Bìoball air-loidhne

Zowănnī 9 - Geba Roman New Testament

Jezŭ Mèhlî̆htage Agādŭkhi Dèbwè

¹ B́ĕ Jezŭ le ahlò̆mò̄ nu, Zè kèhtîgè bija agādŭkhî hlĕ aòla nu dèbwè.

² Zo bōhmubicè tòcò d́è̆ Cè, cò d́ò, “Sara, amèni dèkhòwè ḿî bija ajo dèbwè ā? Ḿî zo mo ca pa ā? Pwĕ cò òla ma agādŭkhi nu nè?” cè d́è̆ lōwa do.

³ Jezŭ d́òscĭge cè tòcò, “Tèb́è bija ajo dèbwè mèni dèkhòwè ńò ńò, tè b́è zo mo ca pa mèni dèkhòwè ńò ńò, ḿî d́ŏ Kib́ĭcè adèphîdèmè gî̄ hlî̆htabò̄ d́ŏ bija tòcò ahlò̆mò̄ anikhĭ lò.

⁴ Jè gè̄ mèb́è athodŏle Jè dèbwè adèmè b́ĕ lumuhti lumusèkhè̆ we jo nu. Dèkhilagè tapla, bija dè mè za be dèmè dèbwè̆ ńò.

⁵ Jò òwe d́ŏ lākho jo athŭtherĕ, Jî ḿî Lākho adèhlî̆ lò,” Cò d́ò lōwa tòcò do.

⁶ Cò d́ò hwă gōnu d́ō, Zî htwîlagè Cè pèèhtĭ haphĭhmuklè̆, b́ògè hapèè kî htôrôgè za gādŭ,

⁷ kî Cò d́ò lōwa, “Le kî ŭblab́ăbò̄ nu mūkă d́ŏ Sĭloh htĭhnò (htè ahtabohtab́ă ḿî ab́è thodŏle) abu nu,” Cò d́ò lōwa do. Ze le kî ŭblab́ă hwă ca tcahtîgegè dè.

⁸ Bija aòb́ôhtîb́ôwa cè kî atcahtî nènò za da a dè tòcò nu d́òhlè lōwa, “Bija ajo dèbwè ḿî asańă kî da a dè dèbwè nu tè b́è ńò ā?” cò d́ò do.

⁹ Tòcò cò d́ò, “Ḿî cè lò.” Alewe tòcò d́ò, “Tè b́è cè ńò, ḿî za lă lōwa lò.” Ḿî cè thè̆ne cò d́òhlî̆htagè, “Jî ḿî cè lò,” cò d́ò bija do.

¹⁰ Bija tòcò d́è̆ cè, “Na gādŭ hlî̆htage d́ò̆ cadè̄?”

¹¹ Cò d́òscĭge lōwa, “Bija jo ami Jezŭ dèbwè mèhwă hapèè, Zô htôrô ja gādŭ kî Cò d́ò jè, ‘Le d́ŏ Sĭloh htĭhnò kî ŭblab́ăkè̆,’ je le ŭblab́ă d́ō jè kèhtîgegè dè,” cò d́ò̆sa bija do.

¹² Cè tòcò d́è̆ lōwa, “Cò ò d́òlè̄?” Cò d́òscĭge lōwa, “Jî dî thîhè̆ ńò,” cò d́ò̆sa bija do.

Pharizè̆pho Adèhtôdèd́è̆

¹³ Bija tòcò leigè agādŭkhi dèbwè d́ŏ Pharizè̆pho tòcò ò nu.

¹⁴ Jezŭ b́ò hapèè, htôrô za gādŭ kî mèhlî̆htage za gādŭ ḿî d́ò̆ Munisòd́è̆ ani nu.

¹⁵ Pharizè̆pho tòcò d́è̆ d́ò̆ cè tapla be htè za gādŭ hlî̆htage cadè̄ nu. Cò d́òscĭge lōwa tòcò, “Zô htôrô ja gādŭ kî hapèè, ju ŭblab́ă kî tcahtîgegè dè,” cò d́ò̆sa lōwa tòcò do.

