vae, agüɨye vaerä yande yaipotarai mbaembae ikavimbae jae reta oipotarai rami.

⁷ Agüɨye petumpa-raanga pota jae reta rami, echa oyekuatía oï körai: “Oguapɨ reta okaru, okau, jare opüa reta güɨropo.”

⁸ Agüɨye vi yayapo aguasa, amogüe jae reta oyapo rami. Echa jökorai oyapo ramo, omano veintitré mil jókuae ara.

⁹ Agüɨye vi ñajäa yandeYa ipɨaguasu, echa jökorai oyapo amogüe jae reta, jáeramo oyukauka reta mboi reta rupi.

¹⁰ Agüɨye vi peñeenguru yandeYa kotɨ. Echa jökorai oyapo amogüe jae reta, jáeramo Tumpa oyukauka metei araɨgua pe.

¹¹ Tumpa oechauka yandeve kuae mbaembae oasa jae reta ndive vae. Jare oyekuatía oï yandemboarakuaa vaerä. Yande yaiko ara taɨkuegua pe vae reta pe.

¹² Jáeramo oyemongeta ipɨ̈rata ko iporogüɨrovia pe vae, toyeandu agüɨye vaerä ogüɨapi.

¹³ Echa mbaetɨ ko ou morojäa peve mbaetɨta peropɨa vae, ërei Tumpa jupi ko, ngaraa omaeño peñejäauka pepuere potambae peropɨa vae. Echa omeeta vi peve ñejäa ndive peropɨa vaerä.

¹⁴ Jáeramo, cherɨvɨ reta, petekuarai tumpa-raanga reta imboete güi.

¹⁵ Kuae jae peve, pe iyarakuaa vae reta pe. Pe reta etei peecha añete ra kuae che jae peve vae.

¹⁶ Yasoropai ñamee vino yau vae re yave ¿ñaïä pa meteiño Cristo ndive jugüɨ re? Jaeramiño vi ñapɨ̈saa mbɨyape yave ¿ñaïä pa meteiño Cristo ndive jete re?

¹⁷ Yepe tëi mbɨyape meteiño jare yande reta jeta, ërei metei jeteño ko, echa jókuae metei mbɨyape güiño opaete vae yau.

¹⁸ Yambojaanga Israel pegua reta re. Kërai jou reta mɨmba reta oyeyukagüe Tumpa pe oñemee vae isoo güi yave, oyeapo reta ko metei ramiño joko pe oyeapo vae ndive.

¹⁹ Kuae rupi mbaetɨ aipota jae metei tumpa-raanga Tumpa ko vae, ani tumpa-raanga pe mɨmba oyeyuka oñemee vae isoo, ambuaeyee ko ïru soo güi.

²⁰ Ërei che jae peve jae ko: Judiombae vae reta omee mɨmba oyeyukagüe isoo omee vae, aña reta pe ko omee. Omeeä ko Tumpa pe. Che mbaetɨ aipota peyeapo metei ramiño aña reta ndive jókuae peu vae rupi.

²¹ Mbaetɨ ko jaekavi peu vino oyembojaanga yandeYa jugüɨ re vae jare vi vino aña reta pe oñemee vae. Jaeramiño mbaetɨ ko jaekavi peu mbɨyape oyembojaanga yandeYa jete re vae jare vi soo aña reta pe oñemee vae.

²² ¿Ñamoägüɨroukata pa yandeYa?, ani ¿yandepuere yae pa yandeYa güi?

Opaete mbae peyapo vae rupi pemboete Tumpa

²³ Chepuere ko ayapo opaete aipota vae, ërei mbaetɨ ko opaete jaekavi ayapo vaerä. Chepuere ko ayapo opaete aipota vae, ërei mbaetɨ ko opaete yandemborɨ ñanepɨ̈rata vaerä.

²⁴ Agüɨye kia toeka chupe jaekavita vaeño, jaeño jaekavita ïru pe vae.

²⁵ Pepuere peu oipotagüe soo maemeea pe oñemee vae peparandumbae reve, agüɨye vaerä pepɨa pe peyemboeko.

²⁶ Echa kuae ɨvɨ jare opaete mbaembae oï pɨpe vae yandeYa imbae ko.

²⁷ Metei oporogüɨroviambae vae oparea yave peve pekaru vaerä jae ndive, jare pekɨ̈reɨ peo yave, peu opaete oñono peróvai vae peparandumbae reve, agüɨye vaerä pepɨa pe peyemboeko.

²⁸ Ërei kia jei yave peve: “Kuae mɨmba ko omee tumpa-raanga reta pe vae.” Agüɨye peu omombeu peve vae jeko pegua jare agüɨye vaerä pepɨa pe peyemboeko. Echa kuae ɨvɨ jare opaete mbaembae oï pɨpe vae yandeYa imbae ko.

²⁹ Chemiari ko aï ïru vae ipɨa pe oyemongeta jese vae re, pereta pepɨa pe peyemongeta jese vae reä. Ërei güɨramoi pere körai: “¿Maera ra chepuereä jau soo ïru vae oyemongeta kaviä jese vae jeko pegua?

³⁰ Echa che amee ko yasoropai Tumpa pe cherembíu re. Jáeramo ¿maera pa iñeenguruta chekotɨ jókuae Tumpa pe amee yasoropai jese vae re?”

³¹ Ërei che jae peve opaete mbaembae peu vae rupi jare opaete mbaembae peyapo vae rupi pemboete Tumpa.

³² Agüɨye peiko peporombogüɨapiuka vaerä judío reta pe, judiombae vae reta pe ani oporogüɨrovia vae reta Tumpa imbae reta pe.

³³ Jökoraiño vi che ayapo opaete mbaembae jaekavi opaete ïru vae reta pe vae, aekambae reve jaekavi cheve vaeño. Jaeño aeka jeta vae reta amborɨ vaerä, oyemboasauka reta vaerä.