¹⁶ Mègōnu d́ō, Pharizè̆pho tòcò d́ò, “Bija ajo dèbwè tò ò d́ŏ Kib́ĭcè ò ńò, manè̄ d́ō, cò tò òi Munitcahtĭ ńò,” cò d́ò lōwa do. Barasă bija alewe tòcò d́òwe, “Bija dèkhòwèpho dèbwè gè̄ mè za d́ò̆ dècòklîcòhjè̆ gōjo tòcò cadè̄?” cò d́ò do. Kîd́ò̆ bija tòcò aklè̆ nu dèbēpha òhtagè.

¹⁷ Mègōnu d́ō, Cò d́ò d́ò̆ agādŭkhi dèbwè tapla be, “Ńò d́òbò̄ ab́ahlî̆hta na gādŭ dèbwè ḿî bija danè̄?” cè d́è̆ lōwa do. Cò d́ò̆sa lōwa, “Zî ḿî Prò̆fèt,” cò d́ò do.

¹⁸ Jŭdapho tòcò tu b́ugè za gādŭkhi hwă ahlî̆gè ńò, htô̆ zo jo hwă lōwa amo apa, htôtcad́è̆tca cè tòcò,

¹⁹ “Ajo ḿî thĭ phokhŏ htè thĭ d́ò agādŭkhi hlĕ aòla dèbwè nu ā? Za tcahtîge za dè cadè̄?” cè d́è̆ lōwa do.

²⁰ Zo mo za pa d́òscĭgè bija, “Wî thîhè̆ tèpwè ajo dèbwè ḿî wo phokhŏ kî za gādŭkhi hlĕ cò òla nu lò.

²¹ Barasă za gādŭ hlî̆htage cadè̄ nu wî dî thîhè̆ ńò, bò̄bwè mèhlî̆htage za gādŭ bwè ḿîwî dî thîhè̆ ńò ńò. D́è̆cabò̄ cè, zo do htŏ. Cò kò d́ò̆sa dò̆ d́ò̆è thĭ dòkhò̆,” cò d́ò bija do.

²² Zo mo ca pa d́ò gōjo ḿî d́ŏ zi scisăni Jŭdapho tòcò ale akhoacè̆ nu. Manè̄ kòd́òdo dō, Jŭdapho tòcò laglahlègè lōwa htè bija dèbwèbwè kò d́ò ma Jezŭ ḿî Krĭstu nu, zè gè̄ lè̄ lōwa Sinagŏgā akhlŏ cò d́ò do.

²³ Mègōnu akhoacè̆, zo mo ca pa d́òkò̆, “Zo do htŏ, htôtcad́è̆tca cè,” nu.

²⁴ Mègōnu cè tòcò jo agādŭkhi dèbwè tapla be kî d́ò, “Ŏlăbò̄ d́ŏ Kib́ĭcè ahlò̆mò̄ ńò d́ò̆sadè ḿî adî̄ahma lò nu! Wî thîhè̆ tèpwè htè bija ajo dèbwè ḿî dèkhòwèpho nu,” cò d́ò lōwa do.

²⁵ “Zî ḿî dèkhòwèpho ā? Ńò ā? Jî dî thîhè̆ ńò. Jî thîhè̆ ḿî ja gādŭkhi, khŏnujo ja tcahtî htŏ,” cò d́ò lōwa tòcò do.

²⁶ Cè tòcò d́ò cè, “Zè mègè nè danè̄? Zè mèhlî̆htage d́ò̆ na gādŭ cadè̄?” cè d́è̆ lōwa tòcò do.

²⁷ Cò d́òscĭge lōwa, “Jò d́ò̆sa hwă htŏ thĭ kî thĭ thîhè̆b́è htŏ. Thĭ thaè thîhè̆ ma tapla be nè? Thĭ thaè phî̆htagè Zo bōhmubicè tòcò dòkhò̆ ā?” cò d́ò lōwa tòcò do.

²⁸ Cè tòcò hô hò̆ hwă cè d́ō, cò d́ò, “Nè nu ḿî Zo bōhmubicè, wî ḿî Mŏzè abōhmubicè dòkhò̆.

²⁹ Wî thîhè̆ htè Kib́ĭcè jî̄b́èhtî Mŏzè nu, barasă bija ajo dèbwè nu Cò ò d́òlè̄ wî dî thîhè̆ ńò,” cò d́ò lōwa do.

³⁰ Cò d́òscĭgè lōwa tòcò, “Dè amò htèdômô̄dahmă ḿî ajo, Zè mèhlî̆htagè ja gādŭ, ḿî thĭ dî thîhè̆gè Cò ò alle ńò.

³¹ Wî thîhè̆ tèpwè Kib́ĭcè dò sòkhĕńe dèkhòwèpho alē ńò, ḿî athèb́è̆ Kib́ĭcè kî amè Zè dèthaèni dèbwè nu, Zò sòkhĕńe tèpwè lōwa alē.

³² Hlĕ Lākho òhta athè̆lè̄kho nu lò, gî̄ dî thîhè̆ mè bija amèhlî̆htage agādŭkhi hlĕ aòla nu tò ògè dèbwè̆ ńò.

³³ Bija ajo dèbwè kò tò ò ma d́ŏ Kib́ĭcè ò ńò nu, Zè dè mè za è da dimĭ ńò,” cò d́ò lōwa tòcò do.

³⁴ Cè tòcò d́òscĭgè cè, “Ńò òla hwă dèkhòwè abu d́ō nò thôithò̆i tèpwè wa ā?” cò d́ò lōwa do, kîd́ò̆ cè tòcò hnahèhtakè̆gè cè d́ŏ Sinagŏgā akhlŏ nu.

Thotha Agādŭkhi

³⁵ Jezŭ thîhè̆b́è bija hna hèhtakè̆ cè Sinagŏgā akhlŏ d́ō, b́ĕ Cè kèhtî lōwa nu, Cò d́ò, “Nu b́u tèpwè Bija Apho ā?” Cè d́è̆ lōwa do.

³⁶ Cò d́òscĭge lōwa, “Zî ḿî bò̄bwè? Ŏ B́ĭcè, cab́ô̆htè ju kū b́u b́è Cè nu?” cè d́è̆gè lōwa do.

³⁷ Jezŭ d́ò cè, “Nè kèhtî htŏ Cè, kî ajî̄b́èhtî nè khŏnujo ḿî Cè lò,” Cò d́ò̆sagè lōwa do.

³⁸ Cò d́òscĭge Jezŭ, “Ju b́u tèpwè, Ŏ B́ĭcè,” cò d́ò hwă zo dōhnŏlă kî gò̄la thèb́è̆gè lōwa.

³⁹ Jezŭ d́òscĭge cè, “Je lelagè d́ŏ Lākho d́ŏ Ji gī cirradè anikhĭ, cab́ô̆htè bija atè kèhtî ńò tòcò gè̄ kèhtîbò̄ kî akèhtî dè tòcò agādŭ gī khibò̄ nu,” Cò d́ò lōwa do.

⁴⁰ Pharizè̆pho aklè̆ athîhè̆b́è dè ajo tòcò d́è̆ Jezŭ kî d́ò, “Wa ḿî ḿî wa gādŭ khigègè ā?” cè tòcò d́è̆ lōwa do.

⁴¹ Jezŭ d́ògè cè tòcò, “Thĭ gādŭ gī khi ma d́ō, thĭ dèkhòwè tò ò mè ńò. Barasă thĭ d́ògè, ‘Wa tcahtî dè,’ d́ō, thĭ dèkhòwè òwe thĭ lò,” Cò d́ògè lōwa tòcò do.

« Roimhe

Air adhart »

Bible Society of Myanmar

Lean sinn:

Ceanglaichean taic

Sanasan